ဒဂုံ အဖျော်ယမကာ ကုမ္ပဏီ လီမိတက်၏ လူမှုရေးတာဝန်သိတတ်မှု

ဒဂုံ အဖျော်ယမကာ ကုမ္ပဏီ လီမိတက်သည် မြန်မာနိုင်ငံတွင် အခွန် အများဆုံး ပေးဆောင်သည့် ကုမ္ပဏီ စာရင်းတွင် တတိယ နေရာ၌ရှိသလို မြန်မာ့ လူ့အဖွဲ့အစည်း အတွက် လူမှုရေး တာဝန်ယူမှုများ ကိုလည်း ဆောင်ရွက် ပေးနေသည့် ကုမ္ပဏီ ဖြစ်သည်။ စတင် တည်ထောင်ချိန်မှ ယခု ၂၀၁၄ ခုနှစ် မတ်လ အထိ သုံးစွဲခဲ့သည့်ငွေ စုစုပေါင်းမှာ ကျပ်သန်းပေါင်း (၁၀၁၅.၄၉၁) အထိ ရှိနေပြီ ဖြစ်သည်။

သုံးစွဲခဲ့သည့် လုပ်ငန်းများမှာ သဘာဝ ဘေးဒဏ်သင့် ပြည်သူများ ဖြစ်သည့် နာဂစ် မုန်တိုင်းသင့် ပြည်သူများ အတွက် လှူဒါန်းငွေ ကျပ်သိန်း (၅၀၀၀)၊ သောက်သုံးရေ ရှားပါးသည့် ဒေသများတွင် စက်ရေတွင်းများ တူးပေးခြင်း၊ ရေကန်များ တည်ဆောက်ပေးခြင်း တို့တွင် ကျပ် (၃၆၆) သိန်း၊ ချို့တဲ့သော ကျောင်းများ အတွက် စာသင် ကျောင်းဆောင်သစ်များ ဆောက်လုပ် လှူဒါန်းခြင်းတွင် ကျပ် (၄၃၈) သိန်းကျော်၊ စာသင်ခုံများ လှူဒါန်းခြင်း အတွက် ကျပ် (၇၃၈) သိန်းကျော်၊ စာသင်ကျောင်းများတွင် Multi Media အခန်းများ ကွန်ပျူတာနှင့် ဆက်စပ် ပစ္စည်းများ လှူဒါန်းခြင်း အတွက် ကျပ် (၁၁၂)သိန်းကျော်၊ ကျောင်းဝတ်စုံနှင့် စာရေး ကိရိယာများ လှူဒါန်းခြင်း အတွက် ကျပ် (၅၃) သိန်းကျော်၊ နွေရာသီ ယဉ်ကျေး လိမ္မာသင်တန်း၊ အင်္ဂလိပ်စာ သင်တန်းနှင့် ကွန်ပျူတာ သင်တန်းများ ဖွင့်လှစ်ပေးခြင်း အတွက် ကျပ် (၅၈)သိန်း၊ စာကြည့်တိုက်များ ပြင်ဆင်ပေးခြင်း၊ စာအုပ်များ လှူဒါန်းခြင်း အတွက် ကျပ်(၇၉)သိန်းကျော်၊ ကျောင်းသူ ကျောင်းသားများအား ဒဂုံမုယော အားဖြည့် အချိုရည် တိုက်ကျွေးခြင်းတွင် ကျပ်(၂၁)သိန်းကျော် နှင့် အခြား ပရဟိတ လုပ်ငန်းများ အတွက် ကျပ်(၁၇၆)သိန်း ထည့်ဝင် သုံးစွဲပေးခဲ့သည်။

ထို့အပြင် ၂၀၁၁ ခုနှစ်မှ ၂၀၁၄ ခုနှစ်အတွင်း ဒဂုံ ပရဟိတ တေးဂီတ ဖျော်ဖြေပွဲများကို မြို့ပေါင်း ၁၆ မြို့တွင် ကျင်းပ ပေးခဲ့ပြီး အလှူရငွေ အားလုံး ဖြစ်သည့် ကျပ် (၂၈၉၁)သိန်းကျော်ကို ထိုမြို့ အသီးသီးရှိ ပရဟိတ အဖွဲ့များသို့ လှူဒါန်း ပေးခဲ့သည်။

မတ်လ ၁၁ ရက်နေ့ ကလည်း ရွှေပြည်သာ မြို့နယ်မှ အခြေခံ ပညာကျောင်း ၁၀ ကျောင်းနှင့် ဘုန်းတော်ကြီးသင် ပညာရေးကျောင်း တစ်ကျောင်း အတွက် သတ္တမ အကြိမ်မြောက် လေးယောက်ထိုင် စားပွဲ ကုလားထိုင် ၃၄၄ စုံကို ပေးအပ် လှူဒါန်း ခဲ့သည်။ ကျန်းမာရေး စောင့်ရှောက်မှု အတွက် ရွှေပြည်သာ မြို့ရှိ ပါရမီရှင် လူမှု ကူညီရေး အသင်းသို့ ခေတ်မီ လူနာတင် ယာဉ်တစ်စီးကို ကျပ်(၁၆၅) သိန်းဖြင့် ၀ယ်ယူ လှူဒါန်း ပေးခဲ့ပြီး ပညာရေး၊ ကျန်းမာရေး၊ လူမှုရေး လုပ်ငန်းများ အတွက် မြန်မာနိုင်ငံ ဒေသ အသီးသီးတွင် ဆက်လက် ဆောင်ရွက်နေမည် ဖြစ်ကြောင်း ဒဂုံ အဖျော် ယမကာ ကုမ္ပဏီ လီမိတက်မှ သိရသည်။

 

Category: 

Share