သီလ၀ါ အထူးစီးပွားရေးဇုန် မြေသိမ်းယူရာတွင် ဥပဒေကို မလိုက်နာခဲ့ဟုဆို

သီလ၀ါ အထူးစီးပွားရေးဇုန် မြေသိမ်းယူမှုမှာ မြန်မာနိုင်ငံတွင် ပြဋ္ဌာန်းထားသော ဥပဒေနှင့်အညီ သိမ်းယူခဲ့ခြင်း မဟုတ်ဟု အထက်တန်းရှေ့နေ တစ်ဦးဖြစ်သူ ဦးမြင့်သွင်က ထောက်ပြ ပြောဆိုခဲ့သည်။

“သီလ၀ါ အထူးစီပွားရေးဇုန် အတွင်းမှာ ၁၉၈၄ခု မြေသိမ်း ဥပဒေအရ မြေတွေကို သိမ်းယူခဲ့တာ မဟုတ်ဘူးဆိုတာကို ကျွန်တော်တို့ တွေ့ရတယ်။ မြေတွေကို ၁၉၉၇မှာ သိမ်းယူခဲ့တာဆိုပေမယ့် လယ်သမားတွေ ၂၀၁၂အထိ မြေခွန်ဆောင်နေတုန်းပဲ။ အဲဒီတော့ အစိုးရဘက်မှ ၂၀၁၂ လယ်ယာမြေ ဥပဒေ၊ နည်းဥပဒေကို လိုက်နာမှု မရှိခဲ့ဘူး”ဟု ၄င်းကဆိုသည်။

ယင်းမြေသိမ်းယူမှုနှင့် ပတ်သက်၍ ဂျပန် အပြည်ပြည်ဆိုင်ရာ ကော်ပိုရေးရှင်း အေဂျင်စီ (JICA)  စုံစမ်း စစ်ဆေးရေး အဖွဲ့ အနေဖြင့်လည်း သီလ၀ါ စီမံကိန်း လက်ရှိ လုပ်ဆောင်နေမှုများတွင် စနစ်ကျ မျှတမှု ရှိ/မရှိ အခြေအနေများနှင့် ပတ်သက်ပြီး အစီရင်ခံစာ ထုတ်ရန်အတွက် စုံစမ်းစစ်ဆေးမှုများ စတင် လုပ်ဆောင်နေပြီ ဖြစ်ကြောင်း သီလ၀ါ လူမှုဖွံ့ဖြိုးရေး အဖွဲ့ဝင် ဖြစ်သည့် ဦးမြလှိုင်ထံမှ သိရသည်။

အဆိုပါ စုံစမ်းစစ်ဆေးရေး အဖွဲ့သည် ဇူလိုင် ၄ ရက်နေ့မှ စတင် စစ်ဆေးမှုများ ပြုလုပ်ခဲ့၍  ဇူလိုင် ၁၈ ရက်နှင့် ၁၉ ရက်များတွင် ဒေသခံများနှင့် တွေ့ဆုံမှုများ ပြုလုပ်ပြီး အစီရင်ခံစာ ပထမပိုင်းသည် လာမည့် စက်တင်ဘာလလယ်တွင် ထွက်ရှိမည်ဖြစ်ကြောင်း ၄င်းက ဆက်လက် ပြောကြားသည်။

“သီလ၀ါက မြန်မာတစ်နိုင်ငံလုံး အတွက် ဥပာမာတစ်ခုဖြစ်လာနိုင်တယ်။ တကယ်လို့ အစိုးရကနေပြီး ကျွန်တော်တို့ ရွှေ့ပြောင်း နေရာချထားရေးကို လုံလောက်တဲ့ အိုးအိမ်တွေ၊ အစားထိုး မြေလျော်ပေးမှုတွေ၊ အသက်မွေးဝမ်းကြောင်းတွေ ဖန်တီးပေးတာတွေ၊ လျော်ကြေးတွေ၊ ပြီးတော့ ဆုံးဖြတ်ချက်ချတဲ့ အချိန်မှာ ကျွန်တော်တို့ရဲ့ သဘောတူညီချက်တွေ ပြောဆိုချက်တွေကို ထည့်သွင်း စဉ်းစားခဲ့မယ်ဆိုရင် ကျွန်တော်တို့ အားလုံးအတွက် ကျေနပ်စရာပါပဲ။ ပြီးတော့လည်း ဒါဟာ မြန်မာနိုင်ငံမှာ တခြား စီမံကိန်းတွေ အတွက်လည်း ဒါဟာ စံပြ ဥပမာတစ်ခု ဖြစ်လာလိမ့်မယ်” ဟု ၄င်းကဆိုသည်။ သီလ၀ါ အထူးစီးပွားရေးဇုန် တည်ဆောက်ရန် အစိုးရအနေဖြင့် အလွမ်းဆွတ်ရွာ၊ မြိုင်သာယာရွာ၊ သီလ၀ါရွာ၊ သီတာမြိုင်ရွာ၊ ကရက်ရွာ၊ ဖလန်းရွာ စသည့် ရွာ ၇ရွာကို သိမ်းယူခဲ့ပြီး ယင်းရွာများတွင်  အိမ်ထောင်စု ၉၀၁စု လူဦးရေ ၃၈၆၉ဦး အိမ်ခြေ ၁၀၁၇ လယ်ဧက ၄၁၂၀ခန့်ရှိကြောင်း ရွာသူ ရွာသားများထံမှ သိရသည်။

သီလ၀ါ အထူးစီးပွားရေးဇုန် စီမံကိန်းတွင် ၁၀ရာခိုင်နှုန်း အနေဖြင့် JICA မှ ယမ်သန်း ၅၀၀ (၅ဘီလံကျပ်) ရင်းနှီးမြှုပ်နှံထားပြီး မစ်ဆူဘီရှီ၊ ဆူမီတိုမို နှင့် မာရူဘယ်နီ စသည့် ဂျပန် ကုမ္ပဏီ သုံးခုမှာလည်း ၃၉ရာခိုင်နှုန်း မြှုပ်နှံထားကြောင်းနှင့် မြန်မာ အစိုးရက စီမံကိန်း၏ ရှယ်ယာ ၁၀ရာခိုင်နှုန်းနှင့် ဖက်စပ် မြန်မာ ကုမ္ပဏီ (၉)ခုမှာလည်း ၄၁ ရာခိုင်နှုန်း ရင်းနှီးမြှုပ်နှံထားကြောင်း သိရသည်။

 

Category: 

Share