ရွှေခွန်ကောက်ခံရာတွင် ပြဿနာအချို့ ရှိလာနိုင်သောကြောင့် ကောက်ခံမည့်အခွန်ပုံစံအား ပြန်လည်ကြေညာ မည်ဟုဆို

၂၀၁၇ အခွန်၊ ဥပဒေအရ ဧပြီ ၁ ရက်မှစ၍ ရွှေထည်၊ လက်ဝတ်၊ ရတနာများကို ၀ယ်ယူသူက အခွန်ပေး ဆောင်ရာတွင် အခွန်ဆောင်ရမည့် ပုံစံများအား ပြည်တွင်းအခွန်ဦးစီးဌာနဘက်က ပြန်လည်ကြေညာပေးမည်ဟု မြန်မာနိုင်ငံ ရွှေလုပ်ငန်းရှင်များအသင်းမှ သိရသည်။

မတ်လ ၁၅ ရက်က နေပြည်တော်တွင်ပြုလုပ်ခဲ့သည့် ပြည်တွင်းအခွန်များဦးစီးဌာနနှင့် မြန်မာနိုင်ငံ ရွှေလုပ်ငန်းရှင်များအသင်းအပါအ၀င် သက်ဆိုင်ရာအသင်းများနှင့် တွေ့ဆုံဆွေးနွေးခဲ့ရာ ရွှေဆိုင်များမှ အခွန် ဆောင်ခြင်းနှင့် ပတ်သက်၍ အသေးစိတ်အခက်အခဲများကို ရှင်းလင်းတင်ပြခဲ့ကြောင်း သိရသည်။

“အန်ကယ်တို့အနေနဲ့ အချက်လေးငါးချက်ကို တင်ပြတယ်။ ဒါလေးတွေကို ဘယ်လို Solution လုပ်သင့်လဲ ပြောပြတယ်။ ဥပမာပြောရရင် အရင်က ၀ယ်ထားတဲ့ရွှေနဲ့ အထည်လာအပ်ရင် အခွန်ဆောင်ဖို့လိုမလို၊ အခွန်ဆောင်ပြီး ၀ယ်ထားတဲ့ ရွှေလာပြန်ရောင်းပြီး အသစ်ပြန်ဝယ်တဲ့အခါ အခွန်ဆောင်ဖို့လိုမလို ဒါမျိုးလေးတွေ ပေါ့။ အန်ကယ်တို့ ဘယ်လိုပုံစံနဲ့ကောက်ယူမလဲပေါ့။ Customer Right ကို ဦးစားပေးတင်ပြတာပါ။ အဓိကက အခြေခံလူတန်းစားတွေ အခက်အခဲမရှိအောင်၊ အန်ကယ်တို့ ရွှေဆိုင်တွေကလည်း ကောက်ရတာ အခက်အခဲ မရှိအောင်၊ နိုင်ငံတော်ဘက်ကလည်း ထိုက်သင့်တဲ့ အခွန်အခတွေ မဆုံးရှုံးရအောင် ဆွေးနွေးတာပေါ့။ ပြည် တွင်းအခွန်ဦးစီးဌာနအနေနဲ့ နောက်မှ ညှိနှိုင်းဆွေးနွေးပြီး ပြန်ဖြေပေးမယ်လို့ပြောတယ်”ဟု မြန်မာနိုင်ငံ ရွှေလုပ်ငန်းရှင်များ အသင်းအတွင်းရေးမှူးဦးကျော်ဝင်းက ပြောသည်။

ထို့ပြင် ဧပြီ ၁ ရက်မှစ၍ ဥပဒေအရ အခွန်ကောက်ခံရာ၌ ရွှေဆိုင်များအနေဖြင့် ပြေစာ(ဘောက်ချာ)များတွင် အခွန်တံဆိပ်ခေါင်းကပ်ရမည်ဖြစ်ပြီး တံဆိပ်ခေါင်းများကို အမြန်ဆုံးရိုက်နှိပ်နေသော်လည်း အချိန်မီမပြီးပါက တံဆိပ်ခေါင်းမကပ်ဘဲ ကောက်ထားရပါမည်ဟု ပြည်တွင်းအခွန်များဦးစီးဌာနဘက်မှ မှာကြားထားကြောင်း သိရသည်။

အခွန်ကောက်ရာတွင် တွင်းထွက်၊ ကျောက်မျက်များသည် အထူးကုန်စည်ဖြစ်သည့်အတွက် ရွှေနှင့်ကွင်းထား သည့် စိန်အစရှိသည့် ကျောက်မျက်လက်ဝတ်ရတနာများ ရောင်းဝယ်ရာတွင် ကျောက်မျက်တန်ဖိုးကို ရောင်း သူ ၅ ရာခိုင်နှုန်း၊ ၀ယ်သူ ၅ ရာခိုင်နှုန်းနှင့် ရွှေတန်ဖိုးကို ၀ယ်သူမှ ၁ ရာခိုင်နှုန်းပေးဆောင်ရမည်ဟု သတ်မှတ်ထားကြောင်းလည်းသိရသည်။

ရွှေရင်ငြိမ်းအေး

 

Category: 

Share