ဒဂုံတောင် ခြင်းလုံးအားကစားရုံနေရာတွင် မီးသွေးလုပ်ငန်း လုပ်ကိုင်နေခြင်းအား မြေပိုင်ဆိုင်မှု ခိုင်မာစွာမပြနိုင်က ဖယ်ရှားရှင်းလင်းမည်ဟု ရန်ကုန်မြို့တော်ဝန်ပြောကြား

ဒဂုံမြို့သစ် (တောင်ပိုင်း) မြို့နယ်၊ ၁၉ ရပ်ကွက်၊ ဇေယျမြိုင်လမ်းရှိ မူလမြို့မြေကွက်ဖော်စဉ် သတ်မှတ်ထားသည့် ခြင်းလုံး အားကစားရုံ မြေနေရာတွင် မီးသွေးလုပ်ငန်း လုပ်ကိုင်တည်ရှိနေမှုနှင့် ပတ်သက်၍ မြေပိုင်ဆိုင်မှု အထောက်အထား ပြသနိုင်ခြင်းမရှိပါက ဥပဒေကြောင်းအရ ဖယ်ရှားရှင်းလင်းခြင်း ပြုလုပ်သွားမည်ဖြစ်ကြောင်း ရန်ကုန်မြို့တော်ဝန် ဦးမောင်မောင်စိုးက ပြောသည်။

“ယခင် မြေစီမံခန့်ခွဲမှုဆိုင်ရာ လွှဲပြောင်းပေးအပ်ခဲ့တဲ့ မြို့ပြနှင့် အိမ်ရာဖွံ့ဖြိုးရေးဦးစီးဌာနကို မြေပါမစ်၊ မြေငှားစာချုပ် (ဂရန်) ခွင့်ပြုချထားခြင်း ရှိ၊ မရှိ စိစစ်ဆောင်ရွက်သွားပါမယ်။ စိစစ်ဆောင်ရွက်ခြင်းများအရ မြေချပါမစ်/မြေငှားစာချုပ်(ဂရန်) ခွင့်ပြုချထားခြင်း မရှိကြောင်းနဲ့ မြေပိုင်ဆိုင်မှု အထောက်အထား တစ်စုံတစ်ရာ မရှိကြောင်း ပေါ်ပေါက်ခဲ့ပါက မြေပြင်ကျူးကျော် အသုံးပြု တည်ရှိမှုကို ဥပဒေကြောင်းအရ ရှင်းလင်းဆောင်ရွက်သွားမှာ ဖြစ်ပါတယ်”ဟု ရန်ကုန်မြို့တော်ဝန် ဦးမောင်မောင်စိုးက ပြောကြားသည်။

ပြီးခဲ့သည့် နိုဝင်ဘာလ ၁ ရက်က ရန်ကုန်တိုင်းဒေသကြီး လွှတ်တော် ပုံမှန်အစည်းအဝေးတွင် ဒဂုံမြို့သစ်(တောင်ပိုင်း) မြို့နယ်၊ ၁၉ ရပ်ကွက်၊ ဇေယျမြိုင်လမ်းရှိ မူလမြို့မြေကွက်ဖော်စဉ်က သတ်မှတ်ပေးခဲ့သော ခြင်းလုံး အားကစားရုံမြေနေရာအား သက်ဆိုင်ရာက ပွင့်လင်းမြင်သာစွာ ရှင်းလင်း၍ မူလအတိုင်း ခြင်းလုံး အားကစားရုံအဖြစ် ပြန်လည် သတ်မှတ်ပေးရန် အစီအစဉ် ရှိ/ မရှိ သိရှိလိုကြောင်း ဒဂုံမြို့သစ် (တောင်ပိုင်း) မဲဆန္ဒနယ် အမှတ် (၁)မှ တိုင်းဒေသကြီး လွှတ်တော် ကိုယ်စားလှယ် ဦးညီညီ၏ မေးခွန်း မေးမြန်းမှုနှင့်ပတ်သက်၍ ရန်ကုန်မြို့တော် ၀န်ဦးမောင်မောင်စိုးက အထက်ပါအတိုင်း ပြန်လည်ဖြေကြားခဲ့ခြင်းဖြစ်ကြောင်း သိရသည်။
ယင်းမြေနေရာသည် မြို့ပြနှင့် အိမ်ရာဖွံ့ဖြိုးရေးဦးစီးဌာနမှ ၁၉၉၆-၁၉၉၇ ခုနှစ် မြေစီမံမှုဆိုင်ရာ လွှဲပြောင်းပေးအပ်စဉ်က မြို့ကွက်ကျမြေပုံတွင် မြေကွက်အမှတ်ရေးထိုးပါဝင်ပြီး ဖြစ်သော်လည်း မြို့မြေစာရင်း၊ မြေငှားခ စည်းကြပ်မှုစာရင်းနှင့် မြို့ကွက်ကျ မြေပုံတို့တွင် အမည်ပေါက် တစ်စုံတစ်ရာ မှတ်သားထားခြင်း မရှိသည့်အပြင် ခြင်းလုံး အားကစားရုံအမည်ဖြင့်လည်း ပါဝင်ခြင်း မရှိသည်ကို စိစစ်တွေ့ရှိရကြောင်း ရန်ကုန်မြို့တော်ဝန် ဦးမောင်မောင်စိုးက ပြောသည်။

သို့သော် ယင်းမြေပြင်ပေါ်ရှိ မီးသွေးလုပ်ငန်း လုပ်ကိုင်တည်ရှိမှုအား မြေပိုင်ဆိုင်မှု အထောက်အထားများ၊ မြေအသုံးချမှုနှင့် ပတ်သက်၍ သက်ဆိုင်ရာရပ်ကွက်၊ မြို့နယ် အထွေထွေ အုပ်ချုပ်ရေး ဦးစီးဌာနတို့ဖြင့် ပူးပေါင်းစိစစ်ခြင်း လုပ်ငန်းများကို လုပ်ကိုင် ဆောင်ရွက်သွားမည် ဖြစ်ကြောင်းနှင့် မြေပြင်ရှင်းလင်း ဖယ်ရှားမှုပြီးစီးပါက မြို့နယ်နေပြည်သူများ၏ လိုအပ်ချက်အပေါ် မူတည်ကာ ခြင်းလုံးအားကစားရုံအဖြစ် တည်ဆောက် အကောင်အထည်ဖော် ဆောင်ရွက်ပေးသွားမည် ဖြစ်ကြောင်း ၄င်းကပြောသည်။

လူသစ်

Category: 

Share