မြန်မာ့ဇာတ်သဘင် ဖျော်ဖြေရာ၌ စတိတ်ရှိူးဖျော်ဖြေမှုတို့ကို အချိန်အကန့်အသတ်ဖြင့်သာ ခွင့်ပြုတော့မည်

မြန်မာ့ဇာတ်သဘင် ဖျော်ဖြေရာ၌ စတိတ်ရှိူးဖျော်ဖြေမှုကို အချိန်အကန့်အသတ်ဖြင့်သာ ခွင့်ပြုတော့မည်ဖြစ်ပြီး ခေတ်ပေါ်တေးသီချင်းများကို ည ၁ နာရီခွဲနောက်ပိုင်းတွင် ဖျော်ဖြေခွင့်ပြုတော့မည်မဟုတ်ကြောင်း မြန်မာသဘင်ပညာရှင်များအစည်းအရုံး(ဗဟို)မှ အတွင်းရေးမှူးဦးမိုးဝင်းက ပြောသည်။

“ဒီဆုံးဖြတ်ချက်တွေက ကျွန်တော်တို့ ဆုံးဖြတ်ချက်တွေ မဟုတ်ပါဘူး။ အားလုံးရဲ့ဆုံးဖြတ်ချက်အတိုင်း အတည်ပြုခြင်း ဖြစ်ပါတယ်။ ရိုးရာသဘင်ဖြစ်တဲ့အတွက် ရိုးရာထိန်းသိမ်းခြင်းကို လုပ်နေခြင်းဖြစ်ပါတယ်။ စတိတ်ရှိူးကဏ္ဍအနေနဲ့ ဘယ်ချိန်ပဲဖြစ်ဖြစ် ည ၁ နာရီခွဲနောက်ပိုင်းမှာ ရပ်နားပြီး အော်ပရာများကို ညတိုင်း ကပြကြရမှာ ဖြစ်တယ်” ဟု ၄င်းကပြောသည်။

ထိုသို့ ဆုံးဖြတ်ရာတွင် မြန်မာ့ဆိုင်းဝိုင်းနှင့် အပ်စပ်မှုမရှိသော ဒရမ်၊ လိဒ်ဂစ်တာ၊ ဘေစ့်ဂစ်တာများကို လုံးဝ ထည့်သွင်းတီးခတ်ခြင်း မပြုရ၊ ရိုးရာဖျော်ဖြေရေးနှင့် အပ်စပ်မှုမရှိသော အတို၊ အပြတ်၊ လည်ဟိုက်များ၊ သရုပ်ပျက်အ၀တ်အစားများ ၀တ်ဆင်ဖျော်ဖြေခြင်းမပြုရစသော စည်းမျဉ်းစည်းကမ်းများလည်း ပါဝင်ခဲ့ကြောင်း သိရသည်။

အဆိုပါဆုံးဖြတ်ချက်တို့ကို ပြီးခဲ့သည့် မေလ ၂၄ ရက်နေ့က မြန်မာဇာတ်သဘင်ဖျော်ဖြေရေးနှင့် ပညာရပ်ပိုင်းဆိုင်ရာပွဲ၌ မြန်မာနိုင်ငံသဘင်ပညာရှင်များ၊ တည်ထောင်သူများ တက်ရောက်ဆွေးနွေးခဲ့ကြပြီး အများသဘောတူညီချက်ဖြင့် အတည်ပြု ဆုံးဖြတ်ခဲ့ကြခြင်းဖြစ်သည်။    

ဇင်မင်း

Category: 

Share