ပုဂံသို့ နိုင်ငံခြားဧည့်သည် ၀င်ရောက်မှု ပိုများလား

ပုဂံဒေသသို့ နိုင်ငံခြား ဧည့်သည် ၀င်ရောက်မှု ပိုမိုများပြားသည့် အတွက် ဟိုတယ်ဇုံ(၅)ကို တိုးချဲ့ တည်ဆောက်သွားမည် ဖြစ်ကြောင်း နိုင်ငံတော် သမ္မတ ဦးသိန်းစိန်က ပြောကြားခဲ့သည်။

ယခုအခါ ပုဂံဒေသတွင် ဟိုတယ်ဇုံ (၄) အထိ အကောင်အထည် ဖော်ဆောင်လျက်ရှိပြီး နိုင်ငံခြား ဧည့်သည် ၀င်ရောက်မှု တစ်နှစ်ထက် တစ်နှစ် ပိုမို များပြားလာသည့် အတွက် ဟိုတယ်ခန်းများ ထပ်မံ လိုအပ်နိုင် သောကြောင့် ဟိုတယ်ဇုံ(၅)အား ထပ်မံ ဆောင်ရွက်သွားမည်ဟု ဆိုသည်။

ဟိုတယ်ဇုံ(၅) ထပ်မံ တည်ဆောာက်ရန်နှင့် ပတ်သက်၍ ဖေဖော်ဝါရီ (၂၇)ရက်က ပုဂံမြို့၌ ကျင်းပပြု လုပ်ခဲ့သည့် ပုဂံဟိုတယ်ဇုံမှ လုပ်ငန်းရှင်များနှင့် တွေ့ဆုံရာတွင် နိုင်ငံတော် သမ္မတ ဦးသိန်းစိန်က ခရီးသွား လုပ်ငန်းဆိုင်ရာများ ပြောကြားရာတွင် ထည့်သွင်း ပြောကြားခဲ့ခြင်း ဖြစ်သည်။

ဆက်လက်၍ သမ္မတကြီးက မြန်မာနိုင်ငံတွင် နိုင်ငံတကာ အစည်းအဝေးကြီးများကို လက်ခံ ကျင်းပပါက ဟိုတယ်ခန်း မလုံလောက်သေးသည်ကို တွေ့ရှိရပါကြောင်း၊ ယခုနှစ်တွင် ဘင်းမ်စတက် ထိပ်သီး အစည်းအဝေး၊ အာဆီယံ ထိပ်သီး အစည်းအဝေးနှင့် အရှေ့အာရှ ထိပ်သီး အစည်းအဝေး ကြီးများကို လက်ခံ ကျင်းပရမည် ဖြစ်ရာ ခရီးသွားများ ပိုမို များပြားလာမည် ဖြစ်ကြောင်း ပြောကြားခဲ့သည်။

နိုင်ငံတော် အစိုးရ အနေဖြင့် နိုင်ငံရေး၊ စီးပွားရေးနှင့် အုပ်ချုပ်ရေး ပြုပြင်ပြောင်းလဲမှု လုပ်ငန်းများ ဆောင်ရွင်ခဲ့သည် နှင့်အမျှ နိုင်ငံတကာ ဆက်ဆံရေး တိုးတက်လာမှု နှင့်အတူ စီးပွားရေး အခွင့်အလမ်းများလည်း ပွင့်လန်းလာမှုကြောင့် ပြည်ပ ရင်းနှီးမြှုပ်နှံမှုများ ၀င်ရောက်လာမှု၊ နိုင်ငံရေး စီးပွားရေး တိုးတက်လာရန် အတွက် အထူး စီးပွားရေးဇုံများ ထူထောင်နေမှု၊ ကမ္ဘာ့ဘဏ် အပါအ၀င် နိုင်ငံတကာ ငွေကြေး အဖွဲ့အစည်းများ၊ ဥရောပ သမဂ္ဂနှင့် နိုင်ငံတကာ အစိုးရများက  ကြွေးမြီးများ ဖြေလျှော့ပေးခဲ့မှုနှင့် ပြည်ပ နိုင်ငံများမှ အတိုးနှုန်း သက်သာသော ကြွေးမြီများ ထုတ်ချေးပေးလာမှု၊ နိုင်ငံရေး တည်ငြိမ်လာမှု နှင့်အတူ တိုးတက်မှုများပြား လာခြင်း ဖြစ်ကြောင်း သိရသည်။

 

Category: 

Share