Local Sports

AFC Challenge Cup အမီ ကြည်လင်း ပြန်ကစားနိုင်ဖွယ်ရှိ

မြန်မာ့လက်ရွေးစင် တိုက်စစ်မှူး ဖြစ်သော ရန်ကုန် ယူနိုက်တက်မှ တောင်ပံ ကစားသမား ကြည်လင်းသည် ပြီးခဲ့သည့် ၂၇ ကြိမ်မြောက် အရှေ့တောင်အာရှ အားကစား ပြိုင်ပွဲတွင် ထိုင်းနှင့် ကစားသည့် အုပ်စုပွဲစဉ်၌ ဒဏ်ရာ ရရှိသွားခဲ့သည့် အတွက် ထိုင်းနိုင်ငံတွင် သွားရောက် ဆေးကုသနေခဲ့သည်။

ယခုအခါ နောက်ဆုံး ဆေးစစ်ချက်များအရ ကြည်လင်းသည် မေလဆန်းတွင် ဘောလုံး ပြန်လည် ကစားနိုင်တော့မည် ဖြစ်ကြောင်း တာဝန်ရှိ ဆရာဝန်ကြီးမှ ပြောကြားခဲ့သည်။ ကြည်လင်းသည် ဆီးဂိမ်း ပြိုင်ပွဲ မတိုင်မီ ကတည်းက ဒဏ်ရာရရှိခဲ့ခြင်း ဖြစ်ပြီး ဒဏ်ရာ ပြင်းထန်သောကြောင့် မြန်မာနိုင်ငံ ဘောလုံး အဖွဲ့ချုပ်မှ ပြည်ပတွင် ဆေးကုသမှု ခံယူစေခဲ့ခြင်း ဖြစ်သည်။

ရလဒ်ကောင်းများ ရရှိနေသည့် မြန်မာ ယူ-၁၄ အသင်း ဂျပန်-အာဆီယံ ပြိုင်ပွဲတွင် အုပ်စုအဆင့် တက်ပြီး နိုင်ပွဲထပ်ရ

ဂျပန်နိုင်ငံ၊ အိုဆာကာမြို့တွင် ကျင်းပနေသော ဂျပန် အာဆီယံ လူငယ်ဘောလုံးပြိုင်ပွဲတွင် မြန်မာ ယူ-၁၄ အသင်းသည် လာအိုအသင်းကို (၀ - ၁)ဂိုးဖြင့် ရှုံးနိမ့်ခဲ့သော်လည်း ကျန်ပွဲများ၌ ရလဒ်ကောင်းများ အသင့်အတင့် ရရှိခဲ့ကြောင်း သိရသည်။

မြန်မာ အသင်းသည် အိမ်ရှင် ဂမ်ဘာအိုဆာကာ အသင်းကို ဂိုးမရှိ သရေ၊ စင်ကာပူ အသင်းကို တစ်ဖက်တစ်ဂိုးစီ သရေ စသော ရလဒ်များ ရရှိခဲ့ပြီးနောက် အုပ်စု နောက်ဆုံးပွဲစဉ် ဖြစ်သော ဧပြီ ၅ရက်က မလေးရှားနှင့် တွေ့ဆုံသည့်ပွဲတွင် မြန်မာက (၂-၁)ဂိုးဖြင့် အနိုင်ရရှိခဲ့ သောကြောင့် အုပ်စုအဆင့်တက်ခဲ့သည်။

ဆီးဂိမ်း ရွှေတံဆိပ်ဆုရှင် သရေဖြင့်သာ ကျေနပ်ခဲ့ရတဲ့ စိန်ခေါ်ပွဲ

မြန်မာနိုင်ငံ လက်ဝှေ့ အဖွဲ့ချုပ်မှ ကြီးမှူးပြီး H&S Groupမှ စီစဉ်သော ရန်ကုန်မြို့၊ ပြည်သူ့ရင်ပြင်၌ ဧပြီလ ၆ ရက်နေ့ ည ၈း၃၀ နာရီတွင် ကျင်းပသည့် မြန်မာ့ လက်ဝှေ့စိန်ခေါ်ပွဲတွင် ၂၇ ကြိမ်မြောက် အရှေ့တောင်အာရှ အားကစား ပြိုင်ပွဲ ရွှေတံဆိပ်ဆုရှင် ထွန်းထွန်းမင်း(မုဒုံသား) အနေဖြင့် စိန်ခေါ်လာသူ စောရန်ပိုင်(ဘိလပ်မြေ စက်ရုံ) ပထမတန်း လက်ဝှေ့ အကျော်အမော်နှင့် ယှဉ်ပြိုင် ထိုးသတ်ခဲ့ရာ သရေဖြင့် ကျေနပ်ခဲ့ရသည်။

နိုင်ငံတကာ တင်းနစ်ကစားသမားများ ပါဝင်မည့် မြန်မာအိုးပင်း တင်းနစ်ပြိုင်ပွဲ ကျင်းပမည်

နိုင်ငံတကာ တင်းနစ် ကစားသမားများ ပထမဦးဆုံး ၀င်ရောက် ယှဉ်ပြိုင်မည့် မြန်မာ အိုးပင်း တင်းနစ် ပြိုင်ပွဲကို ဧပြီလ ၂ရက်နေ့မှ ၆ ရက်နေ့ အထိ သိမ်ဖြူ တင်းနစ်ကွင်းတွင် ကျင်းပ ပြုလုပ်သွားမည် ဖြစ်ကြောင်း တင်းနစ် အဖွဲ့ချုပ်မှ သတင်း ထုတ်ပြန်ခဲ့သည်။

ပြိုင်ပွဲတွင် အလွတ်တန်း တစ်ဦးချင်း ပြိုင်ပွဲနှင့် နှစ်ယောက်တွဲ ပြိုင်ပွဲ နှစ်မျိုး ပါဝင်မည် ဖြစ်ပြီး အမျိုးသမီး ပြိုင်ပွဲ ပါဝင်ခြင်း မရှိကြောင်း သိရှိရသည်။ အလွတ်တန်း တစ်ဦးချင်း ပြိုင်ပွဲတွင် ချန်ပီယံဆု ရရှိသူအား အမေရိကန် ဒေါ်လာ ၅၀၀၀၊ ဒုတိယဆုအား ဒေါ်လာ ၂၅၀၀၊ တတိယဆုအား ဒေါ်လာ ၁၂၅၀ ၊ စတုတ္ထဆုအား ၆၂၅ ဒေါ်လာတို့ ချီးမြှင့်မည် ဖြစ်သည်။

ဒိုင်လူကြီး ထိုးကြိတ်ခံရခဲ့သည့် ရခိုင်-ဟံသာဝတီ ဘောလုံးပွဲ ပြဿနာ

ယခုနှစ် မတ်လ ၂၈ ရက်နေ့တွင် ပဒုမ္မာကွင်း၌ ကျင်းပသည့် ရခိုင် ယူနိုက်တက် အသင်းနှင့် ဟံသာဝတီ ဘောလုံးအသင်းတို့ ယှဉ်ပြိုင် ကစားခဲ့သော  မြန်မာ နေရှင်နယ်လိဂ်-၂ အမှတ်ပေး ဘောလုံး ပွဲစဉ်တွင် ဒိုင်လူကြီးကို ကိုယ်ထိလက်ရောက် ထိုးကြိတ်သည့် ပြဿနာ ဖြစ်ပွားခဲ့သည်။ အဆိုပါ ပွဲစဉ်အပြီး ဒိုင်လူကြီးက ဟံသာဝတီ အသင်းကို ပန်နယ်တီ ကန်ခွင့်ပေးခဲ့သောကြောင့် ရခိုင် အသင်း မန်နေဂျာနှင့် ကစားသမားများက ဒိုင်လူကြီးကို ထိုးကြိတ်ခဲ့ခြင်း ဖြစ်သည်။

MNL တစ်လတာ အကောင်းဆုံး နည်းပြနှင့် ကစားသမားများ ဆုချီးမြှင့်ရာ ရန်ကုန် ယူနိုက်တက်မှရရှိ

၂၀၁၄ MNL အမှတ်ပေး ပြိုင်ပွဲ၏ ဖေဖော်ဝါရီလ တစ်လတာ အကောင်းဆုံးဆုများ ရရှိခဲ့သော ရန်ကုန်ယူနိုက်တက် နည်းပြ အဲရစ်ဝီလျှံနှင့် ကစားသမား အဖြစ် ရန်ကုန် ယူနိုက်တက်မှ အီမာဆင်ကို Myanmarမှ ဆုများ ချီးမြှင့်ခဲ့သည်။

အကောင်းဆုံး ကစားသမားဆုကို ကျပ် ၁၀သိန်းနှင့် နည်းပြဆုကို ကျပ် ၅သိန်း ချီးမြှင့်ခဲ့ပြီး ယင်းဆုပေးပွဲကို ရန်ကုန် အသင်းနှင့် ချင်းယူနိုက်တက်တို့ပွဲ ပထမပိုင်း အပြီး ချီးမြှင့်ခဲ့သည်။

 

ရတနာပုံအသင်း မနောမြေနှင့် သရေကျ၍ အမှတ်ပေး ဇယားထိပ်ဆုံးကို လက်လွတ်

ယခုနှစ် MNL ဘောလုံးရာသီ အတွင်း ရှုံးပွဲ လုံးဝမရှိသေးသော ရတနာပုံ အသင်းသည် မနောမြေ အသင်းနှင့် ယှဉ်ပြိုင် ကစားရာ တစ်ဂိုးစီ သရေရလဒ်သာ ရယူနိုင်ခဲ့သည့် အတွက် အမှတ်ပေး ဇယား ထိပ်ဆုံးနေရာကို လက်လွတ် ခဲ့ရပြီး နေပြည်တော်အ သင်းကို လွှဲပြောင်း ပေးအပ်ခဲ့ရသည်။

ရတနာပုံ အသင်းတွင် ဂိုးသွင်းဘုရင် ဖွန်ဆီကာမှ ရတနာပုံ အသင်း အတွက် ပွဲကစားချိန် ၈၂ မိနစ်တွင် ယခုရာသီ ၁၁ ဂိုးမြောက် သွင်းယူခဲ့သော်လည်း ၁ဂိုးစီသရေ ရလဒ်ဖြင့်သာ ကျေနပ် ခဲ့ရသည်။

အိတ်ခ်ျအိုင်ဗီ (HIV )ရောဂါပိုး ကူးစက်မှု တိုက်ဖျက်ရေး လှုပ်ရှားမယ့် Protect the Goal

မြန်မာနိုင်ငံ နေရှင်နယ်လိဂ်၊ မြန်မာနိုင်ငံ ဘောလုံး အဖွဲ့ချုပ်၊ UNAIDS (ကုလ သမဂ္ဂ ခုခံအား ကျဆင်းမှု ရောဂါ တိုက်ဖျက်ရေး အစီအစဉ်)၊ အာရှ ဘောလုံး အဖွဲ့ချုပ်နှင့် အာရှ ဖွံ့ဖြိုးရေးဘဏ်တို့ ပူးပေါင်းကာ Protect the Goalဟု အမည်ရသည့် အိတ်ခ်ျအိုင်ဗီ(HIV) ရောဂါပိုး ကူးစက်မှု တိုက်ဖျက်ရေး လှုပ်ရှားမှု တစ်ရပ်ကို မြန်မာနိုင်ငံတွင် စတင် အကောင် အထည် ဖော်မည် ဖြစ်ကြောင်း မြန်မာနိုင်ငံ ဘောလုံး အဖွဲ့ချုပ် ဥက္ကဋ္ဌ ဦးဇော်ဇော်က ပြောသည်။

ဂျာမနီသို့ သွားရောက်လေ့ကျင့်မည့် မြန်မာ ယူ-၁၉ ဘောလုံးအသင်း

ယခုနှစ်တွင် မြန်မာနိုင်ငံက အိမ်ရှင်အဖြစ် လက်ခံ ကျင်းပမည့် အာရှ ယူ-၁၉ ချန်ပီယံရှစ် ပြိုင်ပွဲ မတိုင်မီ ဂျာမနီနိုင်ငံ၌ သွားရောက် လေ့ကျင့်ရန် စီစဉ်နေကြောင်း သိရသည်။

မြန်မာဘောလုံး အဖွဲ့ချုပ် အနေဖြင့် ဂျာမနီ ဘောလုံး အဖွဲ့ချုပ်နှင့် လောလောဆယ် ညှိနှိုင်းမှုများ ပြုလုပ်လျက်ရှိပြီး အစီအစဉ် မဖြစ်မှသာ တစ်ခြား ဥရောပ နိုင်ငံပွဲများတွင်  သွားရောက် လေ့ကျင့်မည်ဟု ဘောလုံး အဖွဲ့ချုပ် တာဝန်ရှိသူ တစ်ဦးမှ ပြောကြားခဲ့သည်။

အာရှ ယူ-၁၉ ချန်ပီယံရှစ် ပြိုင်ပွဲကို လာမည့် အောက်တိုဘာလ အတွင်း၌ ရန်ကုန်မြို့ သုဝဏ္ဏ ဘောလုံးကွင်းနှင့် နေပြည်တော် ၀ဏ္ဏသိဒ္ဓိ ဘောလုံးကွင်းများတွင် ပြိုင်ပွဲများကို ကျင်းပမည် ဖြစ်သည်။

မြန်မာဖူဆယ်အသင်း ခြေစမ်းပွဲပျက်၍ ပရိသတ်များ ဒေါသထွက်

မြန်မာ့လက်ရွေးစင် အမျိုးသား ဖူဆယ် အသင်းနှင့် ဂျပန်ဖူဆယ် ကလပ် Jyu Jyo အသင်းတို့၏ ခြေစမ်းပွဲ နောက်ဆုံး ပွဲစဉ်အား မတ်လ ၂၂ရက်နေ့က သုဝဏ္ဏကွင်းတွင် ကျင်းပရန် စီစဉ်ထား သော်လည်း ဂျပန်ဖူဆယ် အသင်းမှ ကစားသမား (၃)ဦးမှာ အပူချိန် မြင့်မားသည့် ဒဏ်ကို မခံစား နိုင်သည့် အတွက် ဂျပန်သို့ ပြန်သွားခဲ့သည်။

ထို့ကြောင့် ဂျပန် အသင်းတွင် လက်ကျန် ကစားသမား(၅) ကျန်ရှိသည့် အတွက် ခြေစမ်းပွဲကို ဖျက်သိမ်း ခဲ့ရသည်။

Pages