ကျောင်းအပ်နှံရေး ရက်သတ္တပတ်အတွင်း အပ်နှံနိုင်ခြင်းမရှိသည့် ကျောင်းသားများကို ရက်တိုးလက်ခံသွားမည်

ကျောင်းအပ်နှံရေး ရက်သတ္တပတ်ကျော်သည့်အထိ လာရောက်အပ်နှံခြင်းမရှိသော ကလေးငယ်များကို ဇွန်လဒုတိယပတ်အထိ ကျောင်းအပ်လက်ခံသွားမည်ဖြစ်ကြောင်း မေ ၂၅ ရက်ကျောင်းအပ်နှံရေး ရက်သတ္တပတ်အခမ်းအနား၌ ရန်ကုန်တိုင်းဒေသကြီး အစိုးရအဖွဲ့ စိုက်ပျိုးမွေးမြူရေးနှင့် သစ်တော၊ စွမ်းအင်ဝန်ကြီး ဦးဟံထွန်းက ပြောသည်။

ကျောင်းအပ်နှံရေး ရက်သတ္တပတ်အခမ်းအနားအား ရန်ကုန်တိုင်းဒေသကြီးဝန်ကြီးချုပ် ကိုယ်စားဝန်ကြီးဦးဟံထွန်းက တက်ရောက်ခဲ့ပြီး အထက်ပါအတိုင်း ပြောကြားခဲ့ခြင်းဖြစ်ကြောင်း သိရသည်။   

“၂၀၁၇-၂၀၁၈ ဘဏ္ဍာရေးနှစ်မှာ ကျောင်းနေအရွယ်ကလေး ရာခိုင်နှုန်းပြည့် ကျောင်းအပ်နှံဖို့၊ ကျန်ရှိရင်လည်း အနည်းအကျဉ်းပဲ ကျန်ရှိဖို့လိုပါတယ်။ မိဘများနဲ့ ဆရာမများကလည်း ၀ိုင်းဝန်းပူးပေါင်းကြပါ။ အမျိုးသားပညာရေး လှုပ်ရှားမှုတစ်ရပ်အနေနဲ့ လုပ်ရမှာဖြစ်ပါတယ်” ဟု ၀န်ကြီးက ပြောသည်။

၂၀၁၆-၂၀၁၇ ပညာသင်နှစ်တွင် ကျောင်းနေအရွယ်ကလေး အသက်ငါးနှစ်အရွယ် ၁၀၄၂၂၂ ဦး၊ ခြောက်နှစ်အရွယ်ကလေး ၁၂၉၂၀ ဦးရှိခဲ့ပြီး ယခုနှစ် ကျောင်းနေအရွယ်ကလေးများစာရင်းကို ရန်ကုန်တိုင်းဒေသကြီး ပညာရေးမှူးရုံးမှ ဦးစီး၍ ဆရာဆရာမများက စာရင်းလိုက်လံ ကောက်ယူပြုစုခဲ့ကာ ရန်ကုန်မြို့တွင် ကျောင်းနေအရွယ်ကလေးငယ် တစ်သိန်းကျော်ရှိကြောင်း သိရသည်။

“ကျောင်းတိုင်း ဇွန်လ ၁ ရက်နေ့ကျောင်းအချိန်စာရင်းတိုင်းဆရာဆရာမတွေကို စာဝင်သင်ဖို့ ပြောထားပြီးဖြစ်တယ်။ ဒီလို စာသင်ဝင်ပြီးလို့မှ အတန်းထဲမှာ ကျောင်းလာမအပ်သေးတဲ့ ကိုယ့်ကလေး လက်ကျန် ဘယ်သူရှိမလဲ၊ ရှိသေးရင် ကလေးကို အိမ်လိုက်ခေါ်ဖို့၊ ကျောင်းအပ်နှံခိုင်းဖို့ ဆရာ၊ ဆရာမတွေကို ပြောထားတယ်” ရန်ကုန်တိုင်းဒေသကြီး ပညာရေးမှူးရုံးမှ ဒုတိယညွှန်ကြားရေးမှူး (ပညာ) ဒေါ်ဆွေဆွေလဲ့က ပြောသည်။

ကျောင်းအပ်နှံရေး ရက်သတ္တပတ်အနေဖြင့် မေ ၂၅ ရက် မှ ၃၁ ရက်အထိ သတ်မှတ်ထားပြီး KG တန်းမှ ပထမတန်းအထိ ကျောင်းဝတ်စုံ အခမဲ့၊ ပြဋ္ဌာန်းစာအုပ်အခမဲ့၊ အလယ်တန်း၊ အထက်တန်းကျောင်းအပ်နှံမှု အခမဲ့ သတ်မှတ်ထားသည်။

မင်းသီဟန်

 

Category: 

Share