အင်းစိန်ထောင်အတွင်းမှ ဂန္ထ၀င်လူမိုက်ကြီးများ အပိုင်း (၁၈) - ဇော်သက်ထွေး

လူသတ်ချိန် တစ်နာရီ သုံးမောင်း

ရေဘ၀ဲဘိုနီနဲ့ငြိတဲ့ စစ်ကားက ပေါ့သေးသေးမဟုတ်ဘူး။ သူက သေဒဏ်ကြိုးလွတ် တစ်ယောက်ပဲ။ ရန်ကင်းသားဖြစ်တဲ့ စစ်ကားက အရင်က ခိုးဆိုးနှိုက် တစ်ယောက်ပါ။ တစ်နေ့တော့ မြေနီကုန်းမှာ ကျောင်းဆရာမတစ်ယောက်ကို လုတယ်။ ဆရာမက အော်တော့၊ ပါးစပ်ထဲကို ကုံးသီးနဲ့ပစ်ပြီး သတ်ပစ်လိုက်တယ်။ ဒါကြောင့် လူသတ်လုယက်နဲ့ သေဒဏ်ကျခဲ့တာပါ။ သေဒဏ်တိုက်မှာ အငယ်လေး(ခ) ကြွက်ကတိုး ဆိုတာလည်းရှိတယ်။ ကြွက်ကတိုးလည်း စစ်ကားနဲ့အတူတူ သေဒဏ်ကျသွားတယ်။ သူတို့လည်း ကံကောင်းချင်တော့ ၈၈ ဒီမိုကရေစီ အရေးအခင်းနဲ့ ကြုံကြိုက်ပြီး သေဒဏ်က လွတ်သွားတယ်။ ကြိုးတိုက်ကနေ အဆောင်ကို ရောက်လာတော့ လည်လည်ဝယ်ဝယ်ရှိတဲ့ ရန်ကင်းသား စစ်ကားက အခန်းလူကြီး ဖြစ်လာတယ်။ သူ့သူငယ်ချင်းဖြစ်တဲ့ ကြွက်ကတိုးက လူကောင်က ခပ်သေးသေး၊ စကားအပြောအဆိုလည်း မတတ်တော့ ထောင်မှာ နေရာမတောင်းတတ်ဘူး။ သူက စစ်ကားအခန်းမှာပဲ အေးအေးဆေးဆေး နေတယ်။ နောက်တော့ စိတ်ရင်းကောင်းတဲ့ ရေကန်ဘာယာ ရေဘ၀ဲဘိုနီနဲ့ အပေါင်းအသင်း ဖြစ်သွားတယ်။ သူတို့နှစ်ယောက်လုံးက ထောင်ထဲမှာ ချွတ်တာခွာတာတွေ စိတ်မ၀င်စားဘူး။ ပျော်ပျော်ပါးပါးပဲ နေတယ်။

ထောင်ဆိုတာကလည်း သာမန်လူတွေကို ရှင်းပြလို့မရတဲ့ ထူးဆန်းတဲ့အဖြစ်အပျက်တွေ အများကြီးပဲ။ ဥပမာ ညဘက် ညည့်နက်သန်းခေါင်ရောက်မှ လူတစ်ယောက်က အသံနက်ကြီးနဲ့ ထအော်ရာကနေ ဘေးနားကလူကို ကူးစက်ပြီး တစ်ထောင်လုံး အော်သံတွေ ဆက်သွားတဲ့ညမျိုးတွေရှိခဲ့တယ်။ အဲဒီအခါမျိုးမှာ ၀န်ထမ်းတွေက အချုပ်ခန်း သံတိုင်တွေကို တုတ်နဲ့ရိုက်ပြီး “မင်းအမိန့်” နဲ့ သရဲအားလုံး အေးအေးဆေးဆေးနေဖို့ လိုက်အော်လေ့ရှိတယ်။ အဲဒီလိုမျိုးဖြစ်တဲ့ညတွေကလည်း ထောင်မှာ အသားစားကျွေးတဲ့ရက်မျိုးတွေမှာ ဖြစ်လေ့ရှိတယ်။ ထောင်အခေါ်တော့ “သရဲစီး” တယ်လို့ ပြောတယ်။ ဒီကိစ္စက ယနေ့အချိန်အထိ ဘယ် ထောင်အာဏာပိုင်မှ ဖြေရှင်းလို့မရတဲ့ အသိခက်တဲ့ ပုစ္ဆာတစ်ပုဒ်ပါပဲ။

ထောင်မှာ ညနေစောင်းရင် ကောင်းတဲ့အခိုက်ရှိသလို မကောင်းတဲ့အခိုက်လည်း ရှိတယ်။ ကျွန်တော့်ကိုယ်တွေ့ကို ပြောရရင် တစ်ညနေမှာ ဧရာကြီး အမှုတွဲ မလက်တို (ခ) အောင်ဝင်းဆိုတဲ့ သူက (၃)တိုက် ဘုတ်တိုက်ထဲမှာ စိုက်ပျိုးရေးမှာသုံးတဲ့ ပေါက်တူး၊ ပေါက်ပြားတွေကို သေချာသိမ်းပြီး အဆောင်ပြန်လာတယ်။ အချိန်ကတော့ နေ၀င်ရီတရောပဲ။ အဆောင်မှာကလည်း လူစစ်ပြီး အဆောင်ပိတ်ဖို့ အားလုံးတန်းစီနေတဲ့အချိန်ပဲ။ မလက်တိုက ညဘက် ထမင်းစားရင် တို့ဖို့ ခရမ်းသီး တစ်လုံးနှစ်လုံး ခူးဖို့လုပ်နေတယ်။ ခရမ်းသီးဖြတ်ဖို့ အဆောင်ထဲမှာရှိတဲ့ ပါလေး(ခ) ကျော်ဉာဏ်သိန်းကို ဆီပတ်သံပြားနဲ့ လုပ်ထားတဲ့ ဓားလေး လှမ်းငှားတယ်။ ပါလေးကလည်း အဆောင်အပြင်မှာရှိတဲ့ မလက်တိုဆီကို အခန်းထဲကနေ ဆီပတ်သံပြားဓားကို လှမ်းပစ်ပေးတယ်။ အံ့သြစရာကောင်းတာက ဓားက လေထဲပျံတက်သွားပြီး တ၀ီဝီလည်ပြီး မလက်တိုဆီကို အရှိန်နဲ့ သွားတယ်။ မလက်တိုလည်း တော်တော်လန့်သွားပြီး ဓားကို မဖမ်းတော့ဘဲ လူကို ကပျာကယာ လှဲချလိုက်ရတယ်။ ဓားက သူ့ခေါင်းကို ကျော်ပြီး အနောက်ဘက် မြေကြီးထဲမှာ စိုက်ဝင်နေတယ်။ မလက်တိုလည်း ခရမ်းသီး ကပျာကယာခူးပြီး အခန်းထဲရောက်မှ ပါလေးကို ညနေဘက် စီးနေတဲ့အချိန်မှာ ဒီလို ဓားတွေကို ပစ်မပေးရကြောင်း ရှင်းပြတယ်။ အဲဒီတော့မှ ပါလေးလည်းသဘောပေါက်သွားတယ်။

တစ်နေ့မှာတော့ စစ်ကား လူကြီးလုပ်တဲ့ အခန်းထဲကို မကောင်းတဲ့အခိုက် စီးလာတယ်လို့ ဆိုရမှာပဲ။ အဲဒီညနေက အဆောင်ပိတ်ဖို့ လူတွေတန်းစီနေတဲ့အချိန်ပါ။ ဒါပေမဲ့ တန်းစီးတို့၊ အခန်းလူကြီးတို့ဆီမှာ “ဘောက်ချာ” ၀င်ထားတဲ့သူတွေက တန်းစီလေ့မရှိဘူး။ ကိုယ့်အိပ်ရာမှာပဲ ကိုယ်သက်သက်သာသာ လှဲနေလေ့ရှိတယ်။ ၀န်ထမ်းလူရေဖို့ ရောက်လာခါနီးကျမှ အခန်းသားတွေရဲ့ နောက်ဆုံးမှာ ခဏ၀င်ထိုင်ပြီး တန်းစီလိုက်တာပါပဲ။ ဒီလိုလူတွေကို ထောင်ထဲမှာ “ဘိုလိုလို၊ ဂျိုလိုလို ကောင်တွေ”လို့ ခေါ်လေ့ရှိပါတယ်။ ဘိုဆိုတာကတော့ ထောင်ထဲမှာ မိုက်ဂုဏ်ရှိရင်ရှိ၊ ဒါမှမဟုတ်ရင် ပိုက်ဆံရှိတဲ့ အတန်းအစားကို ဆိုလိုတာပါ။ ဂျိုဆိုတာကတော့ ထောင်ထဲမှာ ဘာမှမရှိလို့ ကိုယ့်ခန္ဓာကိုယ်ကိုရင်းပြီး အခွင့်အရေး ရယူထားတဲ့ အတန်းအစားကို ဆိုလိုတာ ဖြစ်ပါတယ်။ စစ်ကားက အခန်းလူကြီးဆိုတော့ အဆောင်ပိတ်ရင် သူရဲ့သူငယ်ချင်းဖြစ်တဲ့ အငယ်လေး (ခ) ကြွက်ကတိုးနဲ့ ရေကန်ဘာယာ ဘိုနီတို့က တန်းစီလေ့မရှိဘူး။ အပြင်မှာပဲ ထွက်ထိုင်နေလေ့ရှိတယ်။ စစ်ကားကလည်း သူတို့ကို ဘာမှ ပြောလေ့မရှိပါဘူး။ မကောင်းတဲ့အခိုက် စီးနေတဲ့ တစ်ညနေမှာတော့ စစ်ကားက ဘာကို ဒေါကန်နေသလဲမသိဘူး။ အခန်းသားတွေ တန်းစီနေတဲ့အချိန် အပြင်ထွက်ထိုင်နေတဲ့ အငယ်လေးနဲ့ ဘိုနီကို ပိတ်ဟောက်လိုက်တယ်။

“ဟိုကောင် နှစ်ကောင် ... မင်းတို့က ဘာကောင်တွေမို့လို့ အပြင်ထွက်ထိုင်နေတာလဲ၊ လာ ...အထဲဝင် တန်းစီ”

ရုတ်တရက် အပြောခံလိုက်ရတာကြောင့် အငယ်လေးရော ဘိုနီရော ကြောင်အသွားတယ်။ အငယ်လေးက စစ်ကားသူငယ်ချင်း ဆိုပေမယ့် ရူးသလို ပေါသလိုနေတော့ စစ်ကားက အမြဲတမ်းနှိမ်တယ်။ ဒါကို ဘိုနီက ကြားကနေ မကျေမနပ်ဖြစ်လေ့ရှိတယ်။ အခုလည်း လူတွေကြားထဲ စစ်ကားဟောက်လိုက်တော့ အငယ်လေးက ဘာမှပြန်မပြောဘူး။ ရေဘ၀ဲဘိုနီကတော့ ရှက်လည်းရှက်၊ ဒေါသလည်း ထွက်သွားပြီး စစ်ကားကို တချက်ပြန် ပြောလိုက်တယ်။

“ခင်ဗျားက  ကျုပ်တို့နှစ်ယောက်ကိုပဲပြောနေတာ။ တခြားအပြင်ထွက်ထိုင်နေတဲ့သူတွေကျတော့ ဘာမှမပြောပါလား”

စစ်ကားလည်း ဘိုနီမေးခွန်းကို ဘာမှ ပြန်မဖြေတတ်ဘူး။ ဘာလို့လဲဆိုတော့ ဘိုနီပြောတဲ့သူတွေက စစ်ကားကို ပိုက်ဆံပေးပြီး အခန်းထဲမှာ သက်သက်သာသာနေဖို့ ဘောက်ချာဝင်ထားတဲ့သူတွေဖြစ်လို့ပဲ။ အဲဒီနေ့က စစ်ကား လူပုံအလယ်မှာ အရှက်ခွဲလိုက်တာကို ဘိုနီက လုံးဝမကျေနပ်ဘူး။ တစ်ညလုံး ရင်ထဲမှာ တနုံ့နုံ့ဖြစ်နေတယ်။ နောက်နေ့ ရောက်တော့ သူမအောင့်နိုင်တော့ဘူး။ အငယ်လေးကို ရေကန်ဘေးခေါ်ပြီး တိုင်ပင်လိုက်တယ်။
“ညနေက စစ်ကား စကားပြောတာ တော်တော်ရင့်တယ်ကွာ။ ငါ မကျေနပ်ဘူး”

အငယ်လေး (ခ) ကြွက်ကတိုးကလည်း သူ့အမှုတွဲကို မကျေနပ်ဘူး။

“ဟုတ်တယ်၊ ကိုဘိုနီ။ ဒီကောင်က တော်တော်မာန်တက်နေတာ။ သူငယ်ချင်း အချင်းချင်းတောင် အထာမရှိဘူး။ ခင်ဗျား ဘာလုပ်ချင်သလဲ”

ဘိုနီကလည်း မစဉ်းစားတော့ဘဲ ချက်ချင်းအဖြေပြန်ပေးတယ်။

“ငါ စစ်ကားကိုသတ်ချင်တယ်။ မင်းငါနဲ့အတူ ဒီကောင်ကို သတ်မယ်လို့ ကတိပေးမလား”

အငယ်လေးက ခေါင်းညိတ်ပြတယ်။ ဒီလိုနဲ့ သူတို့နှစ်ယောက် စစ်ကားကိုသတ်ဖို့ အသေးစိတ်တိုင်ပင်ကြတယ်။ သူတို့ရဲ့ အစီအစဉ်ထဲကို နောက်ထပ်ပါဝင်လာသူတစ်ယောက်ကတော့ ဒေါပုံစန်းမြင့်ပဲ။ စန်းမြင့်ကလည်း စစ်ကားကို မကျေနပ်ဘူး။ ဒီလိုနဲ့ သူတို့သုံးယောက် အသေးစိတ် အစီအစဉ်ဆွဲတယ်။ ဘိုနီက စစ်ကားသတ်မယ့် အချိန်ကို လူတွေအရမ်းအိပ်မောကျနေတဲ့ ည ၁ နာရီ ၃ မောင်းကို ရွေးတယ်။ ပြီးတော့ ဘိုနီနဲ့ အငယ်လေးက စစ်ကားကို သတ်တဲ့အချိန် ဒေါပုံစန်းမြင့်က စစ်ကားရဲ့လူတွေကို ကာထားပေးဖို့ တာဝန်ပေးတယ်။ စစ်ကားကိုသတ်ဖို့ ဘိုနီက ချွတ်ကို ရွေးတယ်။ အငယ်လေးကတော့ ညဘက် အခန်းမိလ္လာထိုင်ခုံက သစ်သား ပျဉ်တန်းကို အသုံးပြုမယ်လို့ ပြောတယ်။ စန်းမြင့်ကလည်း သူ့အတွက် ချွတ်တစ်ချောင်း လိုတယ်လို့ ပြောတယ်။ ထောင်အခေါ် “ချွတ်” ဆိုတာကတော့ သံခြေကျင်းမှာ အသုံးပြုတဲ့ သံချောင်းအရှည်ကို အဖျားချွန်အောင် သွေးထားတာ ဖြစ်ပါတယ်။ ဘိုနီက ချွတ်နှစ်ချောင်းကို  လက်သမားဘုတ်ကို ပိုက်ဆံပေးပြီး တိတ်တဆိတ်မှာလိုက်တယ်။ လက်သမားဘုတ်က ပို့လိုက်တဲ့ ချွတ်တွေကို စစ်ကားသတ်မယ့်ညမှာ အခန်းထဲကိုသွင်းပြီး မိလ္လာဖုံးတဲ့ ဖွဲပြာပုံကြားထဲမှာ ၀ှက်ထားလိုက်တယ်။ အငယ်လေးကတော့ မိလ္လာခုံက သစ်သားတန်းကို ရိုက်ဖြုတ်ပြီး ဟန်မပျက်ပြန်တန်းထားတယ်။ အရေးအကြောင်းဆို အသာဆွဲဖြုတ်လိုက်ရုံပဲ။

အခန်းမှာ ညဘက် ကင်းစောင့်တဲ့ ဘာယာတွေက မှောင်ရိပ်ခိုမှုတွေ၊ မသင်္ကာမှုတွေနဲ့ ကျလာတဲ့ ၃၀(D)တွေ များပါတယ်။ သူတို့တွေက ထောင်နှစ်လသုံးလပဲ ကျတဲ့သူတွေဖြစ်တယ်။ နေ့ဘက်မှာ ထောင်အပြင်ဘက်ကို ထုတ်ပြီး အကျဉ်းဦးစီးဌာန ရုံးခန်းတွေမှာ သန့်ရှင်းရေးလုပ်တာတွေ၊ ရေဖြည့်တာတွေ တောက်တိုမယ်ရလုပ်ရတယ်။ တချို့လည်း ပန်းခြံတို့ တောင်ယာတို့မှာ လုပ်ရတယ်။ ညနေဘက်ရောက်မှ ထောင်ထဲကို ပြန်ဝင်ရတဲ့သူတွေ ဖြစ်ပါတယ်။ သူတို့တွေကလည်း နေ့လယ်က အလုပ်ပင်ပန်းထားတဲ့ ဒဏ်ကြောင့် ညဘက်ကင်းကျတဲ့ အချိန်မှာ ငိုက်လေ့ရှိတယ်။ ဘာယာတစ်ယောက်ကို ထောင်အခေါ် ရှစ်မောင်း (နှစ်နာရီ) ကင်းစောင့်ရတယ်။ ပြီးရင် နောက်တစ်ယောက် ကင်းလဲရတယ်။ ညဘက်မှာ အကျဉ်းသားတွေအနေနဲ့ ရှစ်နာရီ သုံးမောင်းအထိ စကားပြောကြဆိုကြ၊ သီချင်းဆိုကြနဲ့ ဆူညံနေတာပါပဲ။ အခုနောက်ပိုင်းတော့ အခန်းတိုင်း ရုပ်မြင်သံကြားစက်တွေ တပ်ပေးထားတယ်။ ရှစ်နာရီသုံးမောင်းမှာ ဘာယာက “ခေါင်းချ” လို့ အော်လိုက်တာနဲ့ ကိုယ့်အိပ်ရာမှာကိုယ် လှဲအိပ်ရတယ်။ ကိုးနာရီ တစ်မောင်းအထိ ဘယ်သူမှ အိပ်ရာက ထခွင့်မရှိဘူး။ ကိုးနာရီ တစ်မောင်းကျော်မှ လက်ညှိုးထောင်ပြီး “ဘာယာ သေးပေါက်”  “ဘာယာ ရေသောက်”၊ “ဘာယာ အိမ်သာတက်”ဆိုပြီး အော်ရတယ်။ ဘာယာခွင့်ပြုမှ အိပ်ရာထဲကထပြီး မိလ္လာကိုသွားခွင့်ရှိတယ်။ ဒီလို တစ်ပြိုင်တည်း လူသုံးယောက်သာ ထခွင့်ရှိပြီး ကိုယ်သွားချင်ရင်တော့ ကိုယ့်အလှည့်ကို စောင့်ရပါတယ်။ အဲဒီညကတော့ ဘိုနီတို့က စစ်ကားကိုသတ်ဖို့ အစီအစဉ်ဆွဲထားတော့ လုံးဝမအိပ်ကြဘူး။ စိတ်လှုပ်ရှားပြီး ညည့်နက်အချိန်ရောက်ဖို့ စောင့်စားနေကြတယ်။

ည  တစ်နာရီ  သုံးမောင်းခေါက်လိုက်ပြီ။ ထုံးစံအတိုင်း ဘာယာက အိပ်ငိုက်နေတယ်။ ဘိုနီက “ဘာယာသေးပေါက်” လို့ ထအော်တယ်။ ဘာယာက အိပ်ချင်မူးတူးအသံနဲ့ သွားလို့ ဗလုံးဗထွေး လှမ်းပြောတယ်။ မရှေးမနှောင်းမှာပဲ အငယ်လေးကလည်း “ဘာယာအိမ်သာတက်” လို့ အော်တယ်။ ဘာယာက သွားလို့ပြောတယ်။ မိလ္လာထဲကို ဘိုနီနဲ့ အငယ်လေး ခပ်သွက်သွက် လျှောက်သွားလိုက်တယ်။ တစ်ခန်းလုံးကတော့ နှစ်နှစ်ခြိုက်ခြိုက် အိပ်မောကျနေကြတယ်။ ဘိုနီက မိလ္လာအခန်းထဲက ဖွဲပုံအောက်မှာ ၀ှက်ထားတဲ့ ချွတ်နှစ်ချောင်းကို ယူလိုက်တယ်။ အငယ်လေးက မိလ္လာတန်းပေါ်က သစ်သားချောင်းကို ဆွဲဖြုတ်လိုက်တယ်။ သူတို့ မိလ္လာခန်းထဲကအထွက်မှာ ဒေါပုံစန်းမြင့်လည်း ရောက်လာပြီ။ ဘိုနီက ချွတ်တစ်ချောင်းကို လှမ်းပေးပြီး “စစ်ကားလူတွေကို မင်းကြည့်ထား”လို့ အသံခပ်အုပ်အုပ်နဲ့ ပြောတယ်။ ပြီးတော့ သူနဲ့ အငယ်လေးက စစ်ကားအိပ်နေတဲ့နေရာကို ခပ်သွက်သွက် လှမ်းသွားတယ်။ စစ်ကားကတော့ သူ့ကံကြမ္မာကို မသိဘဲ နှစ်နှစ်ခြိုက်ခြိုက် အိပ်မောကျနေတယ်။ အဖြစ်အပျက်က အရမ်းမြန်တယ်။

ဘိုနီက စစ်ကားကို ချွတ်နဲ့ စထိုးလိုက်သလို အငယ်လေးကလည်း သစ်သားချောင်းနဲ့ မျက်နှာကို ဖြတ်ရိုက်လိုက်တယ်။ စစ်ကားရဲ့ အသံခပ်အုပ်အုပ်ပဲ ထွက်လာတယ်။ စစ်ကား ထထိုင်ချိန်တောင် မရလိုက်ဘူး။ အငယ်လေးတို့ရဲ့ လက်ချက်အောက်မှာ အိပ်ရာထဲမှာပဲ သွေးအလိမ်းလိမ်းဖြစ်သွားတယ်။ အော်သံတွေကြောင့် စစ်ကားလူတွေ နိုးလာတယ်။ ဒါပေမဲ့ ဒေါပုံစန်းမြင့်က ချွတ်ကိုဝှေ့ယမ်းပြီး အားလုံးကို လှမ်းသတိပေးတယ်။

“မဆိုင်တဲ့သူ မကပ်နဲ့နော်၊ ငါတို့က သေမထူး နေမထူးတွေကွ၊ မင်းတို့လာရင် ငါလည်း ညှာမှာမဟုတ်ဘူး”

ဒေါပုံစန်းမြင့်ရဲ့ ခြိမ်းခြောက်မှုက တော်တော်တာသွားတယ်။ ဘယ်သူမှ အနားကိုမကပ်ရဲဘူး။ အခြေအနေကို ကြည့်လိုက်တော့ ဘိုနီတို့ သုံးယောက်လုံးမှာ လက်နက်ကိုယ်စီနဲ့ဆိုတော့ အားလုံးက ရှိန်နေကြတယ်။ စစ်ကားကလည်း နေရာမှာတင် ပွဲချင်းပြီး သေသွားတယ်။ ချက်ချင်းဆိုသလို အင်းစိန်ထောင်ဟာ ကမ္ဘာပျက်သလို ဆူညံသွားတယ်။ ထောင်ဝန်ထမ်းတွေလည်း ရောက်လာပြီး ဘိုနီတို့ကို သေနတ်နဲ့ချိန်ထားတယ်။ ပြီးတော့ အပြင်ခေါ်ထုတ်၊ ခြေကျင်းခတ်ပြီး ထုံးစံအတိုင်း စစ်ခွေးတိုက်ကို ပို့လိုက်တယ်။ စစ်ခွေးတိုက်ကိုရောက်တော့ ထောင်တွင်းလူသတ်မှုအတွက် တရားစွဲခံရမယ်ဆိုတာ ဘိုနီက သဘောပေါက်ထားတယ်။ ဒီတော့ စစ်ခွေးတိုက်မှာ ကိုယ့်ကိုယ်ကိုယ် ကျန်းမာအောင်နေတယ်။ နောက်တော့ သူတို့သုံးယောက်လုံးကို လူသတ်မှုအတွက် တရားရုံးမှာ စွဲတင်ပို့ပြီး နောက်ထပ် ထောင်ဒဏ် ၁၀ နှစ် ချမှတ်လိုက်တယ်။

ဘိုနီတို့ကို ရုံးထုတ်တော့ အင်းစိန် CID က ဟောင်ကောင်ဂျက်မဆိုပြီး နာမည်ကြီးနေတဲ့ အမျိုးသမီးရဲအရာရှိက သူတို့အမှုကို စိတ်ဝင်စားလို့ လာကြည့်တယ်။ အချုပ်ခန်းထဲမှာ ရဲတွေက ဘိုနီတို့ကို ပုံစံထိုင်ခိုင်းတယ်။ ဒါပေမဲ့ ဘိုနီတို့က မထိုင်ဘူး။ ဟောင်ကောင်ဂျက်မရောက်လာတော့ ဘာလို့ ပုံစံမထိုင်သလဲဆိုပြီး သူတို့ကို “ဖြဲ” တာပေါ့။ ရေဘ၀ဲဘိုနီက ထောင်ပါးဝနေပြီ။ ဟောင်ကောင်ဂျက်မကို ပြန် “ကော” တယ်။

“ပုံစံထိုင်တယ်ဆိုတာ အင်းစိန်ထောင်ထဲမှာ အကျဉ်းထောင်ဥပဒေအရ ထိုင်ရတာ၊ အခု ကျုပ်တို့က ရဲအချုပ်ခန်းထဲမှာမို့လို့ ပုံစံထိုင်စရာမလိုဘူး၊ ဒါကြောင့် ခင်ဗျား ကြိုက်သလိုလုပ်နိုင်တယ်”

ဘိုနီ့စကား ကြားကြားချင်း ဟောင်ကောင်ဂျက်မက ဒေါသမထွက်ဘဲ သဘောကျသွားတယ်။ ပြီးတော့ “ဒါကြောင့် ရေဘ၀ဲဘိုနီဆိုပြီး ထောင်ထဲမှာ နာမည်ကြီးနေတာကိုး” လို့ မှတ်ချက်ချပြီး သူတို့သုံးယောက်ကို ထမင်းဝယ်ကျွေးသွားတယ်။ တောင်ဥက္ကလာမှာ မွေးပြီး ရိုးရိုးသားသား ဈေးရောင်းတဲ့ အသက်မွေးဝမ်းကျောင်းမှုနဲ့ ရှင်သန်ခဲ့တဲ့ ဘိုနီဟာ နောက်ဆုံးတော့ ထောင်ဆိုတဲ့ ဘ၀တက္ကသိုလ်ရဲ့ ဖမ်းစားခြင်းကိုခံရပြီး ရေဘ၀ဲဘိုနီဆိုတဲ့ မိုက်ဂုဏ်အမည်တစ်ခုကို ရရှိခဲ့တယ်။ ဒါ့အပြင့် ထောင်ထဲမှာ ရှင်သန်မှုအတွက် အစွမ်းကုန် မိုက်ရင်း အကျဉ်းထောင်သံသရာမှာ ကျင်လည်ခဲ့ရတယ်။

အခုတော့ ဒီအဖြစ်အပျက်တွေဟာ နှစ်ပေါင်းများစွာ ကြာခဲ့ပါပြီ။ ဒါပေမဲ့ ရေဘ၀ဲဘိုနီထက် ဆိုးတဲ့သူတွေ ရှိသေးတယ်။ သူတို့ကတော့ ဆေးမှုနဲ့ထောင်ကျတဲ့ ဇော်သူရဲ့ အမှုတွဲ -------- ရဲ့ အသည်းကို ချက်စားတဲ့ ဘဂျမ်းပဲ။
(ဆက်လက်ဖော်ပြပါမည်)
ဇော်သက်ထွေး

Category: 

Share