အမရပူရ မြို့ပြစီမံကိန်းမှ လှူဒါန်းသောကျောင်းကို “ဒေါ်အောင်ဆန်းစုကြည်ကျောင်း”ဟု အမည်ပေး

နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နှင့်ငြိမ်းချမ်းရေးစကားဝိုင်း ပြုလုပ်ခဲ့သော ၀မ်းတွင်း မြို့နယ် မြေတိုင်ကန်ကျေးရွာမှ တောင်းဆိုခဲ့သော မူလတန်းလွန်ကျောင်းဆောင်မှာ ဆောက်လုပ်ပြီးစီးသွား ပြီဖြစ်သည်။ ယင်းကျောင်းဆောင်အသစ် ဆောက်လုပ်ရန် မန္တလေး အမရပူရမြို့ပြဖွံ့ဖြိုးရေးစီမံကိန်း(MBCCD)  ကုမ္ပဏီမှ လှူဒါန်းခြင်းဖြစ်ပြီး ယင်းကျောင်းဆောင်ကို “ ဒေါ်အောင်ဆန်းစုကြည်ကျောင်း“ ဟု အမည် မှည့်ခေါ် ပေးခဲ့သည်။

မန္တလေးအမရပူရမြို့ပြဖွံ့ ဖြိုးရေးစီမံကိန်း (MBCCD)ကို ဆောက်လုပ်ရေးလုပ်ငန်းရှင် ဦးမောင်ဝိတ်မှ ပိုင်ဆိုင်ပြီး မြေတိုင်ကန်ကျေးရွာရှိ မြေဧက ၁.၅ ဧကကို ၀ယ်ယူပြီးလှူဒါန်းခဲ့ခြင်းဖြစ်သည်။ ဦးမောင်ဝိတ်သည် ၂၀၁၄ ခုနှစ် ဇန်န၀ါရီ ၃ ရက် နေ့တွင် ပုသိမ်အကျဉ်းထောင်မှပြန်လည်လွတ်မြောက်ခဲ့ပြီး အကြီးစားဆောက်လုပ်ရေးစီမံကိန်းများကိုဆက်လက်ဆောင်ရွက်နေသူဖြစ်သည်။ NLD အစိုးရလက်ထက်တွင် ရခိုင်ပြည်နယ်ဖွံ့ဖြိုးရေးစီမံကိန်း(UEHRD) သို့ ကျပ်သိန်းပေါင်း ၁၅၀၀၀၊ ရန်ကုန်တိုင်း  ဒေသကြီး အစိုးရအဖွဲ့သို့ ကျပ်သိန်း ၅၀၀၀၊ မန္တလေးတိုင်း ဒေသကြီး အစိုးရအဖွဲ့သို့ ကျပ်သိန်း ၅၀၀၀ လှူဒါန်းခဲ့ပြီးဖြစ်သည်။

မြေတိုင်ကန်ကျေးရွာမှ နိုင်ငံတော်၏ အတိုင်ပင်ခံပုဂိ်္ဂုလ်သို့ တောင်းဆိုခဲ့သော သောက်သုံးရေရရှိရေး၊ စိုက်ပျိုး ရေ ရရှိရေးနှင့် တာပေါင်များ ပြုပြင်ရေး၊ လျှပ်စစ်မီးလင်းရေးနှင့် မူလတန်း ကျောင်းဆောင်သစ်ရရှိရေးများ အားလုံးနီးပါး ဖြည့်ဆည်းပေးခဲ့ပြီး စိုက်ပျိုးရေရရှိရေးအတွက်လည်း ကန်တည်ဆောက်ရေးများကို ဆောင်ရွက်နေကြောင်း သိရသည်။

အဆိုပါ ဒေါ်အောင်ဆန်းစုကြည်ကျောင်းဟု အမည်ပေးထားသည့်ကျောင်းကို ဇန်န၀ါရီ ၂၉ ရက်နေ့တွင် ဖွင့်လှစ်ပေးခဲ့ကြောင်း သိရှိရသည်။

Category: 

Share