နိုင်ငံ၏ ဂုဏ်သိက္ခာကျဆင်းစေသဖြင့် ဂျပန်နိုင်ငံမှ အ၀တ်ထည်ဟောင်းများ တရားမ၀င် တင်သွင်းလာသည့် ကုမ္မဏီကိုအရေးယူ

ဂျပန်နိုင်ငံမှ တင်သွင်းလာသော ကုန်သေတ္တာ၇လုံးအား ဇူလိုင်၃၀ရက်နေ့တွင် ဖွင့်ဖောက်စစ်ဆေးရာ ဂျပန်နိုင်ငံမှ အ၀တ်အထည်ဟောင်းများ တင်သွင်းလာကြောင်း တွေ့ရသည့် အတွက် ကုမ္ပဏီအား ဥပဒေအရ အရေးယူ ဆောင်ရွက်သွားမည် ဖြစ်ကြောင်း မိုဘိုင်းအဖွဲ့မှ သိရသည်။

အဆိုပါ တရားမ၀င် တင်သွင်းလာသော ကုန်သေတ္တာများသည် အေးရှားဝေါလ် ဆိပ်ကမ်းသို့ ဧပြီ ၃၀ရက်နေ့တွင် ရောက်ရှိလာပြီး ရက်၆၀အကြာတွင် မြန်မာ့ဆိပ်ကမ်း အာဏာပိုင်မှ သက်ဆိုင်ရာ ကုမ္ပဏီသို့ ပစ္စည်းထုတ်ယူခွင့် ပြုခဲ့သည့် ပစ္စည်းများ ဖြစ်သည့်အပြင် တရားဝင် သွင်းကုန် လိုင်စင်ဖြင့် တင်သွင်းထားသည့် ပစ္စည်းများ ဖြစ်သော်လည်း သို့သော် ကုမ္ပဏီမှ တင်သွင်းခွင့် လိုင်စင်နှင့် တင်သွင်းလာသည့် ပစ္စည်းများ ကွဲလွဲနေသောကြောင့် အခုလို အရေးယူရခြင်း ဖြစ်ကြောင်း သိရသည်။

“Myanmar Acme Production Co., Ltdသို့ သွင်းကုန် လိုင်စင်အဖြစ် ထုတ်ပေးခဲ့သော ကုန်ပစ္စည်းတွေကတော့ Brand New အ၀တ်အထည်တွေ တင်သွင်းဖို့အတွက် လိုင်စင်ထုတ် ပေးခဲ့တာပါ။ အခုတင်သွင်းလာတဲ့ ပစ္စည်းတွေကတော့ ဂျပန်နိုင်ငံက အ၀တ်အထည်ဟောင်းတွေ ဖြစ်နေတယ်။ ဒါ့ကြောင့် လိုင်စင်ပါ ကုန်ပစ္စည်းနဲ့ တင်သွင်းလာတဲ့ ကုန်ပစ္စည်းတွေ ကွဲလွဲနေတာကြောင့် အရေးယူခြင်း ဖြစ်ပါတယ်။ သူ့ကိုတော့ ပညာပေးကာလ ဆိုပေမယ့် ဘယ်နိုင်ငံကမှ အင်္ကျီအဟောင်းတွေကို တင်သွင်းတာ လက်မခံဘူး။ နိုင်ငံရဲ့ဂုဏ်သိက္ခာလည်း ကျဆင်းပါတယ်။ ဒါ့ကြောင့် နိုင်ငံအတွင်း တရားမ၀င် တင်သွင်းလာတဲ့ ဘေထုပ်တွေကို အရေးယူတဲ့ နေရာမှာ ပညာပေးကာလ ဖြစ်ပေမယ့်လည်း ဒဏ်ကြေးပေးပြီး ပြန်လည်ထုတ်ယူခွင့် မရှိပါဘူး။ ဥပဒေရဲ့ လုပ်ထုံးလုပ်နည်းများ နဲ့အညီ အရေးယူသွားမှာပါ”ဟု ညွှန်ကြားရေးမှူး ဦးတင်ရဲဝင်းမှ ပြောသည်။

တရားမ၀င် သယ်ဆောင်လာသော ကုန်သေတ္တာ ၇လုံးအား ဖွင့်ဖောက် စစ်ဆေးရာ အ၀တ်အထည်ဟောင်း အထုပ် ၁၁၇၂ ထုပ်၊ အထည်အရေအတွက်မှာ ၃၃၀၀၀၀ပါရှိကြောင်း သိရသည်။

 

Category: 

Share