ကမ္ဘာပေါ်တွင် မြန်မာနိုင်ငံသည် ကျောင်းထွက်နှုန်းအများဆုံးဖြစ်နေ ကျောင်းထွက်နှုန်းလျော့ကျစေရန် ဝိုင်းဝန်းလုပ်ဆောင်သင့်ကြောင်း ပညာရေးဝန်ကြီးတိုက်တွန်း

ကမ္ဘာပေါ်တွင် မြန်မာနိုင်ငံသည် ကျောင်းထွက်နှုန်း အများဆုံးနိုင်ငံဖြစ်သောကြောင့် ကျောင်းထွက်နှုန်း လျော့ကျစေရန် ဝိုင်းဝန်းလုပ်ဆောင်သင့်ကြောင်း ပညာရေးဝန်ကြီးဌာန ပြည်ထောင်စုဝန်ကြီး ဒေါက်တာမျိုးသိမ်း ကြီးက ပြောကြားလိုက်သည်။
အောက်တိုဘာ ၂၂ ရက်မှ ၂၈ ရက်အထိ ပညာရေးတက္ကသိုလ်၌ ပြုလုပ်ခဲ့သည့် ၂ဝ၁၇-၁၈ ပညာသင်နှစ် အခြေခံပညာမူလတန်းနှင့် အလယ်တန်းအဆင့် စာမေးပွဲဆိုင်ရာအလုပ်ရုံဆွေးနွေးပွဲတွင် ယခုကဲ့သို့ ပြောကြားခဲ့ခြင်းဖြစ်သည်။
“မြန်မာနိုင်ငံက ကမ္ဘာပေါ် မှာ ကျောင်းထွက်နှုန်း အများဆုံးနိုင်ငံ ဖြစ်တဲ့အတွက်ကြောင့် ကျောင်းထွက်နှုန်းကို လျှော့ချချင်တယ်။ ဒီလိုကျောင်းထွက်နှုန်းကို လျှော့ချချင်တဲ့အခါကျတော့ ဒီကလေးတွေက တစ်တန်းချင်း တစ်တန်းတက်တဲ့အခါကျရင် သူတို့ သင်ယူတတ်မြောက်ရမယ့် ဘာသာတွေမှာ သင်ယူတတ်မြောက်မှု အရည်အသွေးကောင်းမှရမယ်။ ကလေးတွေရဲ့ သင်ယူတတ်မြောက်မှု အရည်အသွေးကောင်းဖို့ဆိုရင် ဘယ်သူတွေအပေါ် သက်ရောက်နေလဲဆိုတော့ ဆရာကောင်းတွေပေါ်မှာ မူတည်တယ်”ဟု ၄င်းကပြောသည်။
ဆက်လက်၍ မူလတန်းအဆင့်မှ စတင်တွက်ချက်မည်ဆိုပါက ၇၅ ရာခိုင်နှုန်းသာ စတုတ္ထ တန်းအထိ ရောက်ရှိပြီး အဋ္ဌမ တန်းအဆင့်၌ ၅၅ ရာခိုင်နှုန်းသာ ကျန်ရှိနေခြင်းကြောင့် ကျောင်း ထွက်နှုန်းမြင့်မားနေသဖြင့် သင်ယူ တတ်မြောက်မှုနှုန်း တိုးမြှင့်လုပ် ဆောင်ရမည်ဖြစ်ကြောင်း ၄င်းက တိုက်တွန်းပြောဆိုခဲ့သည်။
၂ဝ၁၇-၁၈ ပညာသင်နှစ်၌ တစ်နိုင်ငံလုံး အတိုင်းအတာအရ စတုတ္ထတန်း၌ ပညာသင်ကြားနေသူ ကိုးသိန်းကျော်ရှိပြီး အဋ္ဌမတန်း၌ ပညာသင်ကြားနေသူ ခြောက်သိန်းကျော်ရှိကြောင်း သိရသည်။               ဇင်မင်း

 

Category: 

Share