ရွှေနှင့်တွဲဖက်ထားသည့် ကျောက်မျက်လက်ဝတ်ရတနာ ရောင်းဝယ်ခြင်းအပေါ် အခွန်သုံးမျိုး ပေးဆောင်ရန် သတ်မှတ်

တွင်းထွက်ကျောက်မျက်များသည် အထူးကုန်စည်ဖြစ်သည့်အတွက် ရွှေနှင့်တွဲဖက်ထားသည့် ကျောက်မျက် လက်ဝတ်ရတနာများ ရောင်းဝယ်ရာတွင် ကျောက်မျက်တန်ဖိုး (အထူးကုန်စည်ခွန် ၅ ရာခိုင်နှုန်း၊ ကုန်သွယ် လုပ်ငန်းခွန်)နှင့်  ရွှေအတွက် ကုန်သွယ်လုပ်ငန်းခွန် ၁ ရာခိုင်နှုန်းစသဖြင့် အခွန်သုံးမျိုး ကောက်ခံသွားမည် ဖြစ်ကြောင်း  မြန်မာနိုင်ငံ ရွှေလုပ်ငန်းရှင်များအသင်းမှ သိရသည်။

“ကျောက်မျက်ရတနာတွေဖြစ်တဲ့ ကျောက်စိမ်း၊ ပုလဲ၊ ပတ္တမြား၊ နီလာ၊ မြ၊ စိန် အဲ့လို လက်ဝတ်ရတနာတွေက အထူးကုန်စည်ခွန်ထဲမှာပါတယ်။ အဲဒီအပြင်ကို ကုန်သွယ်လုပ်ငန်းခွန်လည်းပါတယ်။ နှစ်မျိုးလုံးပေါ့။ ဥပမာ-ပတ္တမြားလက်စွပ်တစ်ကွင်းရောင်းမယ်ဆိုရင် အထူးကုန်စည်ခွန်အပေါင်း ကုန်သွယ်လုပ်ငန်းခွန်ပေါ့။ ဒါပေမဲ့ ရွှေ ကျတော့ ၁ ရာခိုင်နှုန်းပဲ။ ဒီတော့ ပစ္စည်းတခုရောင်းရင် ပတ္တမြားအတွက် ကုန်သွယ်လုပ်ငန်းခွန် သီးသန့်တွက်၊ အထူးကုန်စည်ခွန် သီးသန့်တွက်၊ ရွှေအတွက် ကုန်သွယ်လုပ်ငန်းခွန် သီးသန့်ထပ်တွက်၊ အဲ့လို သက်သက်စီ တွက်ရတယ်။ ပေါင်းတွက်လို့မရဘူး။ ဒါ ဥပဒေအရ ပြောတာပေါ့”ဟု မြန်မာနိုင်ငံရွှေလုပ်ငန်းရှင်များအသင်း အတွင်းရေးမှူး ဦးကျော်ဝင်းက ပြောသည်။

ထို့ပြင် ရွှေကို အခွန် ၁ ရာခိုင်နှုန်းသာ ကောက်ခံမည်ဟုဆိုသော်လည်း အခေါက်ရွှေများဖြစ်သော ရွှေစင်၊ ရွှေတုံး၊ ရွှေပြား၊ ရွှေခဲများကိုမူ ကုန်သွယ်လုပ်ငန်းခွန် ၅ ရာခိုင်နှုန်း ကောက်ခံရန် သတ်မှတ်ထားကြောင်း သိရသည်။

“အခွန်ကိစ္စတွေရှိလာလည်း ပုံမှန်ပဲဖြစ်မှာပဲ”ဟု ၄င်းက သုံးသပ်ပြောကြားသည်။

ဧပြီလ ၁ ရက်မှစ၍ ဥပဒေအရ အခွန်ကောက်ခံရာတွင် ရွှေဆိုင်များအနေဖြင့် ပြေစာ (ဘောက်ချာ)များတွင် အခွန်တံဆိပ်ခေါင်းကပ်ရမည်ဖြစ်ပြီး တံဆိပ်ခေါင်းများကို အမြန်ဆုံးရိုက်နှိပ်နေသော်လည်း အချိန်မီမပြီးပါက တံဆိပ်ခေါင်းမကပ်ဘဲ ကောက်ထားရမည်ဖြစ်ကြောင်း ပြည်တွင်းအခွန်များဦးစီးဌာန၏ ထုတ်ပြန်ချက်များအရ သိရသည်။

ရွှေရင်ငြိမ်းအေး

Category: 

Share