ငြိမ်းချမ်းရေးဆွေးနွေးပွဲတွင် ယုံကြည်မှုသုညအဆင့်သာရှိဟု ဦးခူးဦးရယ်ဆို

အစိုးရသစ်လက်ထက်တွင် အစိုးရနှင့် တိုင်းရင်းသားလက်နက်ကိုင်အဖွဲ့များအကြား ယုံကြည်မှု တည်ဆောက်နိုင်ရေးအတွက် ဆွေးနွေးလာသည်မှာ ၁၄ လ ကြာ မြင့်ခဲ့သော်လည်း လက်ရှိ အချိန်ထိ ယုံကြည်မှုအခြေအနေမှာ သုညအဆင့်သာရှိနေသေးသည်ဟု ခံစားရကြောင်း နိုင်ငံရေးဆိုင်ရာ ညှိနှိုင်းဆွေးနွေးရေး ကိုယ်စားလှယ်အဖွဲ့ (DPN) ခေါင်းဆောင် ဦးခူးဦးရယ်က ပြောသည်။

“ကျွန်တော်တို့ UNFC တိုင်းရင်းသားလက်နက်ကိုင်အဖွဲ့တွေနဲ့ အစိုးရအဖွဲ့တွေအကြား ယုံကြည်မှု တည်ဆောက်နိုင်ရေး ဆွေးနွေးလာတာ အချိန် ၁၄ လ ကြာမြင့်ခဲ့ပါပြီ။ ယနေ့အချိန်ထိ ယုံကြည်မှုအခြေအနေက သုညအဆင့်သာ ရှိပါသေးတယ်။ ဒါကြောင့် ဆွေးနွေးတဲ့အချိန်တွေ ကြာလာတာနဲ့အမျှ ယုံကြည်မှု တည်ဆောက်ရေး ပိုမိုခက်ခဲလာရင် ပြဿနာများ ယခုထက် ပိုမိုရှုပ်ထွေးလာနိုင်ပါတယ်။ ဒါကြောင့် ဆွေးနွေးပွဲများ အောင်မြင်ရေးအတွက် နှစ်ဖက်ကိုယ်စားလှယ်များ တိုင်းပြည်ပေါ်မှာ ထားရှိတဲ့စိတ်ရင်း စေတနာက ပိုပြီးအရေးကြီးပါတယ်” DPN အဖွဲ့ခေါင်းဆောင် ဦးခူးဦးရယ်က ပြောသည်။

အစိုးရ၏ ငြိမ်းချမ်းရေးကော်မရှင်နှင့် ညီညွတ်သော တိုင်းရင်းသားလူမျိုးများ ဖက်ဒရယ်ကောင်စီ၏ နိုင်ငံရေးဆိုင်ရာ ညှိနှိုင်းဆွေးနွေးရေး ကိုယ်စားလှယ်အဖွဲ့တို့သည် ရန်ကုန်မြို့ ရွှေလီလမ်းရှိ အမျိုးသားပြန်လည်သင့်မြတ်ရေးနှင့် ငြိမ်းချမ်းရေးဗဟိုဌာန၌ သြဂုတ် ၁၀ ရက် နှင့် ၁၁ ရက်တို့တွင် ပြုလုပ်ခဲ့သည့် ဆဋ္ဌမအကြိမ်အစည်းအဝေးတွင် သတင်းထုတ်ပြန်ချက်တစ်စောင်ကိုလည်း ထုတ်ပြန်ခဲ့ကြောင်း၊ ယင်းထုတ်ပြန်ချက်မှာ ငြိမ်းချမ်းရေးကော်မရှင်နှင့် DPN ကိုယ်စားလှယ်အဖွဲ့တို့ ဆဋ္ဌမအကြိမ် အစည်းအဝေးတွင် DPN ၏ အဆိုပြုချက် ကိုးချက်အပေါ် ပွင့်ပွင့်လင်းလင်းရင်းရင်းနှီးနှီး ဆွေးနွေးနိုင်ခဲ့ကြောင်း၊ ဆွေးနွေးချက်ရလဒ်များကို နှစ်ဖက် သက်ဆိုင်ရာခေါင်းဆောင်များထံသို့ တင်ပြကြမည်ဖြစ်၍ ယခုတွေ့ဆုံမှုသည် နှစ်ဦးနှစ်ဖက်နားလည်မှုနှင့် ယုံကြည်မှုများ ပိုမိုခိုင်မာလာခဲ့ပြီး ရေရှည်တည်တံ့ခိုင်မြဲသော ငြိမ်းချမ်းရေးဖြစ်စဉ်တွင် အတူတကွ ပါဝင်လာနိုင်ရန် ဆက်လက်ညှိနှိုင်းသွားမည်ဖြစ်ကြောင်း ထုတ်ပြန်ချက် ထုတ်ပြန်ခဲ့သည်။

              
ပိုင်လေး

Category: 

Share