စည်ပင်ရွေးကောက်ပွဲကျင်းပရန် စီစဉ်နေသော်လည်း အာဏာလိုချင်သူများကို ကြောက်ရွံ့နေဟု ရန်ကုန်မြို့တော်ဝန်ပြောကြား

ရန်ကုန်မြို့တော် စည်ပင်သာယာရေးကော်မတီဝင်များ ရွေးကောက်ပွဲကို ကျင်းပပေးရန် စီစဉ်နေပြီ ဖြစ်သော်လည်း အာဏာလိုချင်သူများကို ကြောက်ရွံ့နေကြောင်း ရန်ကုန်မြို့တော်ဝန်ဦးမောင်မောင်စိုးက ပြောကြားခဲ့သည်။

ရွှေတိဂုံဘုရား တောင်ဘက်မုခ်ရှိ စည်ပင်သာယာဓမ္မာရုံ၌ ဇူလိုင် ၂၃ ရက်က ပြုလုပ်ခဲ့သည့် ၀ါဆိုသင်္ကန်းကပ်လှူပွဲတွင် ၄င်းက Tomorrow ဂျာနယ်သို့ အထက်ပါအတိုင်းပြောကြားခဲ့ခြင်းဖြစ်သည်။

“စည်ပင်သာယာရွေးကောက်ပွဲက ကျင်းပပေးဖို့ လုပ်နေတယ်။ ရွေးကောက်ပွဲမှာ စနစ်တကျဖြစ်အောင်လို့ပါ။ အခုလောလောဆယ်မှာ ခြောက်လအတွင်း ပထမမူကြမ်းရေးဆွဲမယ်။ ဆွဲပြီးတာနဲ့ တစ်ပြိုင်တည်း လွှတ်တော်ကိုယ်စားလှယ်ပါတဲ့အဖွဲ့က ပြန်သုံးသပ်မယ်။ ဘာလို့လဲဆိုတော့ ပြီးခဲ့တဲ့နှစ်က ရွေးကောက်ပွဲမှာ ဥပဒေတွေကို သိတယ်မဟုတ်လား။ လုပ်ချင်တိုင်းလုပ်၊ လိုချင်တာဆွဲသွားတဲ့အတွက်ကြောင့် စည်ပင်သာယာ လည်း နာမည်ပျက်။ အကုန်လုံးလည်း ပျက်တာမဖြစ်စေချင်ဘူး။ အရင်တုန်းက တွေ့ခဲ့တဲ့လူတွေက တကယ်ကို အာဏာလုပွဲကြီးလို တော်တော်ကြောက်စရာကောင်းတယ်”ဟု မြို့တော်ဝန်ကဆိုသည်။

ရန်ကုန်မြို့တော် စည်ပင်သာယာရေးကော်မတီတွင် အဖွဲ့ဝင်များကို မြို့တော်ဝန်နှင့် ကော်မတီဝင်ငါးဦးအား အစိုးရက တိုက်ရိုက်ခန့်အပ်ခြင်းဖြစ်ပြီး ကျန်ကော်မတီဝင်များကို ရွေးကောက်ပွဲများ ပြုလုပ်၍ ခန့်အပ်ရခြင်းဖြစ်ကြောင်း သိရသည်။
“လူတွေကို ရွေးတဲ့အခါမှာလည်း စနစ်တကျနဲ့  ပြည်သူကို အကျိုးပြုတဲ့၊ လူတွေကိုဒုက္ခမပေးတဲ့သူ ကျွန်တော်က လိုချင်တယ်။ အမှန်တိုင်းပြောရရင် လူထုအကျိုးပြုပြီး အနစ်နာခံတဲ့သူကို လိုချင်ပါတယ်။ နို့မို့ဆိုရင် စည်ပင်သာယာနာမည်လည်း အဖတ်ဆယ်လို့ ရမှာမဟုတ်တော့ဘူး”ဟု မြို့တော်ဝန်ဦးမောင်မောင်စိုးက ဆက်လက်ပြောကြားသည်။

မင်းသီဟန်

Category: 

Share