မြန်မာနိုင်ငံတွင် ငါးနှစ်အတွင်းအိမ်ရာ ၁.၈ သိန်းအထိ အကောင်အထည်ဖော်သွားမည်ဟု ဆောက်လုပ်ရေးဝန်ကြီးဌာန ပြည်ထောင်စုဝန်ကြီးပြောကြား

ပြည်တွင်း၌ အိမ်ရာကဏ္ဍ ဖွံ့ဖြိုးရေးအတွက် ၅ နှစ်အတွင်း အိမ်ရာပေါင်း ၁.၈ သိန်းအထိ အကောင်အထည်ဖော် ဆောင်ရွက်နိုင်ရန် မျှော်မှန်းထားကြောင်း ဆောက်လုပ်ရေးဝန်ကြီးဌာန ပြည်ထောင်စုဝန်ကြီး ဦးဝင်းခိုင်က ရန်ကုန်တိုင်းဒေသကြီး ဒဂုံဆိပ်ကမ်းမြို့နယ်၊ ဧရာဝဏ်ရတနာ မြို့ပြဖွံ့ဖြိုးရေးစီမံကိန်း အပိုင်း (၁) ဖွင့်လှစ်ခြင်းအခမ်းအနားတွင် ပြောကြားခဲ့သည်။

မြန်မာနိုင်ငံ၏ အိမ်ရာဖွံ့ဖြိုးရေးအတွက် ယခုဘဏ္ဍာနှစ်မှ စတင်ကာ ၂၀၂၀-၂၀၂၁  ခုနှစ်အထိ ငါးနှစ်အတွင်း အိမ်ရာစီမံကိန်းများ ရေးဆွဲထားရာ စုစုပေါင်း အိမ်ရာ ၁.၈ သိန်းအထိ အကောင်အထည်ဖော် ဆောင် ရွက်သွားမည်ဖြစ်ကြောင်းနှင့် ရန်ကုန်တိုင်းဒေသကြီးအတွင်းတွင်လည်း ၂၀၁၆-၂၀၁၇ မှ ၂၀၁၇ -၂၀၁၈ ခုနှစ်အထိ နှစ်နှစ်အတွင်း တန်ဖိုးနည်းအိမ်ရာ အခန်းပေါင်း ၈၀၀၀ ကျော်ကို ဦးစားပေးဆောက်လုပ်သွားရန် စီစဉ်ထားကြောင်း သိရသည်။

“တန်ဖိုးနည်းအိမ်ရာတွေကို အိမ်ခန်းတစ်ခန်းကို ကျပ်သိန်း ၁၀၀ နဲ့ ရောင်းချပေးနိုင်ဖို့ စီမံကိန်းကုန်ကျစရိတ်ကို တန်ဖိုးမြင့်စီမံကိန်းမှ တန်ဖိုးနည်းစီမံကိန်းသို့ စိုက်ထုတ်ကျခံပေးမည့် နည်းလမ်းဖြင့် ဆောင်ရွက်သွားမှာဖြစ်တယ်” ဟု ဦးဝင်းခိုင်က ပြောသည်။

ယင်းအပြင် ပြည်ထောင်စုဝန်ကြီးက ဆောက်လုပ်ရေးဝန်ကြီးဌာနအနေဖြင့် ဆောက်လုပ်ရေး အိမ်ရာဖွံ့ဖြိုးရေးဘဏ်အား ၂၀၁၄ ခုနှစ်တွင် ထူထောင်ခဲ့ပြီး သိန်း ၁၀၀ အောက် တန်ဖိုးနည်းအိမ်ရာများအား ပြည်သူလူထုထံမှ ကနဦး ၃၀ ရာခိုင်နှုန်းပေးသွင်းစေပြီး ၇၀ ရာခိုင်နှုန်းအား ဆောက်လုပ်ရေးနှင့် အိမ်ရာဖွံ့ ဖြိုးရေးဘဏ်နှင့် ချိတ်ဆက်ကာ လစဉ် (၈ နှစ်၊ ၁၀ နှစ်၊ ၁၂ နှစ်၊ ၁၅ နှစ်) အရစ်ကျပေးဆပ်သည့် စနစ်ဖြင့် ဆောင်ရွက်နေကြောင်း ပြောကြားခဲ့သည်။
အစိုးရနှင့် ပုဂ္ဂလိကကုမ္ပဏီတို့ ပူးပေါင်းဆောက်လုပ်သည့် ရတနာနှင်းဆီ အဆင့်မြင့်အိမ်ရာ ၁၈ ထပ် အဆောက်အဦသစ် စီမံကိန်း မိတ်ဆက်ဖွင့်ပွဲအခမ်းအနားအား နိုင်ငံတော်အတိုင်ပင်ခံပုဂိ်္ဂုလ် ဒေါ်အောင်ဆန်းစု ကြည်ကိုယ်တိုင် တက်ရောက်ခဲ့ပြီး ပြည်တွင်း၌ ပြည်သူများ အဆင့်ရှိ တန်ဖိုးရှိသည့် အိမ်ရာများတွင် နေထိုင်နိုင်ရေးအတွက် ပုဂ္ဂလိက ကုမ္ပဏီများ ၀ိုင်းဝန်းကူညီရန် အတိုင်ပင်ခံပုဂိ်္ဂုလ်က တိုက်တွန်းပြောကြားခဲ့သည်။

ရန်ကုန်မြို့တွင် ကျပ်သိန်း ၁၀၀ ကျော် တိုက်ခန်းပေါင်း ၈၀၀ ကျော်အား သန်လျင်၊ ဒဂုံ ဆိပ်ကမ်းနှင့် လှိုင်သာယာမြို့နယ်တို့ရှိ မြေကွက်များတွင် နှစ်နှစ်အတွင်း အကောင်အထည်ဖော် ဆောင်ရွက်သွားမည်ဖြစ်ပြီး လက်ရှိတွင် ဆောက်လုပ်မှုအတွက် တင်ဒါခေါ်ယူထားကြောင်း သိရသည်။

ပုံစာ - ယခုလ ၂၄ရက်နေ့က ပြုလုပ်ခဲ့သည့် ဧရာဝဏ်ရတနာ မြို့ပြဖွံ့ဖြိုးရေးစီမံကိန်း ဖွင့်ပွဲသို့ ဒေါ်အောင်ဆန်းစုကြည် တက်ရောက်ခဲ့စဉ်

 

Category: 

Share