ရန်ကုန်ရှိ ရေထွက်ပေါက် ၄၇ ခုအနက်၂၁ ခုသာ အလုပ်လုပ်ခြင်းမှာ ရေကြီးရေလျှံရခြင်း၏ အဓိကအချက်တွင် တစ်ခုအပါဝင်ဖြစ်ဟုဆို

ရန်ကုန်မြို့ ရေကြီးရေလျှံမှု ဖြစ်ပွားရသည့် အကြောင်းအရင်းများထဲတွင် ရေထွက်ပေါက် ၄၇ ခုရှိသည့်အနက် ၂၁ ခုသာ အလုပ်လုပ်ပြီး ကျန်ရေထွက်ပေါက်များမှာ အမှိုက်များဖြင့် ပိတ်နေခြင်းမှာလည်း ရေလျှံရခြင်း အကြောင်းများတွင် တစ်ခုအပါအ၀င်ဖြစ်ကြောင်း ရန်ကုန်မြို့တော်စည်ပင်သာယာရေးကော်မတီ အင်ဂျင်နီယာဌာန (လမ်း/တံတား)မှ သိရသည်။

“မိုးကြီးလာပြီဆိုတာနဲ့ ရေကြီးရေလျှံတာက အမြဲဖြစ်နေကျပါ။ ဒါပေမဲ့ ရန်ကုန်မြို့မှာ ရေထွက်ပေါက် ၄၇ ပေါက် ရှိပေမယ့်လည်း ၂၁ ပေါက်သာ အလုပ်လုပ်ပြီး ကျန်ရေထွက်ပေါက်တွေက အမှိုက်တွေ ပိတ်နေပါတယ်။ ဒါကြောင့် မိုးကြီးတာနဲ့ ရန်ကုန်မြို့မှာ ရေတက်လာရခြင်း ဖြစ်ပါတယ်”ဟု အဆိုပါဌာနမှ တာဝန်ရှိသူတစ်ဦးက ပြောကြားသည်။

ရန်ကုန်မြို့တွင် ရေကြီးရေလျှံမှုသည် ရေထွက်ပေါက်များ၌ အမှိုက်များပိတ်နေခြင်း၊ ယာယီမြေအောက် ရေကန်များမရှိခြင်း၊ လူနေအိမ်အဆောက်အအုံများ တည်ဆောက်မှုများပြားလာခြင်းတို့ကြောင့်ဖြစ်ကြောင်း ၄င်းက ဆက်လက်သုံးသပ်ခဲ့သည်။

ယခုကဲ့သို့ ရေကြီးရေလျှံမှု ပပျောက်စေရန်အတွက် ၂၀၁၆-၁၇   ဘဏ္ဍာနှစ်တွင် တစ်ဘီလီယံသုံးစွဲခဲ့ပြီး ယခုဘဏ္ဍာနှစ်တွင် လမ်း/တံတားဘတ်ဂျက်အတွက် ၁၂ ဘီလီယံ သုံးစွဲရန် မျှော်မှန်းထားကာ ရေကြီးရေလျှံမှုအတွက် ၃ ဘီလီယံသုံးစွဲသွားမည်ဖြစ်ကြောင်း အဆိုပါတာဝန်ရှိသူက ပြောကြားခဲ့သည်။

ကိုဇင်

 

Category: 

Share