မီးသတ်သမား တစ်ယောက်၏ မျှော်လင့်ခြင်း မနက်ဖြန် - ကိုလူသစ်

(ကန်တော်ကြီး ပဲလေ့စ်ဟိုတယ် မီးလောင်မှုသို့ သွားရောက်ငြိမ်းသတ်ရာမှ ထိခိုက်မိကာ ယနေ့တိုင် ပြန်လည်သတိမရသေးသော မီးသတ်ဦးစီးမှူး ဦးကျော်စွာလင်း၏ဖြစ်ရပ်မှန်)

“သူတို့က ကလေးအရမ်း လိုချင်ကြတာ”ဟု မီးသတ်ဦးစီးမှူး ကိုကျော်စွာလင်း၏ မိခင်ဖြစ်သူ ဒေါ်ခင်နှင်း ဆွေကပြောသည်။

ရင်သွေးရရှိရန်အတွက်မှာ ကိုကျော်စွာလင်း ဇနီးမောင်နှံ နှစ်ဦးစလုံးအိပ်မက်တစ်ခု ဖြစ်နေစေခဲ့သည့်အတွက် ဇနီးဖြစ်သူထံတွင် ကိုယ်ဝန်ရှိ၊ မရှိကိုမကြာခဏ ဆိုသလို စစ်ဆေးမှုများ လုပ်ဆောင်ခဲ့ရာ ၂၀၁၇ခုနှစ်၊ အောက်တိုဘာ ၁၉ ရက်သည်လည်း ယင်းသို့ဇနီးသည်ထံ၌ ကိုယ်ဝန်ရရှိခြင်းရှိ၊ မရှိအားစစ်ဆေးရန် ဆရာဝန်များမှ ချိန်းဆိုထားသည့် နေ့ရက်တစ်ရက်ဖြစ်နေလေသည်။

မထင်မှတ်သော ဖြစ်ရပ်များတွင် ရွှေပြည်သာမြို့နယ် မီးသတ်တပ်ဖွဲ့ဦးစီးမှူး ကိုကျော်စွာလင်း၏ ဖြစ်စဉ်သည်လည်း တစ်ခုအပါအ၀င်ဖြစ်ကာ တိုက်ဆိုင်စွာပင် အောက်တိုဘာ ၁၉ ရက် နံနက် ၃ နာရီ၊ မိနစ် ၂၀ ခန့်အချိန်တွင် ဖြစ်ပွားခဲ့သော ကန်တော်ကြီးပဲလေ့စ် ဟိုတယ်၌ မီးလောင်မှုဖြစ်ပွားရာသို့ သွားရောက် မီးငြှိမ်းသတ်ရာမှ ၄င်း၏ ဦးခေါင်းပေါ်သို့ သစ်သားတန်း ပြုတ်ကျခဲ့မှုကြောင့် သတိလစ်သွားခဲ့သည်မှာ ယနေ့တိုင် သတိပြန်မလည်လာနိုင်သေးပေ။

ကိုကျော်စွာလင်းသည် ဖခင် ဦးတင်လှ၊ မိခင်ဒေါ်ခင်နှင်းဆွေတို့မှ မွေးဖွားသည့် မွေးချင်းသုံးယောက်အနက် ဒုတိယမြောက်သားဖြစ်ပြီး မြန်မာနိုင်ငံမီးသတ်တပ်ဖွဲ့သို့ ၂၀၀၀ ခုနှစ်မှ စတင်ကာ တပ်သားဘ၀ဖြင့် ၀င်ရောက်ခဲ့ပြီးနောက် အစ်ကိုဖြစ်သူနှင့် ညီဖြစ်သူတို့ကလည်း မီးသတ်တပ်ဖွဲ့သို့ ၀င်ရောက်လာခဲ့သည်။

ဖခင်ဦးတင်လှိုင်မှာ ရန်ကုန်တိုင်းဒေသကြီး တောင်ဥက္ကလာပမြို့နယ် မီးသတ်တပ်ဖွဲ့တွင် ဒုဦးစီးမှူးအဖြစ် တာဝန်ထမ်းဆောင်ခဲ့ခြင်းကြောင့် ၄င်းကျင်လည်ရာ ပတ်ဝန်းကျင်သည် မီးသတ်တပ်ဖွဲ့ အသိုင်းအ၀ိုင်းဖြစ်သည့် အတွက် မီးဘေးကြိုတင်ကာကွယ်ရေး၊ မီးငြှိမ်းသတ်ရေး လုပ်ငန်းစဉ်များသည် သူ့အတွက်ရင်းနှီးပြီးသား နယ်ပယ်တစ်ရပ်ဖြစ်ကာ အခက်အခဲမရှိခဲ့ပေ။ ၄င်း၏ ပင်ကိုဝါသနာနှင့် စိတ်ထားအရ မီးသတ်ရဲဘော်ဘ၀မှာပင် မီးသတင်းရရှိသည်နှင့်တစ်ပြိုင်နက် မီးလောင်ပြင်သို့ သွားရောက်ငြှိမ်းသတ်ရန်အတွက် အမြဲအစဉ်သင့် ဖြစ်စေရန် ကြိုးစားခဲ့ခြင်း၊ မြန်မာနိုင်ငံ မီးသတ်တပ်ဖွဲ့မှ ပို့ချသည့်သင်တန်းများကိုလည်း တက်ရောက် လေ့လာသင်ယူခဲ့ခြင်းနှင့် မီးလောင်ပြင်သို့ ဘေးဒုက္ခရောက်သူများကို ကူညီကယ်ဆယ်ခြင်း၊ မီးလောင်မှုအခြေအနေအား လေ့လာသုံးသပ်ခြင်း၊ မီးငြှိမ်းသတ်မှုစနစ်နှင့် မီးလောင်ပြင်အတွင်း ၀င်/ထွက် လမ်းကြောင်းများအား အမြဲလေ့လာခဲ့သူဖြစ်သည့်အပြင် သင်ယူမှုများမှ အတွေ့အကြုံများ၊ လက်တွေ့နယ်ပယ်မှ အတွေ့အကြုံများအရ မီးလောင်မှုပေါင်းများစွာ၌ မီးငြှိမ်းသတ်ရာတွင် ရှေ့ဆုံးမှ ရဲဝံ့စွာလုပ်ကိုင်ဆောင်ရွက်ခဲ့သူဖြစ်ကြောင်း သိရသည်။

ထိုသို့ လုပ်ကိုင်ဆောင်ရွက်ခဲ့သည့်အတွက်လည်း မီးသတ်ရဲဘော်ဘ၀မှ တစ်ဆင့် မီးသတ် တပ်ကြပ်ကြီးအဆင့်သို့ ရာထူးတိုးမြှင့် ခြင်းခံခဲ့ရပြီး ၄င်းတပ်ကြပ်ကြီးအဆင့်မှ လက်ထောက်မီးသတ်ဦးစီးမှူး၊ မြို့နယ်မီးသတ်တပ်ဖွဲ့ ဒုတိယဦးစီးမှူး အဆင့်ထိသို့ တက်လှမ်းနိုင်ခဲ့သည်။

“ရဲဘော်ဘ၀ကနေ ၀င်ခဲ့တယ်။ အဲဒီနောက် တပ်ကြပ်ကြီး ဖြစ်တယ်။ တပ်ကြပ်ကြီးကနေ တစ်ပွင့်၊ နောက် နှစ်ပွင့်ဖြစ်တယ်။ အခုသုံးပွင့်နဲ့ ဦးစီးမှူးဖြစ်တာ တစ်နှစ်ကျော်လောက်ရှိပြီ” ဟု ၄င်း၏ မိခင်ဒေါ်ခင်နှင်းဆွေက ပြောကြားခဲ့သည်။

ထိုသို့ ၀ါသနာ၊ စေတနာနှင့် အနစ်နာခံချင်သည့်စိတ်ဖြင့် မီးသတ်တပ်ဖွဲ့အတွင်း ၀င်ရောက်ပြီး လေ့လာခြင်းနှင့် သင်ယူမှုများတွင်သာ အချိန်ပေးလုပ်ဆောင်ခဲ့သည့်အတွက် လူငယ်သဘာဝ အချိန်များစွာ ကုန်ဆုံးခဲ့သော်လည်း ၂၀၁၁ ခုနှစ်တွင် မသူသူကျော်နှင့် တွေ့ဆုံခဲ့ပြီး နှစ်ဦးသဘောတူ လက်ထပ်ထိမ်းမြားပြီး နှစ်ယောက်တစ် အိမ်ထောင်ထူထောင်ခဲ့ကြသည်။

အိမ်ထောင်ပြု ဘုရားတည် ဆေးမင်စုတ်ထိုး ဤသုံးမျိုးချက်မပိုင် နောင်ပြင်ရန်ခက်သည့် အမျိုးဟု မြန်မာစကားပုံများတွင် သာဓကပြုရေးဖွဲ့မှုများရှိသော်လည်း ကိုကျော်စွာလင်းနှင့် မသူသူကျော်တို့၏ နှစ်ဦးသား ပေါင်းဖက်မှုမှာမူ ၄င်းမြန်မာစကားပုံတွင် သာဓကပြုရေးဖွဲ့ထားမှုနှင့် ဆန့်ကျင်ဘက်ဖြစ်စေခဲ့သည်။

စတင်အိမ်ထောင်ပြုခဲ့သည့် ၂၀၁၁ ခုနှစ်မှစတင်ကာ ယနေ့အထိ နှစ်ဦးသားဘ၀တစ်ခု ထူထောင်မှုသည် ငါးနှစ်ကျော် ခြောက်နှစ်ကာလအထိ ရောက်ရှိလာပြီဖြစ်သော်လည်း တစ်ဦးပေါ်တစ်ဦး မေတ္တာထားမှု၊ အပြန်အလှန် နားလည်မှုနှင့် အပြန်အလှန် ယုံကြည်မှုတို့သည်ကာ လျော့နည်းသွားခြင်းမရှိသည့်အပြင် အပြန်အလှန် မေတ္တာသက်ဝင်မှုမှာလည်း ကြင်စဦး ဇနီးမောင်နှံအလား ရှိခဲ့သည်။

သို့သော် နှစ်ဦးသား၏ အပြန်အလှန် မေတ္တာသက်ဝင်မှု လျော့နည်းသွားခြင်း မရှိသော်လည်း မီးသတ်တပ်ဖွဲ့ဝင်တစ်ဦး ဖြစ်သည့် ကိုကျော်စွာလင်းအတွက် လုပ်ငန်းခွင်အတွင်းသာ အချိန်ပေးနေထိုင်မှု များပြားခြင်းကြောင့် အနာဂတ် မျိုးဆက်သစ်ဖြစ်သည့် သားသမီးရတနာမှာမူ အိမ်ထောင်သက် ငါးနှစ် ကျော်လာသည်အထိ ရရှိခြင်းမရှိသေးသည့် အနာဂတ်၏ရင်သွေးအား ထွေးပိုက်နိုင်ရန်မှာ ၄င်းတို့ဇနီး မောင်နှံနှစ်ဦး လိုအပ်နေသည့် ကွက်လပ်လေးတစ်ခုဖြစ်နေစေခဲ့သည်။

တစ်ဖက်တွင်လည်း နိုင်ငံပိုင်ပစ္စည်းများ၊ ပုဂ္ဂလိကပိုင် ပစ္စည်းများ၊ ယဉ်ကျေးမှုအမွေအနှစ်များနှင့် ပြည်သူ့တို့၏ အသက်အိုး အိမ်စည်းစိမ်များကို မီးဘေးနှင့် အခြားသဘာဝဘေး အန္တရာယ်ကြောင့် ပျက်စီးဆုံးရှုံးမှု မဖြစ်ပွားစေရန်အတွက် ကာကွယ်ပေးရန်ဆိုသည့်အချက်သည် မြန်မာနိုင်ငံ မီးသတ်တပ်ဖွဲ့၏ ရည်ရွယ်ချက်များ အနက် တစ်ချက်အပါအ၀င် ဖြစ်နေသလို မီးငြှိမ်းသတ်ရေး၊ ကာကွယ်တားဆီးရေးနှင့် ရှာဖွေကယ်ဆယ်ရေး လုပ်ငန်းတာဝန်များအား ကျေပွန်စွာ ထမ်းဆောင်ရန်အတွက် လုပ်ကိုင်ဆောင်ရွက်စဉ်တွင်မူ မီးသတ်တပ်ဖွဲ့ဝင် အချို့ သေဆုံးမှုများ ရှိခဲ့သည့်အပြင် အသက်အန္တရာယ် စိုးရိမ်ရသည်အထိ ထိခိုက်ဒဏ်ရာရရှိခဲ့မှုများလည်း ရှိခဲ့သည်။

သို့သော် ၂၀၁၇ ခုနှစ်၊ အောက်တိုဘာ ၁၉ ရက်၊ နံနက် ၃ နာရီ၊ မိနစ် ၂၀ ခန့်အချိန်တွင်မူ မင်္ဂလာတောင်ညွန့်မြို့နယ်၊ ဥယျာဉ်ရပ်ကွက်၊ ကန်ရိပ်သာလမ်းနှင့် အထက်ပန်းဆိုးတန်း လမ်းထောင့်ရှိ ကန်တော်ကြီး ပဲလေ့စ်ဟိုတယ်၌ မီးလောင်မှုဖြစ်ပွားနေကြောင်း အသိပေးလာသည့် အကြောင်းကြားမှုတစ်ခုမှာ ကိုကျော်စွာလင်းအတွက် မျှော်လင့်မထားသည့် အခြေအနေတစ်ခုသို့ ရောက်ရှိစေခဲ့သည်။

ကိုကျော်စွာလင်းသည် ထိုသို့ မီးသတင်းရသည်နှင့် တစ်ပြိုင်နက် မီးလောင်မှုဖြစ်ပွားရာ ကန်တော်ကြီးပဲလေ့စ် ဟိုတယ်သို့ မီးသတ်စခန်းရှိရဲဘော် ရဲဘက်များနှင့်အတူ သွားရောက်မီးငြှိမ်းသတ်ခဲ့သည်။

မီးငြှိမ်းသတ်ရာတွင်လည်း ၄င်းအပါအ၀င် မီးသတ်တပ်ဖွဲ့ဝင်အင်အား ၃၀၀ ခန့်၊ ရဲတပ်ဖွဲ့အင်အား ၁၅၀၊ တပ်မတော်သား အင်အား ၅၀ တို့မှ မီးသတ်ယာဉ်အစီး ၅၀ ခန့်ဖြင့် ငြှိမ်းသတ်ခဲ့သော်လည်း စတင် လောင်ကျွမ်းချိန်မှ မိနစ်အနည်းငယ်အကြာတွင် မီးလောင်မှုအဆင့်မှာ တဖြည်းဖြည်း မြင့်တက်လာခဲ့သည့် အတွက် မီးလောင်မှုဖြစ်ပွားရာ ကန်တော်ကြီး ပဲလေ့စ်ဟိုတယ် အတွင်း၌လည်း မီးခိုးလုံးများက တစ်ဖက်သို့ တိုးမပေါက်အောင် အလုံးအရင်းဖြင့် ပျံ့လွင့်နေသည်။

ထိုအချိန်တွင် ကိုကျော်စွာလင်း မီးငြိမ်းသတ်နေသည့် ဦးခေါင်းအထက်ရှိ သစ်သားတန်းမှာ ဦးခေါင်းပေါ်သို့ ပြုတ်ကျခဲ့မှုကြောင့် ဦးနှောက်အမြှေးအောက် သွေးခဲခြင်း၊ ဦးနှောက်အသားထဲ သွေးယိုစိမ်းခြင်းနှင့် ၀ဲနားထင်ရိုးကျိုး ဒဏ်ရာများရရှိခဲ့ပြီး နေရာတွင်ပင် ရရှိဒဏ်ရာများကြောင့် သတိလစ်မေ့မျောခဲ့သည်။

“သူက အရက်သောက်တာ မကြိုက်ဘူး။ သူ့အဖွဲ့အစည်းက ရဲဘော်တွေ အရက်သောက်ရင်လည်း ဆူတယ်။ မီးငြိမ်းသတ်ရတယ်ဆိုတာ သတိအမြဲထားရတယ်။ ကိုယ့်အတွက် အန္တရာယ်ဆိုတာ အချိန်မရွေး ရောက်လာနိုင်တယ်လေ။ အဲဒီအတွက်ကြောင့်လည်းသူက သူ့ရဲဘော်တွေ တစ်စုံတစ်ခုဖြစ်မှာကို အမြဲစိုးရိမ်စိတ် ရှိတယ်။ ဘယ်နေရာမှာပဲ မီးလောင်လောင် မီးသတ်ပြီဆိုရင်လည်း သူကထဲထဲဝင်ဝင်ကို လုပ်တယ်။ ဒါကြောင့်လည်း အခုလိုဖြစ်တာ” ဟု ဒေါ်ခင်နှင်းဆွေက ပြောကြားသည်။

ထိုသို့ သတိလစ်မေ့မျောခဲ့သည့်အတွက် ၄င်းနှင့်အတူပါ မီးသတ်တပ်ဖွဲ့ဝင်များက ကူညီကယ်ဆယ်ခဲ့ပြီးနောက် ရန်ကုန်ဆေးရုံကြီး ဦးနှောက်နှင့် အာရုံကြောသို့ အောက်တိုဘာ ၁၉ ရက် နံနက်ပိုင်း နံနက် ၅ နာရီခွဲ ခန့်အချိန်တွင် တင်ပို့ခဲ့ရသည်။

ထို့နောက် ယင်းနေ့ ၉ နာရီ ၁၅ မိနစ်အချိန်တွင် ဆေးရုံ တာဝန်ရှိသူများက ဦးနှောက်ပိုင်း ခွဲစိတ်မှုများကို အချိန်နှင့် တပြေးညီ လုပ်ဆောင်ခဲ့သည်။ သို့သော် ကိုကျော်စွာလင်း၏ ရရှိဒဏ်ရာမှာ ပြင်းထန် (စိုးရိမ်ရ) အခြေ အနေကြောင့် ဒုတိယအကြိမ် ဦးခေါင်းပိုင်းခွဲစိတ်မှုကို အောက်တိုဘာ ၂၆ ရက် နေ့လယ်ပိုင်းခန့်တွင် ထပ်မံ ခွဲစိတ်ခဲ့ရသည့်အပြင် အသက်ရှုရန် ခက်ခဲမှုကြောင့်လည်း လည်ပင်းတွင် လေပြွန်လမ်းကြောင်းအစား အပေါက် ဖောက်ခဲ့ရပြီး ခွဲစိတ်ပြီးသား ဦးခေါင်းခွံရှိဆဲလ်များ ပုံမှန်လည်ပတ်နိုင်ရန်အတွက် ဦးခေါင်းခွံအား  ၀မ်းဗိုက် တစ်ဖက်တစ်ချက်တွင် ခွဲကာ ထည့်သွင်းထားရသည့် အခြေအနေသို့ ရောက်ရှိခဲ့ရာ  လက်ရှိတွင် ၂၂ ရက် ကျော်လွန်လာသည်အထိ ပြန်လည်သတိရရှိခြင်း မရှိသေးကြောင်းလည်း သိရသည်။

လက်ရှိတွင် ရွှေပြည်သာမြို့နယ် မီးသတ်တပ်ဖွဲ့ဦးစီးမှူး ကိုကျော်စွာလင်း၏ ပြန်လည် သတိရရှိရေးအတွက် ရန်ကုန်ဆေးရုံကြီးရှိ သက်ဆိုင်ရာ ဆရာဝန်များကလည်းကို ကျော်စွာလင်းအား အထူးကြပ်မတ်ဆောင်တွင် ထားရှိကာ ကုသဆောင်ရွက်ပေးလျက်ရှိသည့်အပြင် မြန်မာနိုင်ငံ မီးသတ်တပ်ဖွဲ့မှလည်း နေ့စဉ် မီးသတ်တပ်ဖွဲ့ဝင် သုံးဦးမှ ငါးဦးအထိအား ၄င်း၏ မိသားစုများဝိုင်းဝန်းကူညီ လုပ်ဆောင်ရန် စေလွှတ်ထားကြောင်းလည်း သိရသည်။

သို့သော် ကိုကျော်စွာလင်းသည် လက်ရှိအချိန်၌ မီးလောင်ပြင်အတွင်း ရရှိဒဏ်ရာများကြောင့် ရန်ကုန်ဆေးရုံကြီး ဦးနှောက်နှင့် အာရုံကြောဌာန၏ အထူးကြပ်မတ်ဆောင်အတွင်း သတိလစ်မေ့မျောမှုနှင့် အတူ ရရှိဒဏ်ရာများအား ဆေးဝါးကုသလျက်ရှိသော်လည်း ကိုကျော်စွာလင်း မသိရှိရသေးသည့် အခြေအနေတစ်ရပ်မှာ ၄င်း၏ ဇနီးဖြစ်သူ မသူသူကျော်ထံ၌ ၄င်းအတွက် လိုအပ်နေသည့် ကွက်လပ်ကလေးအား ဖြည့်ဆည်းနိုင်မည့်  အခြေအနေ တစ်ရပ်ဖြစ်သော ကိုယ်ဝန်ရရှိနေခြင်းပင်ဖြစ်သည်။

“မနက်၁၀ နာရီလောက်ဆိုရင် ဆရာဝန်နဲ့ပြရအချိန်၊ ဒီမှာအခုလိုဖြစ်တော့ သူမိန်းမကလည်း ပြေးလွှားနေရတာ သူ့ကိုယ်သူ ကိုယ်ဝန်ရှိမှန်းတောင်မသိဘူး။ သူတို့က ကလေးအရမ်းလိုချင်တာ။ ဟိုတနေ့ကမှ ပြန်စစ်ကြည့်လိုက်မှ ကိုယ်ဝန်ရှိမှန်းသိရတာ။ အခုအချိန်အထိတော့ သူ သတိမရသေးဘူး။ ပြောနိုင်ဆိုနိုင်တဲ့ အခြေအနေမျိုး မဟုတ်သေးဘူး ဆိုပေမယ့် အသံကိုတော့ သူကြားနိုင်မယ်ထင်တယ်။ ဒါကြောင့် သူမိန်းမမှာ ကိုယ်ဝန်ရနေပြီဆိုတာကိုတော့ ပြောကြည့်ထားတယ်။ အဲ့ဒါကလည်းအားတစ်ခု ဖြစ်နိုင်တယ်လေ”ဟု မိခင်ဖြစ်သူ ဒေါ်ခင်နှင်းဆွေက ပြောခဲ့သည်။

 မီးသတ်တပ်ဖွဲ့ဝင် တစ်ဦးဖြစ်သည့် ကိုကျော်စွာလင်းအနေဖြင့် ပြီးခဲ့သည့် အောက်တိုဘာ ၁၉ ရက်နေ့တွင် ဖြစ်ပွားခဲ့သော ကန်တော်ကြီးပဲ့လေ့စ်ဟိုတယ် မီးလောင်မှုဖြစ်ပွားမှုအတွင်း တစ်စုံတစ်ရာ ထိခိုက်ဒဏ်ရာရရှိခဲ့ခြင်း မရှိပါက ၄င်းမည်သို့ ပျော်ရွှင်နေမည်ဆိုသည်ကို ပြောကုန်နိုင်ဖွယ်ရှိမည်မထင်။ သို့သော် လက်ရှိမှာတော့ ဇနီးသည်ထံ ကိုယ်ဝန်ရရှိမှုကလည်း ကိုကျော်စွာလင်း သတိပြန်လည်ရရှိလာရန် အားအင်တစ်ခု ဖြစ်လာမည်လားဆိုသည်ကိုတော့ ရင်ခုန်တိုးတိတ်စွာ စောင့်ကြည့်ရပေဦးမည်။

ကိုလူသစ်

Category: 

Share