မသန်စွမ်းသူများ အကျိုးခံစားခွင့် ပိုမိုရရှိရန် မသန်စွမ်းမှတ်ပုံတင်ကတ်များ ထုတ်ပေးရန်စီစဉ်

၂၀၁၅ ခုနှစ်က ထွက်ရှိခဲ့သည့် မသန်စွမ်းသူများ၏ အခွင့်အရေးဥပဒေတွင်ပါရှိသည့် မသန်စွမ်းသူများ သက်သေခံမှတ်ပုံတင်ကတ်များထုတ်ပေးရန် နိုင်ငံတော်က စီစဉ်နေကြောင်း မြန်မာနိုင်ငံမသန်စွမ်းသူများ အသင်းကွန်ရက်မှ သိရသည်။
အဆိုပါ မသန်စွမ်းသူများသက်သေခံကတ်(မသန်စွမ်းမှတ်ပုံတင်)များ ထုတ်ပေးရန် လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန၊ ကျန်းမာရေးဝန်ကြီးဌာနနှင့် မြန်မာနိုင်ငံ မသန်စွမ်းအသင်းချုပ်တို့ ပူးပေါင်းစီစဉ်နေကြောင်း သိရသည်။

“၀န်ကြီးဌာနက ကျွန်တော်တို့ဆီ စာရင်းပြုစုဖို့လာပါတယ်။ လာစစ်ဆေးတဲ့သဘောပေါ့။ မသန်စွမ်းဥပဒေကတော့  ၂၀၁၅ က ထွက်ပြီးပြီပေါ့။ နည်းဥပဒေကတော့ မထွက်သေးပါဘူး။ မသန်စွမ်းတွေကတော့ မျှော်လင့်နေတာပေါ့လေ။ ဒုတိယတစ်ခေါက်လည်း ထပ်လာမယ်လို့ပြောပါတယ်”ဟု မသန်စွမ်းသူများအသင်း (ရွှေပြည်သာ) ဥက္ကဋ္ဌဦးထင်အောင်ဇော်ကပြောကြားခဲ့သည်။

အဆိုပါ သက်သေခံကတ်ပြားသည် မသန်စွမ်းသူဖြစ်ကြောင်း ထောက်ခံပေးသည့်ကတ်ဖြစ်ပြီး ကတ်ကိုင်ဆောင်သူသည် နိုင်ငံတော်က မသန်စွမ်းသူများအတွက်ပေးအပ်မည့် အကျိုးခံစားခွင့်များအပြင် အခြားလူမှုရေးအဖွဲ့အစည်းများက ပေးမည့် အကျိုးခံစားခွင့်များကိုပါ ရရှိနိုင်မည်ဖြစ်ကြောင်း လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာနမှ သိရသည်။

မသန်စွမ်းသူများ သက်သေခံမှတ်ပုံတင်ပြုလုပ်ခြင်းသည် မသန်စွမ်းသူများ အခွင့်အရေးဆိုင်ရာ ဥပဒေတွင်ပါဝင်ပြီး လက်ရှိတွင် အဆိုပါဥပဒေကို အကောင်အထည်ဖော်ရန် မသန်စွမ်းသူများအတွက် အခွင့်အရေးကာကွယ်ပေးရေးဥပဒေ၊ နည်းဥပဒေများထွက်ရှိရန် ဆောင်ရွက်နေဆဲဖြစ်ကြောင်းလည်း သိရသည်။

ရွှေရင်ငြိမ်းအေး

 

Category: 

Share