အစိုးရ၀န်ကြီးဌာန အချို့၏ ရက် ၁၀၀ စီမံချက်ဆောင်ရွက်ချက်အပေါ် သူတို့အမြင်

ဒေါ်သူသူမာ (NNER)
ဦးရောဘတ်စန်းအောင် (တရားလွှတ်တော်ရှေ့နေ)

အစိုးရ၀န်ကြီးဌာန အချို့၏ ရက် ၁၀၀ စီမံချက်ဆောင်ရွက်ချက်အပေါ် သူတို့အမြင်

အစိုးရသစ်ရဲ့ ၀န်ကြီးဌာနများ ရက် ၁၀၀ စီမံချက်များအတွင်း ပြီးမြောက်အောင် လုပ်ဆောင်နိုင်မည့် ရည်မှန်းချက်များအတိုင်း လုပ်ဆောင်နေသော်လည်း လက်ရှိတွင် ၄င်းရက် ၁၀၀ ပြည့်မြောက်ရန် ရက်အနည်းငယ်ခန့်သာ လိုတော့ကြောင်း သိရသည်။ ထို့ကြောင့် ၀န်ကြီးဌာနများ၏ လုပ်ငန်းများ ပြီးမြောက်အောင် ဆောင်ရွက်မည့် ရက် ၁၀၀ စီမံချက်အတွင်းမှ လုပ်ဆောင်နေသည့် လုပ်ငန်းများအပေါ် လိုအပ်ချက်များနှင့် ဆက်လက် လုပ်ဆောင်ရန် လိုအပ်နေမှုများ အတွက် သက်ဆိုင်ရာ ၀န်ကြီးဌာနများ၏ လုပ်ငန်းများနှင့် သက်ဆိုင်ဆက်နွယ်သည့် ပညာရှင်များ၊ တက်ကြွလှုပ်ရှားသူများ၊ လူမှုအဖွဲ့အစည်းများ၏ သုံးသပ်ဝေဖန်မှုများအား ဖော်ပြလိုက်ရပါတယ်။

 

ပညာရေးဝန်ကြီးဌာန၏ ရက် ၁၀၀ စီမံချက ဆောင်ရွက်မှုအပေါ် အမြင်

ဒေါ်သူသူမာ (NNER)

NNER အနေနဲ့ကတော့ အခုကိစ္စတွေအပေါ်မှာ ပြောချင်တာက မူဝါဒရေးရာ၊ အမျိုးသား ပညာရေး ဥပဒေကိုတော့ ဆက်ပြီး မပြင်ဆင်ဘဲ ဒီအတိုင်းပဲသွားမယ်ဆိုတဲ့ အချက်တွေကိုလည်း ပြောဆိုမှုတွေအရ ကျွန်မတို့ တွေ့လာရတယ်။ အဲဒီတော့ ကျွန်မတို့ကတော့ အခုသူတို့ လုပ်ဆောင်နေတာတွေဟာ နေ့တိုင်းလုပ်ဆောင်ရမယ့်၊ လတိုင်း လုပ်ဆောင်ရမယ့် အပေါ်မှာ သူတို့ လုပ်သင့်လုပ်ထိုက်တယ်ဆိုတဲ့ ဟာတွေကို လုပ်တယ်လို့တော့ ထင်နေတယ်။ ဒါပေမဲ့ အငြင်းပွားနေတဲ့ အရာတွေကလည်း ရှိတယ်။ ဒီအငြင်းပွားနေတဲ့ ကိစ္စတွေမှာ အမျိုးသား ပညာရေး ဥပဒေကိစ္စတို့ နောက် ဘယ်လိုမူဝါဒမျိုးနဲ့ ပညာရေးကို အကောင်အထည် ဖော်မယ်ဆိုတဲ့ဟာမျိုးကို သဲသဲကွဲကွဲတော့ အခုချိန်ထိ မသိရသေးဘူးလို့ ပြောချင်တယ်။ အခု အကောင်အထည်ဖော်နေတဲ့ပုံက နှစ်တိုင်း ပညာရေးနဲ့ ပတ်သက်လို့ရှိရင် ထည့်သွင်းစဉ်းစားရမယ့် အချက်တွေ လုပ်နေတာလို့ ယူဆတယ်။ လက်ရှိအစိုးရရဲ့ ရက် ၁၀၀ထဲမှာ ဘာပြောမလဲဆိုရင် ထူးခြားတဲ့ ပြောင်းလဲမှု မရှိသေးဘူးလို့ပဲ ပြောချင်တယ်။ နောက်တစ်ခုက အခုလုပ်နေတဲ့အထဲမှာ ဒီမူလတန်းကလေးတွေ ဆရာပိုင်းက ပညာရေး ကိစ္စတွေ မပြောင်းလဲသေးဘူး။ မသင်မနေရ မူလတန်းစနစ်ကိုပဲ သွားနေသေးတယ်။ နောက် ရက် ၁၀၀ စီမံချက်မှာ လုပ်ဆောင်မယ်ဆိုတဲ့ဟာတွေ ပြီးမြောက်သလားဆိုရင်တော့ သူတို့လုပ်နေတာက ဒီလုပ်ငန်းစဉ်ထဲမှာပဲ မဖြစ်မနေလုပ်ရမယ့် ပညာရေးဆိုင်ရာ လုပ်ငန်းစဉ်တွေရဲ့ အစိတ်အပိုင်းတွေလို့ ပြောချင်တယ်။ အရင်အစိုးရကလည်း အဲဒါတွေလုပ်တယ်။ အခုအစိုးရကလည်း ဒါတွေပဲ လုပ်နေသေးတယ်လို့ ကျွန်မတို့ မြင်ပါတယ်။ ပိုကောင်းလာတဲ့ အချက်တွေက ဘာရှိလဲဆိုရင် ကျောင်းက ကလေးတွေကို ၀တ်စုံတွေပေးတယ်၊ စာအုပ်တွေပေးတယ်။ အခမဲ့ ဖြန့်ချိတယ်။ အဲဒါတွေကတော့ ဟိုအရင်အစိုးရက ထောက်ပံ့တာ ထက်စာရင် ပိုထောက်ပံ့လာတာ တွေ့တယ်။ ဒါပေမဲ့ ကျွန်မတို့ရှုထောင့်က ပြောရရင် ဒီဟာတွေကို ဖြည့်ဆည်းပေးရုံနဲ့ အရည်အသွေးရှိတဲ့ ပညာရေးကို ရသွားလားဆိုတဲ့ ဆန်းစစ်ချက်မှာတော့ ကျွန်မတို့က သံသယရှိတယ်။ ဒါပေမဲ့ KGတန်းမှာ သင်ကြားတဲ့ သင်ကြားရေးပိုင်းမှာ ပြောင်းလဲလာတာတွေကတော့ ကောင်းပါတယ်။ နောက်တစ်ခုကတော့ ဆရာတွေ လွတ်လပ်ခွင့်၊ စာမေးပွဲပုံစံတွေပြောင်းဖို့၊ နောက်တစ်ခုက သတင်းအချက်အလက်တွေ ရရှိမှုမှာလည်း ပွင့်လင်းမြင်သာမှု မရှိသေးဘူးလို့ ပြောချင်တယ်။

ပြည်ထဲရေးဝန်ကြီးဌာန၏ ရက် ၁၀၀ စီမံချက်ဆောင်ရွက်မှုအပေါ် အမြင်

ဦးရောဘတ်စန်းအောင် (တရားလွှတ်တော်ရှေ့နေ)

ပြည်ထဲရေး ၀န်ကြီးဌာန အနေနဲ့ ပြောင်းလဲမှုတော့ ရှိနေတယ်။ ဒါပေမဲ့ အကျဉ်းသားတွေရဲ့ မိသားစုတွေနဲ့ ထောင်ဝင်စာ တွေ့ဆုံရေးဆိုတဲ့ ကိစ္စမှာတော့ အခုပေးထားတဲ့ မိနစ် ၂၀၊ ၂၅ ဆိုတာ လုံလောက်မှု မရှိဘူး။ နာရီဝက်လောက်တော့ ပေးသင့်တယ်။ နောက် တရားရုံးတွေကို ပြင်တဲ့အခါမှာလည်း ပြည်နယ်နဲ့တိုင်း တရားရုံးတွေမှာ ပြင်ရမှာ ဖြစ်သလို ပြည်ထောင်စု တရားရုံးတော်မှာလည်း ပြင်ဖို့လိုတယ်။ ဘာဖြစ်လို့လဲဆိုရင် အမှုတွေတက်လာရင် အရာမရောက်ဘဲ ပလပ်ပစ်တဲ့ အစဉ်အလာတွေကိုလည်း ရပ်ဆိုင်းပြီးတော့ ကျယ်ကျယ်ပြန့်ပြန့် ကြားနာတဲ့ တရားစီရင်ရေးစနစ် ဖြစ်အောင် လုပ်ဖို့လိုပါတယ်။ အဲဒါမှလည်း တိုးတက်လာမယ်။ နောက်တစ်ခုကရှေ့ကို ငါးနှစ်တာကာလမှာ ဘယ်အပိုင်းတွေကို ကိုင်တွယ် ဆောင်ရွက်သွားရမယ်ဆိုတဲ့ လေ့လာသုံးသပ်တဲ့ အနေအထားလို့ပဲ ဒီရက် ၁၀၀ကို မြင်တယ်။ အဲဒီတော့ ရှေ့လုပ်ငန်းစဉ်တွေနဲ့ ပတ်သက်ပြီး ကြိုးစားဆောင်ရွက်သွားမယ်ဆိုတာကိုတော့ မြင်နေရပေမယ့် တစ်ဖက်ကလည်း အနှောင့်အယှက် အဟန့်အတားတွေ ဖြစ်ကုန်အောင် လူမျိုးရေး၊ သာဘာရေး ပြဿနာတွေ ဖန်တီးနေတာတွေကိုလည်း ထိထိရောက်ရောက် ဖော်ထုတ်အရေးယူ ဖြေရှင်းနိုင်ဖို့ လိုပါတယ်။ တိုးတက်လာတာတွေကတော့ ရှိတယ်။ အဲဒီလို တိုးတက်လာတာနဲ့အတူ တစ်ဖက်ကလည်း လူသတ်မှုတွေ၊ လုယက်မှုတွေ၊ မုဒိမ်းမှုတွေကလည်း တိုးတက်လာတယ်။ အဲဒီတော့ အဲဒါတွေကိုလည်း နိုင်အောင်ထိန်းသိမ်းဖို့လိုပြီး ရဲတပ်ဖွဲ့ရဲ့ အဆင့်အတန်းကိုလည်း မြှင့်တင်ဖို့ လိုအပ်နေပါသေးတယ်။

စီးပွားရေးနဲ့ ကူးသန်းရောင်းဝယ်ရေး ၀န်ကြီးဌာန၏ ရက် ၁၀၀ စီမံချက် ဆောင်ရွက်မှုအပေါ် အမြင်

ဦးတင်သန်းဦး (စီးပွားရေးပညာရှင်)

ဘာပဲပြောပြော ရက် ၁၀၀အတွင်းမှာ အစိုးရစီးပွားရေး ပြုပြင်ပြောင်းလဲမှုတွေနဲ့ ပတ်သက်လို့ကတော့ ထင်ရှားတဲ့ဥစ္စာ ဘာမှမပြနိုင်ဘူးလို့ ပြောရမှာပဲ။ နောက်ပြီး ပြည်ထောင်စု အစိုးရ အနေနဲ့ စီးပွားရေး ဘာတွေလုပ်ထားသလဲ။ ရက် ၁၀၀အတွင်းမှာ ဘယ်လောက်အကောင်အထည်ဖော်ပြီး ဘယ်လိုစာချုပ်တွေ ချုပ်ထားသလဲ။ ဘာတွေ လုပ်နေတယ်လို့ သူတို့ဘက်က ပြောနိုင်တဲ့ အခြေအနေတော့ မဟုတ်ဘူး။ နောက်ပြီး ပြည်ပနဲ့လုပ်နေတဲ့ Inport ကဏ္ဍတွေမှာလည်း ဖြစ်လာတဲ့ အပြောင်းအလဲတွေ အနေနဲ့ မြင်သာထင်သာအောင် လုပ်ဖို့အတွက် ပြနိုင်မှုတွေကိုလည်း ဆရာတို့ မတွေ့ရသေးဘူး။ ဥပမာ ဒီရက် ၁၀၀ အတွင်းမှာ စီမံချက်ချပြီး လုပ်နေတယ်ဆိုတဲ့ နေရာမှာ အရင်စီမံချက်တွေကိုလည်း ဥပဒေနဲ့အညီ ဖြေရှင်းခွင့်မရဘဲနဲ့ ဖမ်းလိုက်တာတို့ အပြစ်ပေးလိုက်တာတို့ဆိုတဲ့ အသံတွေတောင် ထွက်လာသေးတယ်။ ဒါကတော့ အစိုးရသစ် အနေနဲ့ သတိထားရမယ့်အချက် အစိုးရသစ် လက်ထက်မှာ သူ့ယန္တရား အသစ်ကို ပုံဖော်ပေးမယ့် တရားရုံးတွေဖြစ်စေ၊ ဖမ်းဆီးအရေးယူမှုတွေနဲ့ စီမံချက်ကိုအကြောင်းပြုပြီး ဖြည့်တင်းမှုတွေက ဥပဒေမဲ့ လုပ်တာမျိုးတွေဟာ အရင်အစိုးရနဲ့ ထူးမခြားနား ဖြစ်နေတယ်လို့ မပေါ်အောင် လုပ်ဖို့လည်း သူတို့မှာ တာဝန်ရှိတယ်။ နောက် Export၊ Inport ကဏ္ဍတွေမှာလည်း သူတို့အနေနဲ့ အခွန်အကောက် ပြဿနာတွေ နောက် Export၊ Inport တိုးမြှင့်ဖို့အတွက် ကွင်းဆင်းတာတွေ စစ်ဆေးတာတွေ ရှိခဲ့တယ်။ Export၊ Inport ကုန်သည်တွေဘက်ကတော့ သိသာတဲ့ ပြောင်းလဲမှုတွေနဲ့ တူညီတဲ့ တုံ့ပြန်မှု မတွေ့ရဘူးလို့တော့ သိရတယ်။ နောက် အဓိကကတော့ အစိုးရတွေရဲ့ ရက် ၁၀၀ ဆိုတာတွေက သက်တမ်းအားဖြင့် တိုပါတယ်။ အစိုးရသစ် တက်လာတဲ့ အမြင်တွေနဲ့ ပြောရင်တော့ နိုင်ငံတကာ ဆက်ဆံရေးနဲ့ နိုင်ငံတကာ ထိတွေ့မှုကိုတော့ ယခင်အစိုးရတွေထက် ပိုပြီးတော့ အရေးပေး ခံရတယ်လို့တော့ ပြောရမှာပေါ့။

 

Category: 

Share