ဇာဂနာ မရယ်ရတော့ဘူး (၉) - ဇာဂနာ

ဒီရက်ပိုင်း ဇာဂနာခရီးတွေ ဆက်တိုက်ဆက်တိုက် ထွက်နေရပါတယ်ခင်ဗျ။ ရှမ်းပြည်တက်လိုက် ပင်လယ်ဘက်ရောက်လိုက် ဆိုတော့ အထက်တက်လိုက် အောက်ကျလိုက် ဆိုပါတော့လေ။ လေထဲတစ်လှည့် ရေထဲတစ်ခါလို့လည်း ဆိုနိုင်ပါတယ်ဗျာ။

မြန်မာပြည်အနှံ့ကို ရောက်တော့ မြန်မာပြည်သူ မြန်မာပြည်သားတွေနဲ့ တွေ့ရတာပေါ့ခင်ဗျ။ သူတို့ပြောတာ နားထောင်ရတာ ခင်ဗျာ။ ခက်နေတာက ဇာဂနာဆိုတာ သူတို့လို သာမန်ပြည်သူတစ်ယောက်ပါပဲ။ တချို့ကတော့  Special ပြည်သူပြည်သားတွေ ခင်ဗျ။ သိပ်တတ်ကြတာပေါ့လေ။ နိုင်ငံရေး၊ စီးပွားရေး၊ စစ်ရေး၊ လူမျိုးရေး အရမ်းတော် အရမ်းတတ်၊ မွေးကတည်းက နားလည်လာတဲ့သူတွေ ဖေ့စ်ဘွတ်ခ်ပေါ် ပြုံခဲနေတဲ့ မြန်မာပြည်ကိုး။ တိုင်းပြည်အုပ်ချုပ်ရေးဆိုလည်း သူတို့က ဟိုလိုလုပ်ပါလား၊ ဒီလို လုပ်ပါလားနဲ့ ရေးရေးပြနေကြတာ ဖတ်ရတော့ တော်လိုက်တာလို့ ဇာဂနာ မချီးကျူးဘဲ မနေနိုင်အောင်ပါပဲ။ ဟော နောက်ဆုံး ဆီလီကွန်အရေးလည်း သူတို့ပါလာတာပါပဲ။ တတ်လိုက်ကြတာလို့။ ဟော စင်ကာပူကို အမီလိုက်မှာလား ကျော်တက်မှာလားဆိုတော့လည်း သူတို့ပါလာပြန်တာပါပဲ။ အရင်က တံငါရွာလေးတို့၊ မြန်မာပြည်လာပြီး လေ့လာပြီးသင်ယူပြီးမှ စင်ကာပူနိုင်ငံ ထူထောင်သွားတာတို့ ရေးကြ ပြောကြပြန်ပါရော။ ဇာဂနာတို့တော့ ဗဟုသုတရပါတယ် ခင်ဗျ။ ဒီကြားထဲ စင်ကာပူရောက်နေတဲ့ မြန်မာတွေချည်းစုမယ်ဆိုပဲ။ ဇာဂနာတို့လို မြန်မာပြည်က သာမန်ငပေါတွေကို တိုင်းပြည်ထဲကနေ ဆောင့်ကန်ထုတ်လိုက်ပြီး လက်ရှိအစိုးရနဲ့ သူတို့နဲ့ပူးပေါင်းလို့ မြန်မာပြည်ကြီးကို ထူထောင်လိုက်ရင် ချက်ချင်းတောင် စင်ကာပူကို ကျော်တက် သွားမယ်တဲ့။ အမလေးလေ ပြောရဲလိုက်ကြတာလို့။ အရင်အစိုးရတုန်းကလည်း အင်္ဂပူက စင်ကာပူ ဖြစ်ပြီးခဲ့ပါပြီလေ။
လာကြပါခင်ဗျာ။ လာကြပါလို့ ဖြစ်နိုင်ရင် ခုချက်ချင်းလာကြပါလို့ ဇာဂနာတို့က ဖိတ်ခေါ်ချင်ပါတယ်ခင်ဗျ။ အစတုန်းကလည်း ခင်ဗျားတို့သဘောနဲ့ ခင်ဗျားတို့ တိုင်းပြည်ထဲက ထွက်သွားကြပြီး ခုမှ ဇာဂနာတို့ သာမန်ပြည်သူတွေကို ကန်ထုတ်လိုက်ချင်တယ်ဆိုလည်း ခံပါမယ်ခင်ဗျာ။  Stateless အဖြစ်ခံပါမယ်။ လာပါ။ ထူထောင်ပါ။ ကန်တော့မထုတ်ပါနဲ့။ အေးအေးသက်သာထွက်သွားပါ့မယ်။

ပြောရရင်တော့ ခေတ်အဆက်ဆက် တက်လာသမျှ အစိုးရတွေထဲမှာ NLD အစိုးရနဲ့ ဇာဂနာတို့ အရင်းနှီးဆုံးပါခင်ဗျာ။ လွှတ်တော်နဲ့လည်း ခင်တယ်။ ၀န်ကြီးတွေနဲ့လည်း သိတယ်ခင်ဗျာ။ နာမည်ကျော် ဦးဝင်းထိန်ကြီးနဲ့ဆိုလည်း တစ်အိုးတည်းစားတွေပါ။ ဆန်ရင်းနာနာဖွပ်ဆိုပေမယ့် ဇာဂနာတို့က မဖွပ်ပါဘူး။ ကိုယ့်ပေါင်ကိုယ်လှန်ထောင်းတယ် ဆိုတာလည်း နာအောင်ထောင်းမလားလို့။ ဖွဖွလေးပေါ့ဗျာ။ ဒါပေမဲ့ မဝေဖန်ရဘူး ဆိုတာတော့ များသွားပြီခင်ဗျ။

ဘယ်အစိုးရပဲဖြစ်ဖြစ် ဇာဂနာကတော့ ဝေဖန်မှာပဲဆိုတာ ၁၉၈၅ ကတည်းက ပြောခဲ့တာပါ။ မနေ့တစ်နေ့ကမှ စစ်အစိုးရမရှိတော့လို့ ခေါင်းထောင်လာပြီး အမူးမပြေသေးဘဲ ယောင်နနနဲ့ ထအော်တာ မဟုတ်ဘူးခင်ဗျ။ အမြင်မတော်ရင် မသင့်တော်ရင်ပြောမှာ ဝေဖန်မှာပါ။ ဒါမှလည်း မင်းအစိုးရ နားပေါက်တော့မှာပေါ့။ တိုင်းပြည်မှာ ၀န်ကြီးတို့ ၀န်ကြီးချုပ်တို့ဆိုတာ အောက်ခြေပြည်သူနဲ့ အလှမ်းကွာတယ်ခင်ဗျ။ အောက်ခြေပြည်သူက အစိုးရကို ဘာဝေဖန်နေလဲ၊ ဘာတွေပြောနေလဲဆိုတာကို ဟိုးတုန်းက ဘုရင်တွေဟာ ရုပ်ဖျက်ပြီး စနည်းနာတယ်ဆိုပဲ။ ခုခေတ်တော့ ဟိုတုန်းကလို ရုပ်ဖျက်စရာ မလိုပါဘူး။ ရုပ်ဖျက်လို့လည်း မရပါဘူး။ လဒချီသွားတာတောင် မှတ်မိနေတဲ့ ရုပ်တွေပါ။

ဒါပေမဲ့ အနားကလူတွေ ပြန်မပြောရင် သူတို့မသိနိုင်ဘူးခင်ဗျ။ ဒီတော့ ဇာဂနာတို့က သတင်း စုဆောင်းပေးရမယ်၊ ပြောပေးရမယ်၊ ဝေဖန်ပေးရမယ်ခင်ဗျ။ ဒါဘယ်သူကမှ ပေးတဲ့တာဝန်မဟုတ်ပါဘူး။ နိုင်ငံသားတစ်ယောက်အနေနဲ့ရော ကိုယ်တင်ထားတဲ့ အစိုးရ ဖြစ်နေတာရောကြောင့် လခမယူဘဲ၊ တာဝန်ယူရတာပေါ့လေ။

ဒါကို တချို့က မသိကြဘူးခင်ဗျ။ ဖေ့စ်ဘွတ်ခ်တွေပေါ်ကနေ ဇာဂနာ ဘာပြန်ပြောပြီ၊ မင်းက ဘာကောင်လဲ စသဖြင့် စသဖြင့်တွေနဲ့ လာလာဆဲကြတယ်ခင်ဗျ။ ဇာဂနာကလည်း မရှင်းဘူး။ ရှင်းတဲ့ အလေ့အထလည်း မရှိဘူးခင်ဗျ။ ကိုယ်လုပ်ရမှာကို ကိုယ်တန်းတန်းမတ်မတ်ပဲ လုပ်ပါတယ်။

တစ်ခုတော့ ရှိတယ်ခင်ဗျာ။ ရန်ကုန်မှာ ကားကြပ်တယ်။ ကားလမ်းပိတ်တယ်။ ဒါလူတိုင်း သိပါတယ်။ လမ်းဘေးဈေးသည် ပြဿနာလည်း သိကြပါတယ်။ မသိကြတာက ယာဉ်ရပ်နားစခန်းကိစ္စပါ။ ဘယ်နား ကားရပ်ကြရမလဲ။ ရပ်စရာလုပ်ပေးထားရက်နဲ့ မရပ်ရင် ဘာလုပ်ကြမလဲ။ ဒါက တကယ်ပြဿနာပါ။ ဟောခုဆို ရှင်စောပုလမ်းက MEP ဆိုတာ အခိုင်အမာဆောက်ထားတဲ့ ဘက်စုံသုံး နေရာကြီးပါ။ အကယ်ဒမီပေးပွဲလည်း အဲဒီမှာလုပ်ပါတယ်။ 2NE1 လည်း အဲဒီမှာ သီချင်းဆိုပါတယ်။ ခုအဲဒီနေရာကြီးလည်း ဖျက်ရတော့မယ်။ ဖယ်ရတော့မယ်။ ရန်ကုန်တိုင်း အစိုးရက ဖယ်ခိုင်းတာပါ။ အများနဲ့ သက်ဆိုင်တဲ့နေရာ၊ ယာဉ်ရပ်နား စခန်းလုပ်မယ့်နေရာလို့ ဆိုပါတယ်။ ဇာဂနာ သိပ်ကြိုက်တာပေါ့ခင်ဗျာ။ ကားတွေလည်း တကယ်ရပ်ဖို့ လိုပါတယ်။ မရပ်ရင်လည်း ပြတ်ပြတ်သားသား အရေးယူဖို့ လိုပါတယ်။ နောက်ပြီး စိန်ဂျွန်း ဈေးဟောင်းနား ယာဉ်ရပ်နားစခန်းလည်း မေ့နေကြသလားလို့ မေးချင်ပါတယ်။ အကောင်အထည်ဖော်ပါဦးခင်ဗျ။ လုပ်စရာရှိ ပြတ်ပြတ်လုပ် အရေးယူစရာရှိလည်း မထောက်မညှာသာယူပါခင်ဗျာ။ စကားမစပ် ၃၅ လမ်းထိပ်မှာတော့ လမ်းဘေးဈေးသည်တွေ ဈေးရောင်းကောင်းတုန်းပါပဲခင်ဗျာ။

မြန်မာပြည်အနှံ့ သွားနေရတော့ နောက်သတင်းလေးတစ်ခုလည်း ပြောချင်ပါတယ်။ စင်ကာပူကျွန်းရောက် ပါရမီရှင်တွေကတော့ သိပြီးတတ်ပြီး ဖြစ်မှာပါ။ ဒီလိုပါခင်ဗျ။ ရှမ်းပြည်မှာ ဂေါ်ဖီထုပ်တစ်ထုပ်ကို မြန်မာငွေ လေးဆယ့်ငါးကျပ်နဲ့ ဘယ်နေရာမှာ ၀ယ်ဝယ်လိုသလောက် ၀ယ်လို့ရပါတယ်။ အဲဒီဂေါ်ဖီထုပ်က ရန်ကုန်မှာ တစ်ထောင့်နှစ်ရာ တိတိပေးဝယ်ရပါတယ်ခင်ဗျာ။ ဒါအနိမ့်ဆုံး ဥပမာပါ။ ရှမ်းပြည်နဲ့ ရန်ကုန် အဲသလောက် ဈေးမကွာခြားသင့်ပါဘူး။ ဆည်တွေမြောင်းတွေ မပါသေးဘူးနော်။ ပိုဆိုးတာကတော့ တရုတ်က ကြက်သွန်နီဥကို ရန်ကုန်မှာ နှစ်ထောင်ကျပ်နဲ့ ၀ယ်လို့ရတယ်ခင်ဗျာ။ မြန်မာပြည် တောင်သာကထွက်တဲ့ ကြက်သွန်နီ ဥကျတော့ လေးထောင်တဲ့ခင်ဗျာ။ တစ်ခုခုများ လွဲနေသလားလို့ တရုတ်နဲ့ ရန်ကုန်ပိုပြီး ရင်းနှီးနေသလိုပဲနော်။ ဟုတ်ကဲ့ခင်ဗျ။ လူတိုင်း နေ့တိုင်းစားနေသောက်နေရတဲ့ ပစ္စည်းလေးတွေက ပိုပြီးအရေးကြီးမယ်လို့ ထင်မိတာမမှားပါဘူး။ တော်ကြာနေ ဇာဂနာက Nagative ပြောတယ်တို့၊ အကောင်းမမြင်ဘူးတို့ဆိုပြီး စင်ကာပူကနေ လာကန်နေမှာ ကြောက်လွန်းလွန်းလို့။
ဘာပဲဖြစ်ဖြစ်လေ၊ ဇာဂနာလည်း ဒါတွေကြောင့် မရီရတော့ပါဘူး။
ဇာဂနာ

Category: 

Share