ရခိုင်ပြည်နယ်လွှတ်တော်တွင် လစ်လပ်နေသော ဒုဥက္ကဋ္ဌနေရာအတွက် ဖြစ်နိုင်ခြေရှိသူ လေးဦးရှိ

ရခိုင်ပြည်နယ်လွှတ်တော်အတွင်း၌ လစ်လပ်နေသည့် ပြည်နယ်လွှတ်တော်ဒုဥက္ကဋ္ဌနေရာအတွက် အစားထိုးရန် ရခိုင်အမျိုးသားပါတီမှ ဦးအောင်ဝင်း၊ ဦးကျော်ဇောဦး၊ ဦးမောင်မောင် (ခ) ဦးမောင်လှဖေ၊ ဦးကျော်လွင် တို့လေးဦးအနက် တစ်ဦးကို လစ်လပ်နေရာတွင် အစားထိုးရန်ပါတီအနေဖြင့် အကြံပြုထားကြောင်း ANP ပါတီ အတွင်းရေးမှူး ဦးထွန်းအောင်ကျော်က ပြောသည်။

ရခိုင်ပြည်နယ် လွှတ်တော်ဒုဥက္ကဋ္ဌနေရာတွင် ANP ပါတီမှ ဦးဖိုးမင်းက တာဝန်ယူ ဆောင်ရွက်ခဲ့သော်လည်း ပြီးခဲ့သည့် ဇွန် ၁၇ ရက် ည ၉ နာရီတွင် အစာအိမ်ကင်ဆာဖြင့် ကွယ်လွန်သွားခဲ့သဖြင့် ၄င်း၏နေရာအား အစားထိုး ရွေးချယ်ရန်အတွက် လမ်းညွှန်မှုပြုပါရန် ANP ပါတီမှ ပြည်နယ်လွှတ်တော်ကိုယ်စားလှယ်များက တောင်းဆိုသောကြောင့် ဇူလိုင် ၉ ရက် နံနက် ၉ နာရီတွင် စစ်တွေမြို့ရှိ ANP ပါတီရုံးချုပ်၌ ပါတီမှ CEC အဖွဲ့များနှင့် ပါတီမှ ပြည်နယ်လွှတ်တော်ကိုယ်စားလှယ်များ တွေ့ဆုံခဲ့ကြောင်း သိရသည်။

“ကျွန်တော်တို့ပါတီက ရခိုင်ပြည်နယ်မှာ အများဆုံးနိုင်ထားတဲ့ပါတီ ဖြစ်ပါတယ်။ အခု ကွယ်လွန်သွားတဲ့ ဦးဖိုးမင်းကလည်း ကျွန်တော်တို့ ပါတီကပါပဲ။ နောက်ထပ် သူ့နေရာမှာ ရွေးချယ်ဖို့အတွက်ကိုလည်း ကျွန်တော်တို့ ပါတီထဲကသူဆိုတော့ ပါတီအနေနဲ့ ဘယ်သူ့ကို ရွေးချယ်ပါလို့ မတိုက်တွန်းပါဘူး။ သို့သော် ရွေးကောက်တင်မြှောက်တဲ့နေရာမှာ ဘယ်လိုအရည်အချင်းတွေနဲ့ လူကို ရွေးချယ်ပါလို့ မူချပေးတယ်။ အဲဒါတွေကတော့ ရွေးချယ်ခံရတဲ့သူက ပါတီရဲ့ ဗဟိုအလုပ်အမှုဆောင် ဖြစ်ရမယ်။ သင့်တင့်တဲ့ ပညာအရည်အချင်း ရှိရမယ်။ ပါတီအပေါ်မှာ သစ္စာရှိသူဖြစ်ရမယ်။ ပါတီရဲ့ ထုတ်ပြန်တဲ့ သဘောထား ကြေညာချက်တို့ မူဝါဒတို့ အမိန့်တို့ကို တိကျစွာ လေးစားလိုက်နာသူဖြစ်ရမယ်ဆိုတဲ့ မူဝါဒကိုပဲ ချပေးလိုက်တယ်။ ကျန်တာကတော့ လွှတ်တော်ကိုယ်စားလှယ်တွေအနေနဲ့ သူတို့လွတ်လပ်စွာ ရွေးချယ်ကြပါလိမ့်မယ်”ဟု ANP ပါတီအတွင်းရေးမှူး ဦးထွန်းအောင်ကျော်က ပြောသည်။

ပါတီမှ မူချပေးသည့်အချက်များအပေါ်တွင် လွှတ်တော်ကိုယ်စားလှယ်များ ရွေးချယ်မည်ဆိုပါက လက်ရှိ ANP ပါတီမှ ပြည်နယ်လွှတ်တော်တွင် ရောက်ရှိနေသူ ၂၂ ဦးထဲမှ လေးဦးသာ ပါတီ၏ CEC အဖွဲ့ဝင်များ ဖြစ်သည့်အတွက် ၄င်းတို့လေးဦးထဲမှ တစ်ဦးဖြစ်နိုင်ကြောင်း ၄င်းက ထပ်မံပြောကြားခဲ့သည်။
လက်ရှိ ပါတီအတွင်း ပြည်နယ်လွှတ်တော် ကိုယ်စားလှယ်လည်းဖြစ်၊ CEC အဖွဲ့ဝင်လည်းဖြစ်သည့် လေးဦးမှာ ANP ပါတီ၏ အတွင်းရေးမှူးအဖွဲ့ဝင် ဦးအောင်ဝင်း (မြေပုံမြို့နယ်မှ ပြည်နယ်လွှတ်တော်ကိုယ်စားလှယ်)၊ ပါတီ၏ အတွင်းရေးမှူးအဖွဲ့ဝင်  ဦးမောင်မောင်(ခ) ဦးမောင်လှဖေ (ကျောက်ဖြူမြို့နယ်၊ ပြည်နယ် လွှတ်တော်ကိုယ်စားလှယ်)၊ ပါတီ၏ CEC အဖွဲ့ဝင် ဦးကျော်ဇောဦး၊ ပါတီ၏ CEC အဖွဲ့ဝင် ဦးကျော်လွင် (ကျောက်ဖြူမြို့နယ် ပြည်နယ်လွှတ်တော်ကိုယ်စားလှယ်)တို့ဖြစ်ကြောင်းသိရသည်။
ပိုင်လေး

Category: 

Share