မြန်မာနိုင်ငံတွင် ကလေးအရှင် ၁၀၀၀ မွေးတိုင်း တစ်နှစ်အောက် ၄၀ ဦးနှင့် ငါးနှစ်အောက် ၅၀ ဦး သေဆုံး

မြန်မာနိုင်ငံတွင် ကလေးအရှင် ၁၀၀၀ မွေးတိုင်း တစ်နှစ်အောက် ၄၀ နှင့် ငါးနှစ်အောက် ၅၀ သေဆုံးမှု ရှိကြောင်း ပြည်သူ့ကျန်းမာရေးဦးစီးဌာန ညွှန်ကြားရေးမှူး ဒေါက်တာသက်သက်မူက ပြောသည်။

“အခုကောက်တဲ့စစ်တမ်းအရ အရှင်မွေး ၁၀၀၀ မှာ တစ်နှစ်အောက် ကလေး ၄၀ နဲ့ ငါးနှစ်အောက်ကလေး ၅၀ သေဆုံးနေပါတယ်။ ဆိုလိုတာကတော့ တစ်နှစ်အောက်ကလေး အယောက် ၂၀ မှာ တစ်နှစ်အောက် သေဆုံးမှု တစ်ယောက်နဲ့ ငါးနှစ်အောက် ကလေး ၂၅ ယောက်မှာ တစ်ယောက်သေဆုံးမှုရှိနေတာကို တွေ့ရပါတယ်”ဟု ဒေါက်တာဒေါ်သက်သက်မူက ပြောသည်။

အဆိုပါသေဆုံးမှုစာရင်းသည် ၂၀၁၅-၁၆ မြန်မာနိုင်ငံလူနေမှုဘ၀နှင့် ကျန်းမာရေးဆိုင်ရာ ပင်မအစီရင်ခံစာ အတွက် စာရင်းကောက်ယူမှုအရ သိရခြင်းဖြစ်သည်ဟု ဆိုသည်။

နေပြည်တော် Horizon Lake View Hotel တွင် မတ် ၂၃ ရက် ကျင်းပသည့် မြန်မာနိုင်ငံလူနေမှုဘ၀နှင့် ကျန်းမာရေးဆိုင်ရာ အခြေခံအချက်အလက်စစ်တမ်း ၂၀၁၅-၁၆ ပင်မအစီရင်ခံစာ ထုတ်ပြန်ဆွေးနွေးပွဲအပြီး သတင်းထောက်များနှင့် တွေ့ဆုံစဉ် ၄င်းက အထက်ပါအတိုင်း ပြောကြားခဲ့ခြင်းဖြစ်သည်။

ထိုသို့သေဆုံးမှုအပေါ် ဝေဖန်မှုများနှင့်ပတ်သက်၍ ၄င်းက

လူများ၏သေဆုံးမှုများသည် သဘာဝဖြစ်စဉ်သာ ဖြစ်ပြီး ပြည်သူ့ကျန်းမာရေးဦးစီးဌာနတစ်ခုတည်းနှင့် မသက်ဆိုင်ကြောင်းနှင့် ပြည်သူများကိုယ်တိုင် ပူးပေါင်း ပါဝင်ရမည်ကြောင်း တုံ့ပြန်ပြောကြားခဲ့သည်။
“သေဆုံးရတဲ့ အကြောင်းအရာ အချက်အလက်တွေကတော့ အများကြီးပါ။ ကျန်းမာရေးဝန်ထမ်းတွေ မကောင်းလို့ ဖြစ်တယ်လို့လည်း ပြောလို့မရပါဘူး။ ကျန်တဲ့ ပြည်သူတွေက အကြောင်းကိစ္စဖြစ်လာရင် ဆေးရုံ၊ ဆေးခန်းသွားဖို့ ၀န်လေးနေကြတာတွေလည်း ရှိပါတယ်။ အကြောင်းကြောင်းကြောင့် သွားလို့မဖြစ်ဘူး၊ နီးစပ်ရာ အရပ်လက်သည်နဲ့ မွေးတယ်။ အဖိတ်အစင်ရှိတယ်။ လူတွေရဲ့ သေဆုံးမှုဖြစ်စဉ်တွေဟာ သဘာဝဖြစ်စဉ်ပါ။ ကျန်းမာရေးဝန်ကြီးဌာန တစ်ခုတည်းနဲ့ဆိုင်တာမဟုတ်ပါဘူး။ ပြည်သူတွေ ကိုယ်တိုင်လည်း ပူးပေါင်းပါဝင်ရ ပါမယ်”ဟု ၄င်းကပြောသည်။

မြန်မာနိုင်ငံတွင် ဆေးရုံ၊ ဆေးခန်းများတွင် မွေးဖွားမှုနှုန်းမှာ ၃၇ ရာခိုင်နှုန်းရှိပြီး ကျွမ်းကျင်သူနှင့် မွေးဖွားသူ ၆၀ရာခိုင်နှုန်းရှိကြောင်း သိရသည်။

ထို့ကြောင့် ကျန်းမာရေးဦးစီးဌာနအနေဖြင့် မြို့ရွာများတွင် ဆေးရုံဆေးခန်းများ လိုက်လံဖွင့်လှစ်ခြင်းများ ဆောင်ရွက်ပေးလျက်ရှိကြောင်း သိရသည်။

 ထွန်း (နေပြည်တော်)

Category: 

Share