ငှက်ပျောတောမြေကိစ္စ လာရောက်ညှိနှိုင်းသူများအား ပါးငါးချက်စီရိုက်ချင်ကြောင်း ဆိပ်ဖြူမြို့နယ် အုပ်ချုပ်ရေးမှူးက ပြောခဲ့ဟုဆို

အထက်မြန်မာပြည် တရားဥပဒေစိုးမိုးရေးနှင့် လေ့လာစောင့်ကြည့်ရေးအဖွဲ့ဥက္ကဋ္ဌဦးခင်မောင်သိန်းအား ခွင့်ပြုချက်ရှိလျှင် ပါးငါးချက်ရိုက်ချင်ဟု ဆိပ်ဖြူမြို့နယ်အုပ်ချုပ်ရေးမှူးက မကွေး-ကံပြားလမ်း၊တိုင်း (CSO) ရုံးခန်းတွင် ပြောဆိုချက်အပေါ် မကျေနပ်၍ သတင်းစာရှင်းလင်းပွဲတစ်ခု ပြုလုပ်ခဲ့ကြောင်း သိရသည်။

(CSO) ဥက္ကဋ္ဌ ဦးခင်မောင်သိန်းက ဆိပ်ဖြူမြို့နယ် အုပ်ချုပ်ရေးမှူးအား မြေယာဥပဒေနှင့်ပတ်သက်ပြီး ပြောကြားရာ ဥပဒေဆိုသည်မှာ စာအုပ်ထဲမှာပဲရှိသည်ဟု အုပ်ချုပ်ရေးမှူးက ပြောကြားခဲ့ကြောင်း၊ ပူးပေါင်း ဆောင်ရွက်ရမည့်အနေအထားအား မျက်ကွယ်ပြု၍ ယင်းသို့ပြောခြင်းမှာ မြို့နယ်အုပ်ချုပ်ရေးမှူး တစ်ယောက်အနေဖြင့် မသင့်ကြောင်းနှင့် ထပ်မံ၍ မေလ ၂၁ ရက်နေ့တွင်လည်း ငှက်ပျောတောကိစ္စအား ညှိနှိုင်းရန် ပြောဆိုဆွေးနွေးရာတွင် “တောင်းဆိုမှုတွေသာရမယ်ဆိုရင် ကျွန်တော်လည်း တောင်းဆိုပြီး လူတစ်ယောက်ကို ပါးငါးချက်စီ ရိုက်ချင်တယ်”ဟု ဆိပ်ဖြူမြို့နယ်အုပ်ချုပ်ရေးမှူးက ပြောဆိုခဲ့သဖြင့် ယခုကဲ့သို့ သတင်းစာရှင်းလင်းပြုလုပ်ရခြင်းဖြစ်ကြောင်း၊ ယခုကိစ္စအား မကွေးတိုင်းလွှတ်တော်နှင့် အစိုးရ အဖွဲ့အစည်းများထံ ဆက်လက်တင်ပြသွားမည်ဖြစ်ကြောင်း လည်း အထက်မြန်မာပြည်တရားဥပဒေ စိုးမိုးရေးနှင့် လေ့လာစောင့်ကြည့်ရေးအဖွဲ့ဥက္ကဋ္ဌ ဦးခင်မောင်သိန်းက ပြောသည်။

ယင်းသို့ပြောကြားမှုနှင့် ပတ်သက်၍ ဆိပ်ဖြူမြို့နယ်အုပ်ချုပ်ရေးမှူးအား သွားရောက်မေးမြန်းရာတွင် “ကျွန်တော်လုပ်သက် ၂၇ နှစ်ရှိပြီ။ အခုလိုမပြောပါဘူး။ ပါးရိုက်ချင်တယ်လို့လည်း မပြောပါဘူး”ဟု ပြန်လည်ဖြေကြားခဲ့သည်။

ယင်းကိစ္စနှင့် ပက်သက်၍ ဦးခင်မောင်သိန်းက ၄င်းတို့မှာ အရပ်ဘက်အဖွဲ့အစည်းအနေဖြင့် လုပ်ငန်းဆောင်ရွက်ရာတွင် မိမိအကျိုးစီးပွားကို စွန့်လွှတ်ပြီး အမှန်တကယ်ဖြစ်ပေါ်နေမှုများကို ညှိနှိုင်းဆောင်ရွက်ပေးခြင်းသာဖြစ်ပြီး ယခုလိုပြောဆိုခြင်းမှာ မိမိအဖွဲ့အစည်းအား စော်ကားရာ ရောက်ကြောင်းနှင့် ပြည်သူကို မထီမဲ့မြင်ပြုရာရောက်ကြောင်း ဖြစ်သည့်အတွက် ယခုလို စာနယ်ဇင်း ရှင်းလင်းရခြင်းဖြစ်ပြီး ရှင်းလင်းချက်များကို တာဝန်ယူမည်ဖြစ်ကြောင်း Tomorrow သို့ ပြောသည်။ ယခုအခါ ငှက်ပျောတောမြေကိစ္စအားလည်း ခုံဖွဲ့စစ်ဆေးခြင်းကို စတင်ပြုလုပ်နေပြီဖြစ်ကြောင်း သိရသည်။

 

သတင်း-စန်းလွင်၊ မြင့်ဝေ(မင်းဘူး)

ပုံစာ- ဆိပ်ဖြူမြို့နယ် အုပ်ချုပ်ရေးမှူးပြောကြားချက်နှင့် ပတ်သက်၍ သတင်းစာရှင်းလင်းပွဲပြုလုပ်နေစဉ်

 

 

Category: 

Share