တိုင်းရင်းသားများအဖွဲ့တချို့က တောင်းဆိုသည့်ခွဲရေးနှင့်ပတ်သက်၍ တပ်မတော်သားအစုအဖွဲ့မှ ဗိုလ်မှူးကြီးဇော်မင်းထွန်းအား မီဒီယာများက တွေ့ဆုံမေးမြန်းခြင်း

တိုင်းရင်းသားများအဖွဲ့အချို့က ပြည်ထောင်စုမှ ခွဲထွက်ခွင့်ရရေးဆွေးနွေးခဲ့ကြောင်း သိရသည်။ ယင်းကိစ္စအပေါ် တပ်မတော်၏သဘောထားအပါအ၀င် တိုင်းရင်းသားအဖွဲ့များနှင့် ဆွေးနွေးမှုအခြေအနေများကို သိရှိစေရန် တပ်မတော်သားအစုအဖွဲ့မှ ဗိုလ်မှူးကြီးဇော်မင်းထွန်းအား မီဒီယာများက တွေ့ဆုံမေးမြန်းမှုများထဲမှအချို့အား ကောက်နုတ်ဖော်ပြလိုက်ရပါသည်။

မီဒီယာ ။   ။ တိုင်းရင်းသားအဖွဲ့အချို့က ပြည်ထောင်စုကနေ ခွဲထွက်ဖို့ တောင်းဆိုနေတယ်လို့ သိရပါတယ်။ အဲဒီအပေါ်မှာ တပ်မတော်ကိုယ်စားလှယ်အနေနဲ့ ဘယ်လိုမြင်ပါလဲ။
ဖြေ ။   ။ ဟုတ်ပါတယ်။ ကျွန်တော်တို့ ဆွေးနွေးနေတဲ့အထဲမှာ တိုင်းရင်းသားကိုယ်စားလှယ်တချို့က တောင်းဆိုခဲ့တာပါ။ အဲဒီမှာ တိုင်းရင်းသား၊ EAO ဘက်ကလည်း ပြည်ထောင်စုကနေ ခွဲမထွက်ရဘူးဆိုတဲ့ ကိစ္စကို ထည့်ထားခြင်းအားဖြင့် တိုင်းရင်းသားတွေမှာလည်း ပိုမိုစိုးရိမ်စိတ်တွေ ဖြစ်လာနိုင်တယ်လို့ အကြံပြုကြပါတယ်။ ကန့်ကွက်တာမဟုတ်ပါဘူး။ ဒါနဲ့ပတ်သက်ပြီး တပ်မတော်ဘက်ကလည်း ကန့်ကွက်တာ မဟုတ်ဘဲ အကြံပြုဆွေးနွေးခဲ့ပါတယ်။ အဲဒါက မြန်မာနိုင်ငံကို ၁၉၆၂ ခုနှစ်မှာ တပ်မတော်က အာဏာ လွှဲပြောင်းရယူခဲ့တယ်။ အဲဒီမတိုင်ခင် ၁၉၆၁ ခုနှစ်မှာ ရန်ကုန်အသံလွှင့်ရုံးမှာ၊ ဒါနဲ့ပတ်သက်ပြီး ဆွေးနွေးကြတယ်။ အဲဒီတုန်းက အတိုက်အခံပါတီတစ်ခုဖြစ်တဲ့ (ပမညတ) အမတ်ဝိဒူရသခင်ချစ်မောင်က ပြောခဲ့တယ်။ ကျွန်တော်တို့ အခုဆွေးနွေးနေတာ အကုန်လုံးက ကွန်ဖက်ဒရေး ရှင်းဆန်နေတယ်။ အဲဒီလို ကွန်ဖက်ဒရေးရှင်းတွေ ဆန်နေရင် ပြည်ထောင်စုကြီး ပြိုကွဲလိမ့်မယ်လို့ ပြောခဲ့တယ်။ အဲဒီစကားကလည်း သမိုင်းအထောက်အထားအနေနဲ့ရှိတယ်။ ဒါကြောင့် ကျွန်တော်တို့တပ်မတော်အနေနဲ့က ပြည်ထောင်စုကြီး ပြိုကွဲမှာကို စိုးရိမ်ကြောင့်ကြမှုကြောင့် ပြည်ထောင်စုပြိုကွဲသွားရင် တိုင်းရင်းသားစည်းလုံးညီညွတ်မှုမရှိဘူး။ နောက်ဆုံးပြည်သူလူထုပဲ ထိခိုက်နစ်နာမယ်။ ဒါကြောင့် ကျွန်တော်တို့ကလည်း ပြည်ထောင်စုကနေ ခွဲမထွက်သင့်ဘူးလို့ ပြန်လည်အကြံပြုဆွေးနွေးခဲ့ပါတယ်။

မီဒီယာ ။   ။ ဆွေးနွေးပွဲမှာ တိုင်းနဲ့ပြည်နယ်တွေက ခွဲထွက်မယ်ဆိုတဲ့ စကားလုံးက ကြမ်းတယ်။ အစားထိုး စကားတစ်ခုကို ရှာမယ်လို့ ဆွေးနွေးခဲ့တာ အဲဒီကြားစကားကို ရခဲ့ပြီလားဆိုတာ သိချင်ပါတယ်။
ဖြေ ။   ။ ဟုတ်ပါတယ်။ သူတို့ပြောတဲ့ ခွဲမထွက်သင့်ဘူးဆိုတဲ့စကားလုံးက ကြမ်းတယ်။ ဒါကြောင့် အဲ့စကားနေရာမှာ အစားထိုးတဲ့ စကားလုံးကို ရှာရပါတယ်။ စကားလုံးနဲ့လည်း ညှိနှိုင်းရပါတယ်။ အခုလက်ရှိ ဆွေးနွေးနေတဲ့ နိုင်ငံရေးအဖွဲ့တွေရော၊ EAO အဖွဲ့တွေရော၊ အစိုးရအဖွဲ့တွေရော၊ တပ်မတော်သားတွေရော ပူးပေါင်းညှိနှိုင်း အဖြေရှာခဲ့တာ။ အဖြေတစ်ခုတော့ ထွက်လာခဲ့တယ်။ အဲဒါက ပြည်ထောင်စုကနေ ခွဲမထွက်ရေး အစား “ပြည်ထောင်စုကနေ မည်သည့်အစိတ်အပိုင်းဟူသမျှသည် ဥမကွဲသိုက်မပျက် တစ်ပေါင်းတစ်စည်းထဲ နေထိုင်ကြပါမည” ဟု တိုင်းရင်းသားအားလုံးနဲ့ အဖွဲ့အစည်းအားလုံးက သဘောတူညီမှုအကြမ်းတော့ ရခဲ့ပါ တယ်။ အဲဒီအဖြေထွက်လာလိမ့်မယ်လို့လည်း မျှော်လင့်ထားပါတယ်။

မီဒီယာ။   ။ ပြည်နယ်တွေမှာ ကိုယ်ပိုင်ဖွဲ့စည်းပုံ အခြေခံဥပဒေရေးဆွဲဖို့အတွက် ၀င်ရောက်ဆွေးနွေးခဲ့တယ်လို့ သိရပါတယ်။ တပ်မတော်ဘက်ကရော ဒါနဲ့ပတ်သက်လို့ ဆွေးနွေးဖြစ်ပါသလား။ တပ်မတော်ရဲ့ သဘောထားကိုလည်း သိချင်ပါတယ်။
ဖြေ ။   ။ ပြည်နယ်နဲ့တိုင်းတွေမှာ ဖွဲ့စည်းပုံအခြေခံဥပဒေ ရေးဆွဲတာကိုတော့ တပ်မတော်အနေနဲ့ သဘောတူပြီးသားပါ။ သို့သော် ပြည်နယ်ဖွဲ့စည်းပုံ အခြေခံဥပဒေမှန်သမျှသည် ပြည်ထောင်စုရဲ့ ဖွဲ့စည်းပုံ အခြေခံဥပဒေကို ကျော်လွန်လို့မရပါဘူး။ နိုင်ငံတကာမှာလည်း အဲဒီလိုပဲ ပြဋ္ဌာန်းထားပါတယ်။ ပြည်နယ် အခြေခံဥပဒေသည် ပြည်ထောင်စုရဲ့ အခြေခံဥပဒေကို ကျော်၍ မရပါ။ ပြည်ထောင်စု အခြေခံဥပဒေထဲကနေ ဆွဲလို့ရတယ်။ ပြဌာန်းလို့ ရတယ်။ ဒါကြောင့် ဒါနဲ့ပတ်သက်ပြီး တပ်မတော်ဘက်က သဘောတူပြီးသားပါ။ အတည်တော့ မပြုရသေးပါဘူး။

မီဒီယာ ။    ။ တကယ်လို့ ဒီဆွေးနွေးပွဲကနေ တိုင်းရင်းသားတွေက ၂၀၀၈ ဖွဲ့စည်းပုံကို ငြင်းမယ်ဆိုရင် တပ်မတော်နဲ့သဘောထားက ဘယ်လိုရှိပါသလဲ။
ဖြေ ။   ။ ဒါကတော့ ရှင်းပါတယ်။ ၂၀၀၈ ဖွဲ့စည်းပုံ အခြေခံဥပဒေမှာ ပြဌာန်းထားတဲ့ ဖွဲ့စည်းပုံအခြေခံဥပဒေ ပြင်ဆင်ရေး အခန်း ၁၂ အတိုင်းပဲ ကျွန်တော်တို့ ဆက်လုပ်သွားမှာပါ။

ပိုင်လေး

Category: 

Share