ကိုကျော်စွာမြင့်တို့ မိသားစု ကတ်ကြေးဖြင့် ထိုးခံရသည့် ဒဏ်ရာများအား သာမန်ဒဏ်ရာဟု မှုခင်းဆရာဝန်မှ မှတ်ချက်ပြုခဲ့ခြင်းအပေါ် နစ်နာသူ ကာယကံရှင်များမှ အံ့အားသင့်ခဲ့ရဟုဆို

“အခင်းဖြစ်တဲ့နေ့က သွေးသံရဲရဲနဲ့ အသက်မသေရုံတမယ် ပြင်းထန်တဲ့ ဒဏ်ရာတွေကို မတွေ့မမြင်ပဲ ဆေးကုပြီး ချုပ်ရိုးတွေဖြေ အနာကျက်ချိန် နှစ်ပတ်လောက်ကြာမှ မှုခင်းဆေးစာ မှတ်ချက်ပေးတယ်”

 

လွန်ခဲ့သော နှစ်ပတ်ခန့်က ဖြစ်ပွားခဲ့သော Tomorrowဂျာနယ်မှ ကိုကျော်စွာမြင့်တို့ တစ်မိသားစုလုံးအား ကတ်ကြေးဖြင့် ထိုးခဲ့သည့် အမှုတွင် ကိုကျော်စွာမြင့်နှင့် ဇနီးတို့မှာ ကတ်ကြေး ဒဏ်ရာများအပြင် မျက်ခွံအကြောသေခြင်းနှင့် နှုတ်ခမ်းတစ်ဖက်ရွဲ့သွားသည့် ပြင်းထန်ဒဏ်ရာများ ရရှိခဲ့သော်လည်း ယင်းအမှုအား ကိုင်တွယ်သော မှုခင်းဆရာဝန်မှ သာမာန်ဒဏ်ရာဟု မှတ်ချက်ပြု ပေးခဲ့ခြင်းအား များစွာအံ့အားသင့်ရကြောင်း ကာယကံရှင် မိသားစုထံမှ သိရသည်။
အဆိုပါ ဖြစ်စဉ်မှာ ဇန်န၀ါရီ ၁၀ရက်တွင် ဖြစ်ပွားခဲ့ခြင်းဖြစ်ကာ ယင်းအမှုနှင့် ပက်သက်၍ နှစ်ပတ်အကြာတွင် မှုခင်းဆရာဝန်မှ စစ်ဆေး၍ မှတ်ချက်ပြုပေးခဲ့ခြင်း ဖြစ်ကြောင်း သိရသည်။

“အစ်မတို့လင်မယား အခင်းဖြစ်တဲ့နေ့က သွေးသံရဲရဲနဲ့ အသက်မသေရုံတမယ် ပြင်းထန်တဲ့ ဒဏ်ရာတွေကို မတွေ့မမြင်ပဲ ဆေးကုပြီး ချုပ်ရိုးတွေဖြေ အနာကျက် အချိန်နှစ်ပတ်လောက်ကြာမှ မှုခင်းဆေးစာ မှတ်ချက်ပေးတယ်ဆိုတော့ အဲဒီနှစ်ပတ် အတွင်းမှာ အနာတွေက ကျက်နေပြီ သက်သာနေပြီလေ။ အဲဒီလို အချိန်တိုအတွင်း သက်သာလာအောင်လည်း အစ်မတို့ အနေနဲ့ အကောင်းဆုံး ဆရာဝန်ကြီးတွေ အကောင်းဆုံး ဆေးဝါးတွေနဲ့ ကုသတာပေါ့။  သူတို့တွေရဲ့ ဆေးစာမှတ်ချက် ကောင်းကောင်းရဖို့ ဒဏ်ရာတွေကို မကုပဲ ပုပ်သိုးအောင် ထားကြရမှာလား။ မိန်းကလေး တစ်ယောက်အတွက် မျက်နှာပေါ်မှာ ချုပ်လိုက်ရတဲ့ ဒဏ်ရာ အမာရွတ်တွေ၊ မျက်ခွံပေါ်က ဒဏ်ရာ အမာရွတ်တွေ၊ ပါးပြင်ပေါ်နဲ့ နဖူးက ချုပ်ထားရတဲ့ အမာရွတ်တွေ ရှိနေတာတောင် မှုခင်းဆရာဝန်ရဲ့ ဆေးစာမှတ်ချက်က သာမန်ဒဏ်ရာဆိုတော့ နစ်နာသူ အနေနဲ့ ဘယ်လိုလုပ် ခံစားနိုင်မှာလဲ၊ ပြီးတော့ တရားခံဆိုတာကလည်း အခုချိန်ထိ ဖမ်းမမိသေးဘူးလေ။ တရားခံ မမိမချင်း အစ်မတို့က ဒဏ်ရာတွေ ဒီအတိုင်းထားပြီးတော့ မကုပဲ စောင့်နေရမယ့် ခေတ်စနစ်လား။ ဒီဖြစ်လိုဖြစ်ခဲ့တာကို သာမန်အဆင့်လောက် မှတ်ချက်ပေးတဲ့အပေါ် သဘောမတူနိုင်ပါဘူး” ဟု ကိုကျော်စွာမြင့်၏ ဇနီးဖြစ်သူ မသော်တာက ပြောကြားခဲ့သည်။

အဆိုပါ အခင်းဖြစ်စဉ်ကြောင့် ကိုကျော်စွာမြင့်၏ ဇနီးမှာ မျက်နှာနှင့် ဦးခေါင်းတစ်ဝိုက်တွင် အချက်၂၀ခန့် ချုပ်ခဲ့ရကြောင်းနှင့် ဒဏ်ရာများမှာ ချုပ်ရိုးဖြေပြီး ဖြစ်သော်လည်း ဘယ်ဖက် မျက်စိတစ်ဖက် မျက်ခွံအကြောသေ မှေးသွားပြီး၊ နှုတ်ခမ်းတဖက်ရွဲ့သွားကြောင်း ကုသပေးသည့် ဆရာဝန်ဆေးစာ မှတ်ချက်ပေးခဲ့ကြောင်းလည်း သိရသည်။

“အခုလိုဖြစ်ရပ်တွေမှာ မှုခင်းဆရာဝန်က အခင်းဖြစ်ချိန် သွေးသံရဲရဲ အခြေအနေကို မတွေ့ရှိပဲ သက်ဆိုင်ရာ ဆေးရုံက ကုသမှုပြီးစီးမှသာ မှတ်ချက်ပေးတဲ့ နည်းစနစ်ကိုက စပြီးမှားနေတယ် ထင်တာပဲ အခင်းဖြစ်ဖြစ်ချင်း ဆေးရုံရောက်လာတဲ့ ထိခိုက်နစ်နာသူရဲ့ အခြေအနေကို ဦးစွာသုံးသပ်ပြီး မှုခင်းဆိုင်ရာ ထိခိုက်မှု အခြေအနေကို မှတ်ချက်ပေးမှသာ အခြေအနေမှန် ဖြစ်ရပ်မှန်အပေါ် ထိရောက်တဲ့ ဆေးပညာဆိုင်ရာ သုံးသပ်ချက် မှတ်ချက် ဖြစ်ပါလိမ့်မယ်။ ဒါနဲ့ပက်သက်ပြီး ပြောဆိုဖို့အတွက် တရားဥပဒေက နိုင်ငံသား ပြည်သူတွေကို ဘယ်လို အခွင့်အရေးတွေ ပေးထားသလဲ၊ ဆရာဝန်မို့ ပညာရှင်ရှုထောင့်က ပြောတယ်ဆိုရင် တခြားအထူးကု ဆရာဝန်ကြီး အနေနဲ့ ပညာရှင်ရှုထောင့်က ပြန်လှန်ထောက်ပြမယ် ဆိုရင်လည်း မှုခင်းဆိုင်ရာ ဆရာဝန်ရဲ့ မှတ်ချက်ကသာ ဥပဒေအရ အကျုံးဝင်တယ်ဆိုတော့ နစ်နာသူ နိုင်ငံသား ပြည်သူတစ်ယောက် အနေနဲ့ ဘာအခွင့်အရေးမှ ပြောဆိုထောက်ပြခွင့် နစ်နာမှုတောင်းဆိုခွင့် မရှိတော့ဘူးလား မေးခွန်းထုတ်စရာတွေ ဖြစ်လာရပါတယ်”ဟု ကိုကျော်စွာမြင့်က ထောက်ပြပြောကြားခဲ့သည်။

အဆိုပါ အခင်းဖြစ်ရပ်တွင် ပါဝင်သော ကိုကျော်စွာမြင့်၏ အစ်မကြီးမှာ တိုက်ခိုက်ခံရမှုကြောင့် ရှေ့သွားကျိုးသွားသော်လည်း ကျိုးသွားသည့်သွား မပြနိုင်၍ ဆေးစာထဲ ထည့်မရေးနိုင်ဟု မှုခင်းဆရာဝန်မှ မှတ်ချက်ပေးခဲ့ကြောင်းလည်း ကာယကံရှင် မိသားစုထံမှ သိရသည်။

“ဒဏ်ရာနဲ့ သေမလောက်ဖြစ်နေတဲ့ နစ်နာသူဘက်ကနေ ကျိုးသွားတဲ့ ကိုယ့်သွားကိုယ် ပြန်ရှာပြီး တင်ပြမှသာ အမှုမြောက်ပါမယ်ဆိုတဲ့ သဘောမျိုးလား၊ နားမလည်နိုင်အောင် ဖြစ်ရပါတယ်။ နောက်ပြီး အခင်းဖြစ်တဲ့နေ့က ဖြစ်ရပ်ကြောင့် အစ်မတို့ အာရုံကြောတွေ ထိခိုက်ပြီး နှုတ်ခမ်းရွဲ့သွားခဲ့တယ် ဒါကိုလည်း မဆိုင်ပါဘူး ဆိုပြန်တော့ အစ်မတို့က အရင်ကတည်းက နှုတ်ခမ်းရွဲ့စောင်းနေသလိုမျိုး ဖြစ်မနေဘူးလား။ ပြင်ပက အထူးကု ဆရာဝန်ကြီးတွေနဲ့ ပြသတဲ့ မှတ်တမ်းတွေ ကျပြန်တော့လည်း တရားရုံးမှာ တရားမ၀င်ပြန်ဘူး ဆိုပြန်တော့ အစ်မတို့အနေနဲ့ ခေတ်ကို အပြစ်တင်ရမလား စနစ်ကို အပြစ်တင်ရမလား လုပ်နေတဲ့လူတွေကိုပဲ အပြစ်တင်ရမလား မသိတော့ပါဘူး”ဟု ကိုကျော်စွာမြင့်၏ ဇနီး မသော်တာက ထပ်မံပြောခဲ့သည်။

THS

 

Category: 

Share