ရုပ်ရှင်ရုံ ၁၀၀ တည်ဆောက်မည့် စီမံကိန်းတွင် ရုပ်ရှင်ရုံ ၁၀ ရုံ စတင်တည်ဆောက်ပြီးစီး

ရုပ်ရှင်ရုံ ၁၀၀ တည်ဆောက်မည့်စီမံကိန်း၌ တည်ဆောက်ပြီးစီးသွားခဲ့သော ရုပ်ရှင်ရုံများ၏ အားနည်းချက် များကို ရှာဖွေစိစစ်ကာ အခြားဒေသများတွင် ရုပ်ရှင်ရုံများကို ဆက်လက်တည်ဆောက်သွားမည်ဖြစ်ပြီး လက်ရှိ တွင် ရုပ်ရှင်ရုံ ၁၀ ရုံတည်ဆောက် ပြီးစီးသွားပြီဖြစ်ရာ လာမည့်နှစ်အတွင်း ဖွင့်လှစ်နိုင်ရန် ခန့်မှန်းထားကြောင်း အဆိုပါစီမံကိန်း၏ ဒါရိုက်တာဖြစ်သူ ဦးဇာဂနာက ပြောသည်။

“တည်ဆောက်ပြီးစီးသွားတဲ့ ရုပ်ရှင်ရုံတွေဖွင့်လှစ်နိုင်ဖို့ သက်ဆိုင်ရာ တိုင်းနဲ့ပြည်နယ်အစိုးရထံကို တင်ပြ ထားပါတယ်။  တကယ်တမ်း ခရစ်စမတ်လောက်ကတည်းက စဖွင့်ချင်ပေမယ့် မဖွင့်လှစ်နိုင်တော့ဘဲ ဇန်န၀ါရီလလောက်မှ ဖွင့်လှစ်နိုင်ဖို့ ခန့်မှန်းထားပါတယ်။ ဖွင့်ခွင့်ရဖို့အတွက် ခွင့်ပြုချက်ကို စောင့်နေတာပါ”ဟု ၄င်းကပြောသည်။

လက်ရှိ တည်ဆောက်ပြီးစီးသွားသော ရုပ်ရှင်ရုံများမှာ မှော်ဘီ၊ အောင်ပန်း၊ မော်လမြိုင်၊ ဘီးလင်း၊ မုံရွာ၊ သထုံ အစရှိသည့် မြို့များတွင်ဖြစ်ပြီး အဆိုပါရုပ်ရှင်ရုံ ၁၀၀ စီမံကိန်းအတွက် ငွေကြေးပံ့ပိုးမှုကို ကမ္ဘောဇကုမ္ပဏီမှ အဓိကပံ့ပိုးကူညီခြင်းဖြစ်ကာ အနုပညာရှင်အချို့၏ ရှယ်ယာများလည်း ပါဝင်ကြောင်း သိရသည်။

 ရုပ်ရှင်ရုံ ၁၀၀ စီမံကိန်းကို MAZE ကုမ္ပဏီက တာဝန်ယူတည်ဆောက်ခြင်းဖြစ်ပြီး ရရှိလာမည့် အကျိုးအမြတ် ၅ ရာခိုင်နှုန်းကိုလည်း ငါးနှစ်အတွင်း မြန်မာနိုင်ငံရုပ်ရှင်အစည်းအရုံးသို့ လှူဒါန်းသွားမည်ဖြစ်ကြောင်း သိရသည်။            

ဇင်မင်း

 

Category: 

Share