ငါးလောင်းပြိုင် လူသတ်မှု နောက်ကွယ်မှ မြှုပ်ကွက်များ (ဇာတ်သိမ်း)

စိမ်းလဲ့ကန်သာ လူသတ်မှု ဖြစ်ပွားသည့်နေ့တွင် အမှုအမှန်ကို ဖော်ထုတ် စစ်ဆေးရမည့် အနောက်ပိုင်း ခရိုင် အထူးရဲတပ်ဖွဲ့ (ဒုစရိုက်မှု နှိမ်နှင်းရေးအဖွဲ့) နှင့် ရဲမှုခင်းတပ်ဖွဲ့ (CID)မှာ နောက်ဆုံးမှ သိရှိပြီး ရောက်ရှိခဲ့သည်။ ရဲတပ်ဖွဲ့ ရောက်ရှိလာချိန်တွင် စစ်ဒေသနှင့် ရန်ကုန်တိုင်း စစ်ဌာနချုပ် အကြမ်းဖက် နှိမ်နှင်းရေး တပ်ဖွဲ့တို့၏ ခြေရာလက်ရာများဖြင့် ရှုတ်ယှက်ခတ်နေသည့် အတွက် တရားခံများ၏ သဲလွန်စနှင့် လက်စလက်နများကို ရှာဖွေရန် အလွန်ခက်ခဲနေပြီ ဖြစ်ကြောင်း အဆိုပါ အမှုတွင် ပါဝင်ပတ်သက်ခဲ့သည့် ရဲအရာရှိတစ်ဦးက ပြောပြသည်။

သူ၏အဆိုအရ အထက် အဆင့်မြင့် ဌာနများမှ ထိုအမှုကို ပေါ်ပေါက်စေလိုသည့် လက္ခဏာ မရှိသည်ကိုလည်း တွေ့ရသည်ဟု ဆိုသည်။ ထို့အပြင် အမှုမပြီးပြတ်သေးမီ အဆိုပါ မြေနှင့်အိမ်ကို တစ်စတုရန်းပေလျှင် ကျပ်တစ်သိန်းနှစ်သောင်းဖြင့် ရောင်းချခဲ့ခြင်းကလည်း မလုပ်သင့် မလုပ်ထိုက်သော ကိစ္စဟု အဆိုပါ အရာရှိက ပြောသည်။ ထို့အပြင် ထူးဆန်းသည့် အချက်မှာ ထိုမြေနှင့် အိမ်ကို အခြားသူ အမည်ခံပြီး အမှန်ဝယ်သွားသည့်သူမှာ ဗိုလ်ချုပ်မှူးကြီး သန်းရွှေ၏ စစ်ဖက်လက်ထောက် ဗိုလ်ချုပ်၏ ဇနီး ဖြစ်နေပြန်သည်။ ထိုမြေနေရာကို အလောတကြီး ၀ယ်လိုက်ခြင်းမှာ မြေအောက်တွင် မြှုပ်နှံထားသော တန်ဖိုးကြီး ရတနာ ပစ္စည်းများ ရှိနေသည်ကို သိထားပြီး ရှာဖွေလိုသောကြောင့်ဟု ထိပ်သီး မြေပွဲစားများက စွပ်စွဲပြောဆိုခဲ့ကြသည်။

လူသတ်သမားများသည် သိန်းထောင်ချီတန်သော စိန်များနှင့် အခြား ကျောက်မျက်များကို ယူမသွားသည်ကလည်း သာမန် လုယက်မှု၊ သာမန်ဓါးပြမှု မဟုတ်ဘဲ သူတို့လိုချင်သော တန်ဖိုး အနဂ္ဂ ထိုက်တန်သည့် ပစ္စည်းအနည်းငယ်ကိုသာ ရွေးချယ်ယူသွားသည်ကို ကောက်ချက်ချနိုင်သည်။ ထို့အပြင် အိမ်ရှင်ဦးချာလီ၏ ပိုင်ဆိုင်မှုနှင့် ပစ္စည်းများ ရောင်းဝယ်ငှားရမ်းသည့် မှတ်တမ်း ကွန်ပျူတာကို ယူဆောင်သွားခြင်းကလည်း မည်သည့် ပစ္စည်းကို မည်သူက ငှားထားသည်၊ မည်သူက မည်သည့် ပစ္စည်းကို ပြန်ပေးရန် ကျန်နေသေးသည်၊ ဦးချာလီ မိသားစုတွင် မည်မျှ တန်ဖိုးထိုက်တန်သည့် ပစ္စည်းများကို ဆွေစဉ် မျိုးဆက်ပိုင်ဆိုင်ထားသည်ကို လက်စဖျောက်လိုသဖြင့် ကွန်ပျူတာကို ယူသွားခြင်း ဖြစ်သည်။ ဦးချာလီ၏ ယောက္ခမဖြစ်သူ သူဌေးကြီး မိုးကုတ် ဦးမြမောင်သည် ငွေကိုရေလိုသုံးနိုင်သည်ဟု မီဒီယာလောကတွင် ထိုခေတ်ထိုအချိန်ကပင် ထင်ရှားသူ ဖြစ်သည်။ ထို့ကြောင့် အဆိုပါ မိသားစုပိုင်ဆိုင်သည့် ပစ္စည်းများမှာ မည်မျှတန်ဖိုးရှိမည်ကို တွေးတောကြည့်က သိနိုင်မည်ဖြစ်သည်။ အမှုမပြီးမီ အစိုးရက ဦးဆောင်ပြီး နှစ်ဖက် ဆွေမျိုးများကို အမွေခွဲပေးလိုက်သဖြင့် မည်သည့် ဆွေမျိုးကမှ အမှုပေါ်ရန် စိတ်ဝင်စားခြင်း မရှိတော့သည်ကလည်း စနစ်တကျ ရေးဆွဲထားသော ဇာတ်ညွှန်းတစ်ခုလို ဖြစ်နေသည်။

ထိုအချက်များကို စုစည်းလိုက်ပါက လူသတ်မှုကို ကြံစည်သူများသည် မည်သူများ ဖြစ်နေသည်ကို ညွှန်ပြနေသော်လည်း ဖော်ထုတ်ရန် တာဝန်ရှိသည့် ရဲတပ်ဖွဲ့သည် ထိုစဉ်က ဖော်ထုတ်နိုင်သည့် သြဇာအာဏာ မရှိခဲ့ပေ။ ထို့အပြင် နှစ်ပေါင်းများစွာ စနစ်တကျ တည်ထောင်ပြီး အခြေကျနေသော စစ်ထောက်လှမ်းရေး တပ်ဖွဲ့နှင့် အမျိုးသား ထောက်လှမ်းရေး တပ်ဖွဲ့မှာလည်း အာဏာရှင်များက ၂၀၀၅ခုနှစ်တွင် ဖျက်သိမ်းထားပြီး ဖြစ်သဖြင့် နိုင်ငံ၏ ထောက်လှမ်းရေး ကွန်ရက်မှာ ပြည်တွင်းတွင်ရော ပြည်ပတွင်ပါ ကျိုးပေါက်နေချိန် ဖြစ်သည်။ ထိုကဲ့သို့သော အခြေအနေတွင် ပုဇွန်တောင် ကုန်သွယ်မှု ဗဟိုဌာနနှင့် မြေနီကုန်း ဒဂုံစင်တာ ဗုံးပေါက်ကွဲမှုများ အပါအ၀င် ဖြစ်ပျက်ခဲ့သမျှ မည်သည့်မှုခင်းကိုမှ ဖော်ထုတ်နိုင်ခြင်း မရှိခဲ့ပါ။ ၁၉၈၃ခုနှစ် အာဇာနည်ဗိမာန် ဗုံးပေါက်ကွဲမှုကို ကြည့်လျှင်လည်း ထိုစဉ်က ဦးနေ၀င်း အနေဖြင့် စစ်ထောက်လှမ်းရေး အဖွဲ့နှင့် အမျိုးသား ထောက်လှမ်းရေး အဖွဲ့ကို အာဏာသိမ်းရန် ကြံစည်သည်ဟုဆိုကာ ဖြိုခွင်းထားချိန် ဖြစ်နေသည်ကို တွေ့ရသည်။

ယခု စိမ်းလဲကန်သာ ငါးလောင်းပြိုင် လူသတ်မှုတွင် လက်ဗွေရာတစ်ခုမှ မကျန်ခဲ့သော်လည်း ၉မမ ပစ္စတို သေနတ် ကျည်ခွံများ ကျန်ခဲ့ပါသည်။ ကျည်ဆန် ဆိုသည်မှာ ဖင်ပိုင်းတွင် ထုတ်လုပ်သည့် အဖွဲ့အစည်း၏ အမှတ်တံဆိပ်နှင့် ကျည်ဆန်၏ Lot နံပါတ်ပါပြီး ဖြစ်သည်။ ထိုကျည်ခွံကို စစ်ဆေးကြည့်ပါက မည်သည့် နိုင်ငံက ထုတ်လုပ်ပြီး မည်သည့် အဖွဲ့အစည်းသို့ ထုတ်ပေးထားသည့်  ကျည်ဖြစ်ကြောင်း စစ်ဆေးနိုင်သော်လည်း ထိုစဉ်က အဆိုပါ ကျည်ခွံများကို အဘယ်ကြောင့် မစစ်ဆေးခဲ့ကြပါသနည်း။ မိမိနိုင်ငံ တပ်မတော် အရာရှိများကိုလည်း ၉မမပစ္စတို သေနတ်များကို တပ်မတော်မှ ထုတ်ပေးထားသဖြင့် မိမိဘက်မှ ကျည်များ မဟုတ်ကြောင်းကို ပြည်သူလူထု သံသယကင်းစေရန် စစ်ဆေးထုတ်ပြန် သင့်သော်လည်း ထိုအရေးကြီးသည့် အပိုင်းကို အဘယ်ကြောင့် မဆောင်ရွက်ခဲ့ကြသနည်း ဆိုသည်မှာလည်း မေးခွန်းတစ်ခုဖြစ်သည်။ ယခုအခါ ပြင်ဦးလွင်မြို့တွင် နေထိုင်နေသော ရန်ကုန်တိုင်း ရဲတပ်ဖွဲ့မှူးဟောင်းသည်လည်း အမှုစစ်ဆေးစဉ် ပြည်ပသို့ တိမ်းရှောင် ထွက်ပြေးခဲ့သည့် တရားခံပြေး ဖြစ်ပြီး ယခု အေးချမ်းစွာ ပြန်လည် နေထိုင်နိုင်ခြင်းမှာလည်း မည်သည့် အပေးအယူဖြင့် နေထိုင်သည်ကိုလည်း ပြည်သူများ စိတ်ဝင်စားနေကြသည်။

ထို့ကြောင့် စိမ်းလဲ့ကန်သာ လူသတ်မှု နောက်ကွယ်မှ မြှုပ်ကွက်များကို အဆုံးသတ်ရသော် အမှုမပြီးမီ အမှုနှင့် ပတ်သက်သည့် အိမ်ကို ရောင်းခြင်း၊ အတွင်း ပစ္စည်းများကို အစိုးရက တာဝန်ယူ အမွေခွဲပေးခဲ့ခြင်းများ တွေ့ရပြီး ဤအမှုသည် ရဲတပ်ဖွဲ့က စစ်ဆေးပြီး မပေါ်သော အမှုမဟုတ်ပဲ မဖော်ပဲထားသော အမှုဖြစ်ကြောင်းနှင့် ထိုသို့ မဖော်ထုတ်နိုင်သည်ကိုလည်း မည်သည့် အထက် အဖွဲ့အစည်းကမှ ဖိအားပေး ဖော်ထုတ်စေခြင်းမျိုး အရေးယူခြင်းမျိုး မရှိခဲ့သည့်အတွက် ထိုအမှုသည် မည်သူများနှင့် မည်သို့ ပတ်သက်နိုင်ကြောင်းကို စာဖတ်ပရိသတ် ပြည်သူများ အနေ ဖြင့် သိရှိနိုင်ပြီဟု ယူဆပါကြောင်း။ ထို့အပြင် ထိုအမှုနှင့် ပတ်သက်ပြီး သက်ဆိုင်သည့် ကမာရွတ် ရဲစခန်းတွင် ပထမ သတင်းပေးတိုင်ချက် FIR အပါအ၀င် မည်သည့် သတင်းအချက်အလက်ကိုမှ ယခုအချိန်အထိ မေးမြန်း မရသည်ကလည်း ထူးဆန်းလှပါကြောင်း နိုင်ငံသား အားလုံးအတွက် တင်ပြအပ်ပါ။

Tomorrow သတင်းအဖွဲ့

 

Category: 

Share