ရခိုင်ပြည်နယ်ရှိ ဘင်္ဂါလီများ တိတ်တဆိတ် ထွက်ပြေးမှုများရှိနေ

ရခိုင်ပြည်နယ်တွင် နေထိုင်သော ဘင်္ဂါလီများမှာ ယခုရက်ပိုင်း အတွင်းမှာပင် အုပ်စုလိုက် ထွက်ပြေးနေခြင်းများ ရှိနေပြီး ယင်းသို့ ထွက်ပြေးနေခြင်းမှာ ၄င်းတို့အတွက် ဘ၀အာမခံချက် ပေးနိုင်သော နေရာသို့ ပြောင်းရွှေ့ရန် ရည်ရွယ်နေခြင်း ဖြစ်နိုင်သည်ဟု မြေပုံမြို့နယ် လွှတ်တော် ကိုယ်စားလှယ် ဦးဖေသန်းက Tomorrow ဂျာနယ်သို့ ပြောကြားခဲ့သည်။

ဘင်္ဂါလီများသည် ရခိုင်ပြည်နယ်မှ ယခုရက်ပိုင်းအတွင်း ဆက်တိုက်ဆိုသလို ထွက်ပြေးလျက်ရှိပြီး နယ်ခြားစောင့် ရဲများကလည်း   လိုက်လံဖမ်းဆီးလျက် ရှိနေကြောင်း၊ ယင်းသို့ ထွက်ပြေးနေခြင်းမှာ ဘ၀အာမခံချက် ရှိနေသော နေရာတစ်ခု ရရှိနေခြင်း သို့မဟုတ် မှတ်ပုံတင် ပြုလုပ်သော စီမံချက်ကြောင့်လည်း ဖြစ်နိုင်သည်ဟု ဦးဖေသန်းက သုံးသပ် ပြောကြားခဲ့သည်။

စက်တင်ဘာလ ၂၂ ရက်နေ့ကလည်း မောင်းတောနယ်စပ် နတ်မြစ်အတွင်း မလေးရှားနိုင်ငံသို့ တရားမ၀င် ထွက်ခွာမည့် ဘင်္ဂါလီ စက်လှေသုံးစင်းအား တစ်နေ့တည်းတွင် နယ်ခြားစောင့်ရဲများက ဖမ်းဆီးခဲ့ပြီး အဆိုပါ စက်လှေမှ ခုန်ချ ထွက်ပြေးသူများကိုလည်း လိုက်လံ ဖမ်းဆီး စုံစမ်းလျက် ရှိကြောင်း သိရသည်။

၎င်းထွက်ပြေးသူ ဘင်္ဂါလီများမှာ ပင်လယ်ပြင်အတွင်း ရပ်စောင့်ဆိုင်းနေသော မလေးရှား သင်္ဘောများသို့ သွားရောက်ရန် ဖမ်းဆီး ရမိခဲ့ခြင်း ဖြစ်ကြောင်း၊ အဆိုပါ စက်လှေပေါ်မှာ ဖမ်းဆီးရမိခဲ့သူများကို အမှတ် ၇နယ်မြေနယ်ခြားစောင့် ရဲစခန်းတွင် ထိန်းသိမ်းထားပြီး ဥပဒေနှင့်အညီ အရေးယူ ဆောင်ရွက်လျက်ရှိကြောင်း သိရသည်။

ဘင်္ဂါလီများအား နိုင်ငံသား မှတ်ပုံတင် ပြုလုပ်နေခြင်းသည် အဆိုပါ မြေပုံဒေသတွင် ကောက်ခံရာ အဆင်ပြေခဲ့သော်လည်း စစ်တွေနှင့် အခြားမြို့များတွင်မူ အခက်အခဲများစွာ ရှိနိုင်ကြောင်း မှတ်ပုံတင် ထုတ်ပေးလျက်ရှိသော တာဝန်ရှိသူတစ်ဦးက Tomorrowသို့ ပြောသည်။

မှတ်ပုံတင်ထုတ်ပေးမှုကို ကျေနပ်စွာ လက်ခံသူ ဘင်္ဂါလီများ အနေဖြင့် နိုင်ငံသားဖြစ်လာနိုင်ပြီး ယခုထက် အဆင်ပြေစွာ နေထိုင် စားသောက်နိုင်မည် ဖြစ်သော်လည်း မြန်မာလူမျိုး တိုင်းရင်းသား မျိုးနွယ်စု အနေဖြင့် စာရင်းဝင်လာနိုင်မည် မဟုတ်ကြောင်း အထက်ပါ လွှတ်တော် ကိုယ်စား လှယ် ဦးဖေသန်းက ပြောသည်။

 

Category: 

Share