ဝင်ငွေနည်းပါးသည့် မိသားစုများ အိမ်ရာပိုင်ဆိုင်နိုင်ရေးအတွက် လစဉ်ပေးသွင်းရမည့်ငွေကို ကျပ်တစ်သိန်းထိသာပေးနိုင်ရန် CHDB မှ စီစဉ်

အိမ်ရာဝယ်ယူသူများ လစဉ်ပေးသွင်းသွားရမည့် ချေးငွေကို လစဉ် ကျပ်တစ်သိန်းထိသာ ပေးနိုင်ရန် စီစဉ်နေသဖြင့် လစဉ်ဝင်ငွေ ကျပ်သုံးသိန်းအောက်ရရှိသည့် မိသားစုများ တိုက်ခန်း ပိုင်ဆိုင်ရန်အခွင့်အရေး ရနိုင်တော့မည်ဖြစ်ကြောင်း ဆောက်လုပ်ရေးနှင့် အိမ်ရာဖွံ့ဖြိုးရေးဘဏ် (CHDB)ဘဏ်ဥက္ကဋ္ဌ ဦးဝင်းဇော်က ပြောသည်။

“ခုလောလောဆယ် ပေးနေတာက တိုက်ခန်းတစ်ခန်းကို တန်ဖိုးရဲ့ ၃၀ ရာခိုင်နှုန်းနဲ့ ပေးနေတဲ့အခါကျတော့ Repayment က တစ်လကို တစ်သိန်းခွဲနဲ့ သုံးသိန်းကြား ဖြစ်နေတာပေါ့။ အဲဒီတော့ ၀င်ငွေနည်းတဲ့ မိသားစု ၀ယ်နိုင်အောင် ဘယ်လိုလုပ်မလဲ စဉ်းစားနေတယ်။ တစ်သိန်းလောက် ပေးနိုင်တဲ့ Process တစ်ခုလုပ်ရမှာပေါ့။ အဲဒီလိုလုပ်နိုင်ဖို့လုပ်တဲ့အခါ သေချာတာက နှစ်ရှည်ချေးမှရမှာ။ နှစ်ရှည်ချေးပေးနိုင်ဖို့က ဖြစ်နိုင်ရင်သူများ နိုင်ငံတွေလိုမျိုး နှစ် ၃၀ ချေးခွင့်ရမယ်ဆိုရင် ချေးပေးမှာပေါ့”ဟု ၄င်းကပြောသည်။

အိမ်ရာဝယ်ယူရန် CHDB ဘဏ်၌ ငွေစုဆောင်းရာတွင် အိမ်ခန်းတန်ဖိုး ၃၀ ရာခိုင်နှုန်း ပြည့်မီသူများကို မြို့ပြနှင့် အိမ်ရာဖွံ့ဖြိုးရေး ဦးစီးဌာနက ဖော်ထုတ်သော တိုက်ခန်းများကို ၀ယ်ယူခွင့်ရရန် ဆောင်ရွက်ပေးနေခြင်းဖြစ်ပြီး ကျန် ၇၀ ရာခိုင်နှုန်းကို တစ်နှစ်လျှင် အတိုး ၁၂ ရာခိုင်နှုန်းဖြင့် ၁၀ နှစ်အတွင်း ပေးချေရန် ထုတ်ချေးပေးလျက် ရှိသည်။

အဆိုပါ တိုက်ခန်းများကို လစဉ်ဝင်ငွေ ၃ သိန်းနှင့် အထက်ရှိသူများသာ ချေးငွေထုတ်ချေး ၀ယ်ယူရန် သတ်မှတ်ထားသဖြင့် လစဉ်ဝင်ငွေ ၃ သိန်းအောက်သာရှိသော မိသားစုများမှာ အိမ်ရာပိုင်ဆိုင်ခွင့် အခွင့်အရေး ဆုံးရှုံးနေရခြင်းကြောင့် ယခုကဲ့သို့ တစ်လလျှင် တစ်သိန်းနှုန်းနှင့် နှစ်ရှည်ပေး၍ ချေးငွေထုတ်ချေး ၀ယ်ယူ နိုင်ရန်စဉ်းစားခဲ့ခြင်းဖြစ်ကြောင်း သိရသည်။

CHDB အနေဖြင့် လစဉ်ဝင်ငွေ ၃သိန်းအောက်ရှိသည့် မိသားစုများကို ကနဦး ကြိုတင်ပေးငွေကို ၂၀ ရာခိုင်နှုန်းနှင့် ပြန်ဆပ်ရန်ကာလကို နှစ်၂၀ ထိ တိုးမြှင့်ပေးရန် အစီအစဉ်ရှိကြောင်း သိရသည်။
ယင်းသို့  ဆောင်ရွက်ပေးနိုင်ရန် လက်ရှိတွင် သက်ဆိုင်ရာတာဝန်ရှိသူများနှင့် ညှိနှိုင်းလျက်ရှိပြီး နိုင်ငံတော် ချေးငွေနှင့် နိုင်ငံတကာမှ ချေးငွေများရရန်လည်း ညှိနှိုင်းနေကြောင်း သိရသည်။

ယခုလအထိ စာရင်းများအရ CHDB ဘဏ်တွင် စုဆောင်းငွေစာရင်း ဖွင့်လှစ်ထားသူစုစုပေါင်း ၁၅၀၀၀ ကျော်ရှိပြီး မြို့ပြနှင့်အိမ်ရာဖွံ့ဖြိုးရေးဦးစီးဌာနမှ လာမည့်နှစ်အတွင်း တိုက်ခန်းပေါင်း ၈၀၀၀ ကျော် ဆောက်လုပ် နိုင်ရန် စီစဉ်ထားကြောင်း သိရသည်။

 
ရွှေရင်ငြိမ်းအေး

 

Category: 

Share