ယခင် အစိုးရများ လက်ထက် နိုင်ငံပိုင် မြေဧက ၄ ဒသမ ၈ သန်းကျော်အား လုပ်ငန်းရှင် ခြောက်ထောင်ကျော်ခန့်ကို လုပ်ကိုင် ခွင့်ပြုခဲ့

နိုင်ငံတော်မှ ပိုင်ဆိုင်သည့် မြေလွတ်၊ မြေရိုင်း များနှင့် ပလပ်မြေ ဧက ၄ သန်း ၈ သိန်းကျော်အား ယခင် အစိုးရ အဆက်ဆက်က ၁၉၉၂ ခုနှစ်မှ ၂၀၁၁ ခုနှစ်အထိ ၁၉ နှစ်အတွင်း လုပ်ငန်းရှင် ခြောက်ထောင် ခန့်ကို တစ်ဦးလျှင်  မြေဧက ၇၀၀ ကျော် လုပ်ကိုင်ခွင့် ပြုခဲ့ကြောင်း စီမံကိန်းနှင့် ဘဏ္ဍာရေး ၀န်ကြီးဌာန ပြည်ထောင်စု ၀န်ကြီး ဦးကျော်ဝင်းက ပြောကြားသည်။

“ဗဟို မြေယာ ကော်မတီက အစ ဒီနေ့အထိ ၁၉၉၂ ခုနှစ်ကနေ ၂၀၁၁ ခုနှစ်အထိ ကျွန်တော်တို့ မြေလွတ်၊ မြေရိုင်း၊ ပလပ်မြေတွေကို အကြောင်း အားလျော်စွာ လုပ်ကိုင်ခွင့်တွေကို ချထားပေးခဲ့ပါ တယ်။ အဲ့ဒီတော့ အတိုချုပ် တင်ပြရရင် စုစုပေါင်း မြေ ကျွန်တော်တို့ ပြန်လည် ဆန်းစစ်ချက် အရ မြေ ဧက ၄ သန်းနဲ့ ၈ သိန်းကျော်ကို လူဦးရေ ၆၀၀၀၊ အဖွဲ့အစည်းတွေလည်း ပါရင် ပါပါလိမ့်မယ်။ ပြန် လည်ပြီးတော့ ခွဲဝေပေးတယ် ဆိုတာကို ကျွန်တော်တို့ သုံးသပ် တွေ့ရှိရပါတယ်။ ယေဘုယျ ပြန်လည် သုံးသပ်လို့ ရှိရင် လူတစ်ယောက် တစ်ယောက်တိုင်းကို ဧက ၇၀၀ လောက် လုပ်ကိုင်ခွင့် ပေးခဲ့တယ်လို့ ကျွန်တော်တို့ တွေ့ရပါတယ်”ဟု ပြည်ထောင်စု ၀န်ကြီး ဦးကျော်ဝင်းက ပြောသည်။

သို့သော် ယင်းမြေဧက ၄ သန်း ၈ သိန်းကျော် တို့အား ၁၉ နှစ် အတွင်း လူတစ်ဦးလျှင် မြေဧက ၇၀၀ ကျော်ကို လုပ်ပိုင်ခွင့် ပြုခဲ့သော်လည်း လက်ရှိတွင် လုပ်ကိုင်ခွင့် ရရှိသူများမှ နိုင်ငံတော်အား အကျိုးပြုမှု အားနည်းလျက် ရှိကြောင်း ၄င်းက ပြောသည်။

နေပြည်တော်ရှိ မြန်မာ အပြည်ပြည် ဆိုင်ရာ ကွန်ဗင်းရှင်း ဗဟိုဌာန (MICCT) တွင် အောက်တိုဘာ ၂၂ ရက်က ကျင်းပ ပြုလုပ်သည့် နိုင်ငံတော်၏ အတိုင်ပင်ခံ ပုဂ်္ဂိုလ်နှင့် စီးပွားရေး လုပ်ငန်းရှင်များ၊ ဖွံ့ဖြိုးမှု မိတ်ဖက်များ တွေ့ဆုံပွဲ အခမ်းအနားတွင် စီမံကိန်းနှင့် ဘဏ္ဍာရေး ၀န်ကြီးဌာန ပြည်ထောင်စုဝန်ကြီး ဦးကျော်ဝင်းက စီးပွားရေး မူဝါဒနှင့် ပတ်သက်၍ ရှေ့ဆက် လုပ်ဆောင်မည့် လုပ်ငန်းစဉ် များအား ရှင်းလင်းစဉ် ထည့်သွင်း ပြောကြားခဲ့ခြင်း ဖြစ်သည်။

ထို့အပြင် ပြည်ထောင်စု ၀န်ကြီး ဦးကျော်ဝင်းက စီးပွားရေးမူဝါဒနှင့် ပတ်သက်၍ ရှေ့ဆက် လုပ်  ဆောင်မည့် လုပ်ငန်းစဉ်နှင့် အကောင်အထည် ဖော်ဆောင်ရွက်ရန် စီစဉ် ထားသည့် ရင်းနှီးမြှုပ်နှံမှု မူဝါဒများအား ရှင်းလင်း ပြောကြားစဉ် တွင်လည်း လုပ်ငန်းရှင်များ အနေဖြင့် လက်ရှိ အစိုးရသစ်၏ စီးပွားရေး မူဝါဒ အရ ရင်းနှီးမြှုပ်နှံမှုများ  ပြုလုပ်နိုင်ရန် အတွက် နိုင်ငံပိုင်မြေ များအား ငှားရမ်း လုပ် ကိုင်မည် ဆိုပါက သင့်လျော်သည့် ကာလ အပိုင်းအခြား အရ ပထမနှစ် ၅၀ နှင့် ဒုတိယ ၁၀ နှစ် နှစ်ကြိမ်ကို ငှားရမ်း လုပ်ကိုင်ခွင့်အား ပြဋ္ဌာန်း ပေးသွားမည်ဟု ဆိုသည်။

ထို့ကြောင့် လုပ်ငန်းရှင်များအား လုပ်ကိုင်ခွင့် ပေးသည့် အခါတွင် လည်းကောင်း၊ တိုင်းရင်းသား အားလုံး တန်းတူညီမျှ အခွင့်အရေးများ ပေးသည့် အခါတွင် လည်းကောင်း အားနည်းချက်များ၊ ချို့ယွင်းချက် များကို ပပျောက်အောင် ဖြေရှင်းပြီး ဆက်လက် လျှောက်လှမ်းရန် လိုအပ်ကြောင်း ၄င်းက ဆက်လက် ပြောကြားခဲ့သည်။

ကိုလူသစ်

Category: 

Share