ပြင်ဦးလွင်မြို့အား အာဆီယံပန်းမြို့တော်အဖြစ် ကူးပြောင်းရန်စတင်

ပြင်ဦးလွင်မြို့အား အာဆီယံပန်းမြို့တော်အဖြစ် ကူးပြောင်းပြီး ပန်းစိုက်တောင်သူများ ဝင်ငွေတိုး ဆောင်ရွက်နိုင်ရန်အတွက် စတင်စီစဉ်နေပြီဖြစ်ကြောင်း သိရသည်။
အဆိုပါမြို့အား ပန်းမြို့တော်အဖြစ် ကူးပြောင်းရန် နယ်သာလန်နိုင်ငံမှ ထိပ်တန်းအရည်အသွေးမြင့် ပန်းမျိုးစေ့များ မြန်မာနိုင်ငံသို့ ပထမဦးဆုံး တင်သွင်းစိုက်ပျိုးပြီး ပန်းစိုက်တောင်သူများအား နည်းပညာပံ့ပိုးကူညီ ဆောင်ရွက်သွားမည်ဖြစ်ကြောင်း စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာနမှ သိရှိရသည်။
“ပြင်ဦးလွင် ဒေသမှာရှိတဲ့ ပန်းစိုက်တောင်သူတွေကို ပန်း စိုက်ပျိုးသူများအသင်း အမြန်ဆုံး ဖွဲ့စည်းပေးမှာဖြစ်ပြီး စိုက်ပျိုးမွေးမြူရေးနဲ့ ဆည်မြောင်းဝန်ကြီးဌာနနဲ့ နယ်သာလန်က နည်းပညာအကူအညီနဲ့ ပန်းမျိုးစေ့တွေ ထုတ်ပေးသွားမှာဖြစ်ပါတယ်။ ပန်းစိုက်တောင်သူတွေ စိုက်ပျိုးလုပ်ကိုင်နိုင်အောင် ချေးငွေတွေကိုလည်း ထုတ်ပေးမယ်။ အဓိကတော့ ပန်းစိုက်တောင်သူတွေလည်း ဝင်ငွေတိုးပြီး ပြင်ဦးလွင်မြို့ကို အာဆီယံပန်းမြို့တော် အဖြစ် ကူးပြောင်းသွားဖို့ဖြစ်ပါတယ်”ဟု စိုက်ပျိုးရေးမွေးမြူရေးနှင့် ဆည်မြောင်းဝန်ကြီးဌာန အမြဲ တမ်းအတွင်းဝန် ဒေါက်တာ တင်ထွဋ်က ပြောကြားသည်။
နယ်သာလန်နိုင်ငံသည် ပန်းစိုက်ပျိုးသူ ၆ဝ ရာခိုင်နှုန်းရှိပြီး နိုင်ငံခြားပို့ကုန်အဖြစ် ပန်းတင်သွင်းသည့် ကုမ္ပဏီ ၆၅ဝ ရှိကာ ဥရောပဈေးကွက်အား အခိုင်အမာရရှိထားသော နိုင်ငံဖြစ်သည်။
“နယ်သာလန်နိုင်ငံကနေ ထိပ်တန်းအရည်အသွေးမြင့် ပန်းမျိုးစေ့တွေ တင်သွင်းခြင်းနဲ့အတူ စိုက်ပျိုး နည်းပညာတွေကို အပြည့်အဝကူညီသွားမှာ ဖြစ်ပါတယ်။ ပြင်ဦးလွင်ဒေသက ထွက်ရှိလာတဲ့ ပန်းတွေကိုလည်း ပြည်တွင်း/ ပြည်ပ ဈေးကွက်ဝင်အောင် ကူညီဆောင်ရွက်သွားမယ်”ဟု နယ်သာလန်သံရုံး ကောင်စစ်ဝန်မစ္စတာ ဖရေ့ဒရစ်က ပြောကြားသည်။
လက်ရှိ မြန်မာပြည် ပန်းဈေးကွက်တွင် တရုတ်ဘက်မှ တရားမဝင် တင်သွင်းလာသော ပန်းများက အများဆုံးဖြစ်နေပြီး ဒေသပန်းစိုက်ပန်းတောင်သူများ အထိနာလျက်ရှိရာ ပန်းမျိုးစိတ်အသစ်များဖြင့် ဈေးကွက်ရယူ ဦးမော့နိုင်မည်ဖြစ်ကြောင်း ပန်းစိုက်တောင်သူများ အဆိုအရ သိရသည်။
ဆွေနိုင်စစ်

 

Category: 

Share