ဆင်ဆာဖြတ်တောက်ထားသည့် ဇာတ်ကားများကို ပြန်လည်စိစစ်ပေးရန် ရုပ်ရှင်အစည်းအရုံးဥက္ကဋ္ဌ ဦးလူမင်း တောင်းဆို

ယခင်အစိုးရလက်ထက်က ကျင့်သုံးခဲ့သည့် ရုပ်ရှင်ဆင်ဆာအဖွဲ့ဆက်ရှိနေမည်ဆိုပါက ဆင်ဆာဖြတ်တောက်ရန် ညွှန်ကြားထားသည့် ဇာတ်ကားများကို ပြန်လည်စိစစ်ပေးရန် ပြန်ကြားရေးဝန်ကြီးဌာန ပြည်ထောင်စုဝန်ကြီး ဒေါက်တာဖေမြင့်ကို ပြောကြားခဲ့သည်ဟု မြန်မာနိုင်ငံရုပ်ရှင်အစည်းအရုံးဥက္ကဋ္ဌ ဦးလူမင်းက ပြောသည်။

“ဆင်ဆာအဖွဲ့မရှိရေးဆိုတဲ့ ကိစ္စမှာ လက်ရှိဆင်ဆာအဖွဲ့ဟာ လက်ရှိတည်ဆဲဥပဒေအရ ဖွဲ့ထားတာဖြစ်လို့ ဆင်ဆာအဖွဲ့ကို ဖျက်သိမ်းချင်တယ်ဆိုရင် ဒီအဖွဲ့ကိုဖွဲ့စည်းထားတဲ့ဥပဒေကို အရင်ပြင်ဆင်ဖို့လိုတယ်လို့ ပြည်ထောင်စုဝန်ကြီး ဒေါက်တာဖေမြင့်က ပြောတယ်။ ဆင်ဆာဖြတ်တောက်မှုတွေနဲ့ ပတ်သက်လို့ လတ်တလောမှာ ဆင်ဆာအဖွဲ့ကြီးရှိဦးမယ်ဆိုရင်လည်း ကျွန်တော်တို့ တောင်းဆိုတာက ဖြတ်တောက်ဖို့ ညွှန် ကြားချက်ထွက်ပြီးသား ဇာတ်ကားတွေက ဖြတ်တောက်ထားတဲ့ အချက်တွေကို ပြန်လည်သုံးသပ် ပြန်ဆင်ပေးဖို့၊ ရှေ့လျှောက်ကိုလည်း ဆင်ဆာအဖွဲ့အနေနဲ့ လွတ်လပ်မှု၊ တရားမျှတစွာ တန်းတူညီမျှမှုနဲ့အညီ လွတ်လပ်ခွင့်ကို ပြည့်ပြည်၀၀ပေးဖို့ ပြောခဲ့ပါတယ်”ဟု ဦးလူမင်းက ပြောသည်။

ဆင်ဆာအဖွဲ့အနေဖြင့် ဆင်ဆာဖြတ်တောက်ရာတွင် တန်းတူညီမျှစွာ ဆောင်ရွက်သင့်ကြောင်းလည်း အကယ်ဒမီ ဦးကျော်သူက ပြောခဲ့သည်။
“မြန်မာ့ယဉ်ကျေးမှုနဲ့ မကိုက်ညီတဲ့ဇာတ်ကားတွေနဲ့ နိုင်ငံတော်ကို ထိခိုက်စေမယ့် ဇာတ်ကားတွေဆိုရင်တော့ ဆင်ဆာအဖွဲ့ ရှိသင့်တယ်။ မြန်မာ့ယဉ်ကျေးမှုနဲ့ မကိုက်ရင် ပြည်သူက ရှုတ်ချမှာပဲ။ ဆင်ဆာဖြတ်တောက် မှုမှာလည်း တစ်ပြေးညီ ဖြတ်သင့်တယ်။ ဟို ကားကျ ဖြတ်၊ ဒီကားကျမဖြတ် မလုပ်သင့်ဘူး”ဟု ဦးကျော်သူက ပြောခဲ့သည်။

လက်ရှိ ကျင့်သုံးနေဆဲဖြစ်သည့် ဆင်ဆာအဖွဲ့ ရှိသင့် မရှိသင့်ကိစ္စနှင့် ပတ်သက်ပြီး ဒီဇင်ဘာ ၉ ရက်နေ့က ရုပ်ရှင်လောကသားအချို့နှင့် ပြန်ကြားရေးဝန်ကြီး ဒေါက်တာဖေမြင့်တို့ ရုပ်ရှင်အစည်းအရုံးတွင် တွေ့ဆုံဆွေးနွေး ခဲ့ကြကြောင်း သိရသည်။

 

Category: 

Share