၂၀၁၆ ခုနှစ်ကို ဘတ်စ်ကားဖြင့် ဖြတ်သန်းလာခဲ့သည် - ဇော်သက်ထွေး

အစိုးရသစ် သက်တမ်းသည် ငါးပုံတစ်ပုံကို ရောက်ရှိလာခဲ့ပြီ ဖြစ်သည်။ ၂၀၁၅ ခုနှစ် နိုဝင်ဘာ လ ၈ ရက်နေ့က ကျင်းပခဲ့သော အထွေထွေရွေးကောက်ပွဲတွင် နိုင်ငံသားအများစုက အနာဂတ်အတွက် မျှော်လင့်ချက် မြောက်မြားစွာဖြင့် အမျိုးသားဒီမိုကရေစီအဖွဲ့ချုပ်ကို ပုံအောမဲထည့်ပေးခဲ့သည်။ ထို့ကြောင့် NLD ဦးဆောင်သော အစိုးရ၊ NLD ဦးဆောင်သော လွှတ်တော်၊ NLDက စိတ်တိုင်းကျ ရွေးချယ်ပေးလိုက်သော ပြည်နယ်နှင့် တိုင်းဒေသကြီး ၀န်ကြီးချုပ်များဖြင့် နိုင်ငံတော်သစ်ကို အစပြုခဲ့သည်။

တစ်နှစ်ကြာလာသောအခါ အစိုးရသစ်အပေါ် ယုံကြည်အားကိုးစိတ်ဖြင့် မဲပေးခဲ့ကြသော မဲဆန္ဒရှင်များထံမှ အသံဗလံများ ထွက်ရှိလာသည်။ အကြီးစားလုပ်ငန်းရှင်များနှင့် အလယ်အလတ်စား လုပ်ငန်းရှင်များက လုပ်ငန်းဆောင်တာများ ဆောင်ရွက်ရာတွင် လာဘ်ပေးရန် မလိုသော်လည်း ဆုံးဖြတ်ချက်နှင့် ခွင့်ပြုမိန့်များကို စောင့်ဆိုင်းရသည်မှာ ယခင်အစိုးရထက် ပိုကြာလာသည်ဟူ၍ ဖြစ်သည်။ ယခင်အစိုးရလက်ထက်က ခွင့်ပြုခဲ့သော စီမံကိန်းများကို ပွင့်လင်းမြင်သာမှုမရှိဟုဆိုကာ အစိုးရက  ပြန်လည်သုံးသပ်သည်။ ထိုအခြေအနေတွင် လွှတ်တော်ကလည်း ထိုစီမံကိန်းနှင့်ပတ်သက်ပြီး သူတို့၏ လုပ်ငန်းအစီအစဉ်ကို တစ်မျိုးပြောပြန်သည်။ အစိုးရနှင့် လွှတ်တော်၏ ကွဲပြားခြားနားသောအမြင်ကို ပေါင်းစပ်မရသည့်အတွက် အကြီးစားစီမံကိန်းများမှာ ရှေ့တိုးမရ၊ နောက်ဆုတ်မရ ဖြစ်နေသည်။ စီမံကိန်းခွင့်ပြုချက် ရရှိထားသည့် လုပ်ငန်းရှင်များက ရှင်းရှင်းလင်းလင်း ရမရသိချင်နေသည့်အတွက် သက်ဆိုင်ရာ ပြည်နယ်နှင့် တိုင်းဒေသကြီး အစိုးရများသို့ တင်ပြမေးမြန်းသည်။ ထိုသို့မေးမြန်းရာတွင် ရေရာတိကျသော အဖြေများမရရှိပေ။ သို့သော် တိုင်းဒေသကြီးအစိုးရ ကွဲသွားသော်လည်း ပုံစံတူသော အဖြေများကတော့ အတူတူပင်ဖြစ်သည်။ ထိုအဖြေများမှာ “ပြည်ထောင်စုအစိုးရကို မေးကြည့်ရဦးမယ်”၊ “ဥပဒေနဲ့အညီလုပ်မှရမယ်၊ မဟုတ်ရင် ကျွန်တော်တို့ အစိုးရအဖွဲ့ကို အဝေဖန်ခံရမယ်”၊ “နိုင်ငံတော် အတိုင်ပင်ခံပုဂိ်္ဂုလ်ရဲ့ မှတ်ချက်ရရင် ကောင်းမယ်”၊ “ဆုံးဖြတ်ချက် မှားသွားရင် ကျွန်တော်တို့ပဲ ဒုက္ခရောက်မယ်” “အရင်အစိုးရ လုပ်ခဲ့တာတွေကို ပြန်ဖြည်နေရတုံးဗျ” “အုပ်ချုပ်ရေးပိုင်းကို ကျေညက်အောင် လေ့လာနေရတုံးပဲ” ဆိုတာမျိုးပင်ဖြစ်သည်။ ဒီကြားထဲတွင် အစိုးရ၀န်ထမ်းများ၏ Mindset က လုံးဝမပြောင်း၊ ယခင် အစိုးရလက်ထက်က အချိုးမျိုးပင် ဖြစ်သည်။

ယခုနှစ်တွင် လယ်ယာစိုက်ပျိုးရေး ထုတ်ကုန်ကို အဓိကထားသော မြန်မာနိုင်ငံ၌ ဆန်စပါးသီးနှံ တင်ပို့မှုက ကျဆင်းလာခဲ့သည်။ မြန်မာနိုင်ငံတွင် ကျွန်းသစ်အပါအ၀င် နိုင်ငံခြားသို့တင်ပို့သော သစ်မာများကို အလုံးလိုက် တင်ပို့မှု ရပ်ဆိုင်းလိုက်ချိန်တွင် နိုင်ငံတကာ၌ သစ်ရှားပါးသွားသည့်အတွက် အိမ်နီးချင်းနိုင်ငံများမှ သစ်တင်ပို့သူများ တွက်ခြေကိုက်သွားသည်။ ဗီယက်နမ် တစ်နိုင်ငံတည်းမှာပင် နိုင်ငံတကာသို့ သစ်တင်ပို့မှုမှ ၀င်ငွေ အမေရိကန် ဒေါ်လာ ၇ ဒသမ ၃ ဘီလီယံ ရရှိသွားသည်။ ရင်းနှီးမြှုပ်နှံမှုဥပဒေကလည်း မထွက်သေး၍ နိုင်ငံတကာမှ ရင်းနှီးမြှုပ်နှံသူများ ၀င်လာရန် တွန့်ဆုတ်နေဆဲဖြစ်သည်။ ခရီးသွားလုပ်ငန်းကလည်း ယမန်နှစ်ကိုမီရန် မနည်းရုန်းကန်ကြိုးစားနေရသည်။ ယခုနှစ်ထဲမှာပင် ရခိုင်ပြည်နယ်၌ လူ့အဖွဲ့အစည်း နှစ်ခုအကြား ဖြစ်ပွားခဲ့သော ပဋိပက္ခကို အကြောင်းပြု၍ လူ့အခွင့်ရေးအဖွဲ့များက မြန်မာနိုင်ငံကို ပြင်းပြင်းထန်ထန် ရှုတ်ချလျက်ရှိသည်။ နိုင်ငံတကာ မီဒီယာများက ငြိမ်းချမ်းရေးနိုဘယ်ဆုရှင် ဒေါ်အောင်ဆန်းစုကြည်ကို ဝေဖန်တိုက်ခိုက်လာသည်။ ယခင်အစိုးရ လက်ထက်က ကြိုးစားပမ်းစား တည်ဆောက်နေသော ပြည်တွင်း ငြိမ်းချမ်းရေးမှာ ပိုမိုတိုးတက်မလာသည့်အပြင် နောက်ပြန်လျှောကျနေသည်။ တိုင်းရင်းသားလက်နက်ကိုင် အဖွဲ့အစည်းများက အစိုးရသစ်အား စစ်ရေးနှင့်နိုင်ငံရေးအရ ဖိအားပေးနေသဖြင့် အစိုးရသစ်မှာ တပ်မတော်နှင့် တိုင်းရင်းသား လက်နက်ကိုင်အဖွဲ့များ အကြားတွင် ပိတ်မိနေသည်။ လွှတ်တော်၏ ဥပဒေပြုရေး ဆောင်ရွက်ချက်များက နှောင့်နှေးလျက်ရှိသည်။ မီဒီယာသမားများက လွတ်လပ်စွာ ရေးသားခွင့်ကို ခြိမ်းခြောက်လျက်ရှိသော ဆက်သွယ်ရေးဥပဒေ ပုဒ်မ ၆၆(ဃ)ကို ပြင်ဆင်ပေးရန် လိုလားလျက်ရှိသော်လည်း အစိုးရသစ်နှင့် ဥပဒေပြုရေးမဏ္ဍိုင်က တက်ကြွမှုမရှိသဖြင့် စိတ်ပျက်လျက်ရှိသည်။
 
ထိုသို့သော ပြဿနာများ ကြားထဲတွင် လူသတ်မှုများ၊ သက်ငယ်မုဒိမ်းမှုများ၊ မူးယစ်းဆေးဝါး ပြဿနာများက ယခုနှစ်ထဲတွင် ပို၍မြင့်တက်လာသည်။ မူးယစ်ဆေးဝါးဖမ်းဆီးရရှိမှု အခြေအနေမှာ ယခုနှစ်ထဲတွင် စံချိန်တင်သွားသည်။ ငွေကြေးပမာဏမှာ အမေရိကန်ဒေါ်လာဖြင့် တွက်လျှင်ပင် မနည်းမနော။ ထိုအခြေအနေ၌ ပြည်သူ့ရဲတပ်ဖွဲ့၏ မှုခင်းများအပေါ် ဖော်ထုတ်မပေးနိုင်သည့် အရေအတွက် များပြားလာသဖြင့် အရည်အသွေး ကျဆင်းနေပြီလောဟု မေးခွန်းများထုတ်လာကြသည်။ ဒေါ်လာဖြင့် လဲလှယ်သည့် မြန်မာကျပ်ငွေတန်ဖိုးမှာ ဆယ်စုနှစ်အတွင်း အမြင့်ဆုံးသို့ ရောက်ရှိသွားသည်။ မြန်မာကျပ်ငွေ ဖောင်းပွလာသောကြောင့် အခြေခံပြည်သူ လူထုအတွက် မရှိမဖြစ်သော စားသောက်ကုန်များ၊ အိမ်သုံးဆေးဝါးများ ဈေးတက်ကုန်သည်။

 ရန်ကုန်မြို့၏ သယ်ယူပို့ဆောင်ရေးတွင် အသက်မွေးဝမ်းကျောင်း ပြုနေသော ဘတ်စ်ကားများ၊ တက္ကစီများ၊ ဆိုင်ကယ် တက္ကစီများမှာလည်း စက်သုံးဆီဈေးနှုန်း မြင့်တက်သွားသည့်အတွက် နေ့စဉ်ဝင်ငွေမှာ ထိခိုက်လာသည်။ ဒီကြားထဲတွင် ကားဝယ်ယူတင်သွင်းရာ၌ Free Permit ဖြင့် တင်သွင်းရသော ကားဝယ်ယူခွင့်ကို ပိတ်ပင်လိုက်သည့်အတွက် ကားဈေးမှာ နှစ်ကုန်ခါနီး ရက်ပိုင်းအတွင်း ရုတ်တရက် မြင့်တက်သွားသည်။ ထိုသို့ပြုလုပ်ရခြင်းမှာ ပြည်တွင်းငွေကြေး ဈေးကွက်ထဲ၌ ဒေါ်လာဝယ် ယူစုဆောင်း၍ မော်တော်ကား တင်သွင်းမှုကို တားဆီးလို၍ဟုဆိုသည်။ ခြုံ၍သုံးသပ်ရလျှင် အစိုးရသစ် လက်ထက်၌ ပြည်သူများမျှော်မှန်းထားသော စားဝတ်နေရေး ချောင်လည်မှု၊ ၀င်ငွေတိုးတက်မှုနှင့် စိတ်အေးချမ်းသာစွာ တရားဥပဒေစိုးမိုးရေးအောက်၌ အသက်မွေးဝမ်းကျောင်းပြုရမှုတို့မှာ ဖြစ်မလာသေးသည်ကို တွေ့ရသည်။ အစိုးရအဖွဲ့၏ ဆောင်ရွက်ချက်များမှာ မြန်မာ့ဆိုရှယ်လစ် လမ်းစဉ်ပါတီခေတ်ကလို “မလုပ်၊ မရှုပ်၊ မပြုတ်” ဇာတ်လမ်းခင်းလျက်ရှိသည်။ ထို့ကြောင့် သီအိုရီအရ အင်မတန်ကောင်းသော လုပ်ငန်းစဉ်များကို ချမှတ်ထားသော်လည်း မြေပြင်အခြေအနေတွင် ရလဒ်ကောင်း မရရှိခြင်းဖြစ်သည်။ လွှတ်တော် ကိုယ်စားလှယ်များ၏ ဥပဒေရေးရာ ကျွမ်းကျင်နှံ့စပ်မှုကလည်း သံသယဖြစ်စရာ။ မြို့ပြစီမံကိန်းတစ်ခု၏ ရှင်းလင်းပွဲတွင် တိုင်းဒေသကြီးလွှတ်တော် ကိုယ်စားလှယ်တစ်ဦးက ပုံစံ(၇) ပိုင်ဆိုင်သော တောင်သူကို ဈေးပိုပေးပြီး မြေနုကျွန်းပိုင်ဆိုင်သော တောင်သူကို ဈေးနှိမ်ခြင်းသည် တောင်သူအချင်းချင်းကို သွေးခွဲရာရောက်သည်ဟု ထပြောသည်။ မြေနုကျွန်း၏ စီမံခန့်ခွဲပိုင်ခွင့်မှာ နိုင်ငံတော်၏ အာဏာအောက်တွင် ရှိနေသည်ကို လုံးဝမသိ။ ထိုအခြေအနေများက ပြည်သူလူထု၏ အသံကိုနားထောင်၍ ဥပဒေပြုရေး ဆောင်ရွက်နေရသည့် အခန်းကဏ္ဍအတွက် ရင်လေးစရာဖြစ်သည်။

မည်သို့ပင်ဖြစ်စေ လက်ရှိ အစိုးရနှင့်လွှတ်တော်သည် မြန်မာနိုင်ငံသားအများစုက ထောက်ခံ၍ ရွေးချယ် ခန့်အပ်လိုက်သောသူများ ဖြစ်သည်။ ထို့ကြောင့် ၂၀၁၅ ကဲ့သို့ Lexus ကားစီးချင်သော်လည်း ၂၀၁၆ ခုနှစ်ကို အင်ဂျင်ကျ၍ သံချေးကိုက်နေသော ဘတ်စ်ကားကြီးဖြင့် ဖြတ်သန်းခဲ့ရသည့်တိုင် ကားပြောင်းမစီးဘဲ လမ်းဆုံးအထိ လိုက်ပါသွားရပေလိမ့်မည်။

ဇော်သက်ထွေး

Category: 

Share